Bimbingen PJJ Tgl. 22 - 28 Februari 2015

BIMBINGEN PJJ TGL. 22 - 28 PEBRUARI 2015

(Pdt. Larena br. Sinuhadji)

Ogen :

Matius 24:45-51

Tema :

NGGELUH BUJUR MABA KEMALEMEN ATE

Tujun :

Gelah ngawan perpulungen :

1. Meteh ulu kemalemen ate

2. Nggeluh ibas kebujuren

Penjelasan Bahan PJJ

Ps. 24 secara keseluruhen ngerana kerna akhir jaman (eskatalogi), si ise pe la metehsa ndigan warina ras jamna kerehen Tuhan Jesus peduakaliken. Essensi i bas akhir jaman e me gelah tetap kita ersikap ras erjaga-jaga katawari paksa pe (ay. 44, 50).

I bas perikop enda Jesus make gambaren kerna juak-juak/hamba si kin arus tunduk ras patuh nandangi tuanna. Ilumbaken Jesus kerna juak-juak si tutus ras pentar, si jadi kepala juak-juak si deban i bas mbagiken pangan man juak-juak i bas paksana. Malem me ate juak-juak e tupung idapeti tuanna sangana erdahin ndahiken. Bahkan kedungenna, iangkat tuanna jadi pengawas i bas kerina erta-ertana. Janah juak-juak si la tutus, si la mehuli, e me juak-juak si la ertanggung jawab, ndahiken dahinna tupung je tuanna. E maka lit pengakap bas ia, ndekah denga tuanna reh maka ate-atena ndahiken dahin e. Pekpekina juak-juak si deban, mangani dingen minem-minem seh mabuk. Tapi reh tuanna enda ndai alu la isangkana ras ibunuhna juak-juakna enda ndai bagi perbahanenna man kalak si pekulah-kulah. I je tangis dingen mesui kel atena. Ertina, ndatken kematen si rasa lalap si erbahanca ia erkadiola (Matius 25:30, 46a).

Arah perumpaan si ibahan Jesus, maka banci sidat sada gambaren siarapken Tuhan nggeluh bas kita. Sabab kita me juak-juak sipercayaken Tuhan guna ndahiken tugas bas doni enda seh Tuhan reh peduakaliken. Kita juak-juak si arus bertanggung jawab total man Tuhan si enggo nebusi kita. Geluhta labo kita si empuna, tapi Dibata, sabab kita enggo itebus Tuhan alu darehNa si meherga (1 Kor. 6:19). Sikap si arus sidalanken kita :

1. Tek kita, maka akhir jaman pasti reh me, la perlu siraguken, soal digan kerehenNa labo urusenta. Semangat kepastian kerna kerehen Jesus peduakaliken erbahanca tetap kita ersikap ndalanken si ngena ateNa.
2. Setia (tutus) dingen la pekulah-kulah. I je entah la i je tuanna tetap ia ndahiken tugasna alu mehuli. Jesus i bas khotbah i uruk ngatakenca, “Labo kerina kalak si erlebuh man bangku, o Tuhan, Tuhan bengket ku bas Kinirajan Surga, tapi kalak si ngelakoken si ngena ate Bapangku i Surga si bengket ku Kinirajan e.” Ertina arus sue kata ras perbahanen. Adi siperdiateken perumpamaan Tuhan Jesus ndai, maka juak-juak si la mehuli ndai bunuhna pe teman-teman sesama juak-juak ras dahinna mangani, minem-mimen seh mabuk. La lit kekelengen bas ia ras tempatkenna dirina jadi tuan nandangi temanna, padahal ia sendiri pe posisina juak-juak nge.
3. Pentar (bijaksana). Kepentaren e rehna i bas hubungen si mehuli ras Dibata, kerembakenta ras kepatuhenta man Tuhan. Kuan-kuanen 1:7 ngatakenca, “Bena-benana kepentaren e me kap erkemalangen ma Tuhan. Kepentaren e mabai kita ngasup mbedaken apai si mehuli, apai si lang, ras sidalanken si mehuli si ngena ateNa. Juak-juah si pentar e, dalankenna tetap tanggung jawabna, aminna lenga jelas dingan reh tuanna ndai.

Aplikasi

Tema i bas PJJ-nta nggeluh bujur maba kemalemen ate. Arah tema enda imotivasina kita, maka tetaplah kita nggeluh i bas kebujuren aminna me melala tantangen si man hadapen. Tidak disenangi, banci jadi ipalitken si jahat ka man banta. Tapi Tuhan Jesus mpetetap ukurta, nina, “Ketuahen me kam adi erkiteken kam ajar-ajarKu igombang-gombangi, ipesega-sega, rsd., ermengkah dingen meriahlah atendu, sabab enggo isikapken Dibata upahndu si mbelin i Surga.” Bage pe bas Masmur 34:20, kalak bujur mbue ngenanami kiniseran, tapi ipulahi Tuhan i bas kiniseranna nari. Kemalemen ate ibereken Tuhan i bas kita ngelakoken kebujuren. Bahkan seh ku kesusurenna iberkati Tuhan (Mas. 37:25).

Labo murah nggeluh bujur i bas mbue kinilabujuren terjadi (korupsi, sogok, kebohongan, mark up harga, rsd). I bas si e tetap kita ernalem man Tuhan gelah iberekenna kepentaren man banta. Ras arus tetap siinget, maka enggo ibereken Tuhan dahin man banta sekalak-sekalak guna kita jadi saksi Tuhan, sira ras terang, lebih kita mpertanggungjawabken dahin e man Tuhan labo hanya man pimpinenta seh ngayak Tuhan reh peduakaliken.