Bimbingen PJJ Tgl. 1 - 7 Februari 2015

BIMBINGEN PJJ TGL. 01 - 07 FEBRUARI 2015

(Pdt. Larena br. Sinuhadji)

Ogen :

Matius 18:15-20

Tema :

PERKUNJUNGEN RUMAH TANGGA

Tujun : Gelah ngawan ni perpulungen meteh maka :

1. PRT e me tanggungjawab kerina perpulungen

2. Erbahan perencanaan/pelaksanaan erbahan PRT

3. Ikut muat bagin i bas PRT

Bahan PJJ-ta ngerana kerna menasehati/mpersingeti teman sada kiniteken i bas ia ngelakoken kesalahen (TB: “Tentang menasehati sesama saudara,” BIS: “Kalau saudaramu berdosa”). Memang mberat tugasta e, sabab banci jadi erbahanca ia tersinggung. Tapi enda merupaken tanggung-jawabta selaku kalak si enggo ipersadaken Tuhan i teruh keleng ateNa (sada kula ni Kristus). Ras nasehat si ibahan Tuhan Jesus luar biasa. Si pemena lebe, dua-dua (empat mata) kita ras temanta ndai. Ertina, gelah banci lit keterbukaan, ras la ia ipermaluken bas jelma si nterem. Tujunna jelas, gelah mulihi kita ndatken temanta ndai (“engkau telah mendapatkannya kembali atau ia menjadi saudaramu kembali,” sabab  situasi enda sipediat, hubungenta pe la mehuli ras ia, bahkan la isedarina kesalahenna). Kehadirenta mpengasup ia menyadari kesalahenna ras jera dingen nuduhken perbahanen si mehuli tanda ia enggo ngaku salah.

Adi cara si pemena la berhasil, e maka baba temanta sekalak entah dua kalak sebage saksi. Rikutken si tersurat bas Pustaka si Badia: “Tep-tep pengadun enggo sah adi lit dua entah telu kalak saksi” (Ul 19:15).

Hal enda pe ilakoken labo dalam rangka menghakimi tapi tetap i bas keleng ate. Ertina, kehadiren piga-piga kalak teman banci saling tukar pikiren. Tapi adi cara enda pe la berhasil, maka kalak si ersalah ndai la banci memutar-baliken fakta, erkiteken enggo lit dua entah telu kalak saksi. Adi cara peduaken pe la berhasil e maka, baba ku perpulungen. Labo jelas i jenda ikataken apakah baba persoalen e ku kerina perpulungen entah perwakilen perpulungen si ibereken wewang khusus. I bas sejarah gereja, persoalen ibaba ku Majelis Jemaat sebage perwakilen perpulungen. Adi enda pe la berhasil maka anggap saja ia bali ras kalak perbegu entah pengalo cuke. Ertina, la nari ia ianggap sebage bagin i bas persekutuan kalak si tek. Sabab sebagai kalak Kristen biak Kristus nggeluh bas ia, nggit ipersingeti, menyadari kesalahen, terbuka, la egois rsd.

Ay. 18, ertina, kalak si erdosa si enggo ipersingeti perlu ipetetap ukurna, tapi la banci ipaksaken guna ia mengakui kesalahenna. Tapi konsekuensina, dosana semakin melekat ras iikat man bana, ras irakut ka i Surga. Tapi adi enggo iakuina kesalahenna, dosa-dosana la nari iperhitungken man bana, pengampunen e sah ras Dibata pe ngalemi salah dosana.

Kesimpulen arah ajaren si ibahan Tuhan Jesus e me kap membangun komunikasi man teman sada kiniteken dikenca lit persoalen, ula isiniken, ula mbenceng tapi ikomunikasiken. Usaha si nilakoken kita labo proses yuridis (secara hukum negara entah pe hukum positif/Undang-undang Negara) si mengarah ku bas vonis entah pe penghukumen, tapi usaha pastoral. Inspirasina e mekap kerna Bapa sebage Permakan si Mehuli, si tetap ndarami biri-biri si enggo lalar ras bene, ras ibabaNa ka mulih ku karangNa. La lit sura-sura Bapa, sekalak pe i bas anakNa si bene. E maka usaha guna banci ndatken temanta si enggo lalar tetap ibaba ku bas doa. I ja dua kalak saja sepakat, ersada ukur i bas ertoto, tentu ibereken Dibata kai si ipindoken kita.

Adi ngerana kita kerna PRT maka, tugas e :

1. Masuk i bas Bidang Koinonia
2. Tata Gereja Ps. 23 Tugas Panggilan PJJ ras Pengurus PJJ, bagin c. Melaksanakan PRT secara rutin.
3. GBP (Garis-garis Besar Pelayanen) 3.2.7.2. Perkunjungan Rumah Tangga. Konsep setiap Pt./Dk. menggembalakan 10 rumah tangga anggota jemaat.

Dahin PRT e me sada kesempaten si unik ras istimewa si la ibereken man kaum profesional si deban, i ja Serayan Tuhan (Pdt./Pt./Dk. ras perpulungen si lit talentana), banci katawari paksa pe reh ku rumah perpulungen. I antara kaum profesional, Pendeta ngenca ras Serayan si deban, i ja kerehenna ku rumah perpulungen la perlu undangen khusus. Janah perpulungen pe terbuka guna ngalo-ngalo Serayan si reh. Berbeda ras dokter entah Psikiater/Psikolog, i ja uga kelekna pe keadaan pasien, adi la itenahken la banci ia reh. Tapi kita, banci katawari pe reh ku rumah anggota perpulungenta. Enda sada kesempaten emas guna kita banci membagun kedekatan, komunikasi ras anggota perpulungenta.

I bas teks perikop memang perkunjungenta jelas, erkiteken lit kesalahen si ilakoken temanta ndai. Tapi dahin PRT enda banci siperluas i ja kita ndahi temanta si enggo ndekah la pernah ku gereja, lit persoalen si turah entah masalah keluarga, anak, ekonomi/pekerjaan, dahin pelayanen, rsd.

Mari sitingkatken dahin PRT i bas gerejanta gelah reh teguhna kiniersadanta ras reh paguhna kinitekenta.