Bimbingen Khotbah Minggu 1 Maret 2015

BIMBINGEN KHOTBAH MINGGU 1 MARET 2015

Pdt. Larena br. Sinuhadji (Nd. Reynard Tarigan)

Passion III Reminiscere (Inget min Perkuah ateNdu o Tuhan)

Invocatio :

“Aku tetap nginget padanKu man bandu ras man kerina kesusurenndu ersundut-sundut janah perpadanen e tetap rasa lalap. Aku jadi Dibatandu ras jadi Dibata si nursurndu.” [Kejadin 17:7]

Ogen :

Kejadin 17:1-7, 15-16 (Responsoria)

Khotbah :

Markus 8:31-38 (Tunggal )

Tema :

TEKLAH NANDANGI PERKUAH ATE-NA

Perkuah ate  Tuhan tetap maler ku tengah-tengah kegeluhenta, mulai kin kita medak erpagi-pagi seh ngayak berngi ka. Bage seterusna. Perkuah ate Tuhan la nari perlu siraguken i bas kegeluhenta. Walaupe kadang tupung litna persoalen nderpa senembas banci ka turah kearun ateta ras keraguanta kerna pengkelengiNa kegeluhenta. Adi geluhNa pe iedeskenNa banta, tentu hal si deban pe turun tangan Ia guna nampati kita.

Iterangken Tuhan Jesus man kerina ajar-ajarNa kerna kiniseran si bakal ialamiNa. Ope denga si e, iawali alu sada dialog antara Jesus ras ajar-ajarNa kerna ise kin Jesus e (Ps. 8:27-) “… lit deba ngatakenca kam sekalak nabi si nai-nai nari, kam Johanes Pembaptis … Tapi isungkun Yesus Petrus, “menurutndu ise kin Aku enda?” … ijawab Petrus: Kam Mesias si nipadanken Dibata.” Luar biasa, payo kel penandai Petrus. Padahal situhuna pengangkan Petrus kerna Jesus e Mesias, lenga bo mendalam. I bas pengakapna, adi Jesus Mesias, berarti hebat, berkuasa, ngasup jadi pemimpin bangsa Israel si mulahi bangsa Israel i bas Romawi nari … sabab sedekah enda pe enggo icidahken Tuhan Yesus kuasaNa, mujijatNa. La bage menurut Jesus. Sabab kenca si e iterangken Jesus man ajar-ajarNa bahwa Anak Manusia entah pe Mesias la banci lang ngenanami kiniseran. Itulak pemimpin-pemimpin ras imam si mbelin (lit penolaken), ibunuh ras kenca 3 wari keke i bas simate nari. (Kerina kiniseranNa enda jelas kel iturikenna man ajar-ajarNa).

Kai respon Petrus? Iawinna Jesus jenari minter ipandangna tempa-tempa katakenna “Ula bage Kam ngerana, adi Mesias la layak ngenanami kiniseran.” Adi bas kitab Matius, perikop sejajarna, “Mbera-mbera ipedauh Dibata si e i bas Kam nari o Tuhan. Labo banci jadi e man bandu.” Seolah-olah bahasa Petrus enda menyejukkan, bahasa empati, peduli, tapi situhuna perkataan Petrus e ngambati, ngolangi Missi Dibata man Jesus, maka Ia arus ngenanami kiniseran guna nebusi dosa-dosa manusia. Erkusur Jesus, ipernehenNa ajar-ajarNa, janah irawaiNa Petrus, “Laweslah Iblis i bas Aku nari (genduari Petrus e sangana ikuasai Iblis). PerukurenNdu perukuren manusia kap, la bali ras perukuren Dibata.”

E maka mulihi ipetergas Jesus Ise si atena menjadi pengikut Jesus arus ipersilahangna bana (menyangkal diri), ipersanna kayu persilangna (mau menderita), ikut-ikutna Aku (siusih Jesus, arah pudiNa kita) ras la sipertahanken kegeluhenta, adi ngasup kita bage terkelin kita, bahkan la Ia mela ngakuken kita asum reh denggo Ia peduakaliken, alu kemulian Dibata. Adi siban baganna, e me kap perukuren manusia ras perukuren Dibata.

Adi perukuren manusia (maunya senang-senang, nikmat, si penting hasil, la persoalen man bana entah bas prosesna ilakokenna si la mehuli, la nggit susah, la nggit berkorban tapi ngkorbanken kalak si deban, bahkan la akapna dalih, ‘dayakenna’ pe kinitekenna, tadingkenna Jesus guna jabaten, kinibayaken, pangkat, rsd.), tapi kai resikona? Bene kegeluhenna, la iakuken Jesus sebage anakNa. Sedangken,  perukuren Dibata (mau menderita, berjuang, lebih mengutamakan proses labo hasil, pikul salib, mpersilahang bana, no gain without pain, kita semakin kecil Jesus semakin ditinggikan, nggit erkorban guna kebenaren, la mela ngakuken Jesus selaku Tuhan ras Juruselamat, tetap ncidahken kemuliaan Tuhan i bas kerina dampar geluhna), ulihna kita terkelin, iakuken Jesus jadi anakNa, sialoken kegeluhen si rasa lalap.

Telu hal si ipindoken Jesus selaku kita pengikutNa:

1. Mpersilahang bana (menyangkal diri). Berarti la pelebeken egonta, la sipelebeken sura-suranta tapi sura-sura Dibata. Menyangkal diri berarti merendahkan hati kita. Menyangkal diri berarti melepaskan apa yang kita anggap senang demi Kristus. Sura-suranta, adi kalak jahat banta terjahaten ka sibalas, tapi menyangkal diri sibalas kejahaten alu keleng ate, bahkan sitotoken ka jelmana.
2. Mersan kayu Persilang. Kata si ipake present continous tense, berarti i bas kita mersan kayu persilangta labo hanya sesekali entah pe musimen tapi setiap saat, setiap waktu seh maranatha. Salib labo perlu ihindari tapi ihadapi, ipersan. Engkai? Pemena, salib e me kap sekolah favorit guna kita membangun ras membentuk karakterta sekaligus mateken kiniganjangen ukurta, keogoisenta. Peduaken, i bas kita mersan kayu persilangta, berarti siergai salib si enggo leben ipersan Kristus. La hanya silumbaken Kata Dibata kerna Salib Kristus, si erbahnca terharu bahkan ngandungen perpulungen e tapi arus ka kita muat bagin i bas kiniseranNa. Paulus i bas Pilipi 1:29 ngatakenca, “Dibata enggo mereken kesempaten man bandu guna erdahin man Kristus, labo saja gelah kam tek man Kristus, tapi pe gelah kam ngenanami kiniseran guna Ia.” Peteluken, memikul salib setiap hari merupakan investasi untuk menuai di kemudian hari. Yesus dimuliakan karena Ia telah menderita. Sehingga penderitaan karena Kristus akan menuai kemuliaan dariNya, sebagaimana dikatakan Paulus dalam Roma 8:17, “Dan jika kita adalah anak, maka kita juga adalah ahli waris, maksudnya orang-orang yang berhak menerima janji-janji Allah, yang akan menerimanya bersama-sama dengan Kristus, yaitu jika kita menderita bersama-sama dengan Dia, supaya kita juga dipermuliakan bersama-sama dengan Dia.”
3. Ngikut Yesus, ertina siteladani Tuhan Yesus i bas kegeluhenta tep-tep wari.

Perkuah ate Tuhan enggo sialoken i bas kegeluhenta tep-tep wari, janah si mbelinna kel i bas Ia nggit nebusi dosa-dosanta. I bas bahan ogen, tole ipetangkas Tuhan maka Dibata enggo erpadan maka Ia jadi Dibata Abraham ras jadi Dibata sinusurna termasuk kita ibas-sa. Padan Tuhan ya ras amin, kai si enggo ibelaskenNa, pasti tetap isehkenNa. Perkuah ateNa la perlu nari siraguken. Beda ras manusia, banci la nari ingetna ras dalankenna padan si enggo ibelaskenna man Tuhan bage pe man manusia. Perkuh ate Tuhanlah si erbahanca megeggeng kita i bas ndalani wari-wari kegelunta, e maka tetaplah man Tuhan kita ernalem.