Bimbingen Khotbah Minggu 8 Februari 2015

BIMBINGEN KHOTBAH MINGGU 8 JANUARI 2015

Pdt. Larena br. Sinuhadji (Nd. Reynard Tarigan)

Invocatio :

“Tuhan kap baginku emaka man baNa ngenca aku erpengarapen” (Perngandungen 3:24)

Ogen :

1 Korinti 9:16-23 (Tunggal)

Khotbah :

Jesaya 40:21-23 (Anthiponal)

Tema :

ERNALEMLAH KEMPAK DIBATA SAJA

PEMBAHASEN BAHAN PUSTAKA SI BADIA

BAHAN KHOTBAHTA, Jesaya 40:21-23 bagin i bas Deutero Jesaya (Ps.40-55) e me kap tupung bangsa Israel iambeken ku taneh Babel, si la banci lang erbahanca bene/labuh pengarapen bangsa e. Secara khusus bahanta la banci terlepas i bas keseluruhen perikop Jesaya 40:12-31 si ibere judul “Dibata Israel la lit tandingenna” (Allah di atas semua Allah). Kerina isi e me kap kerna penungkunen retoris (tidak perlu jawaban), si enggo pasti kerina jawabna Dibata.

I bas kiniseran sialami bangsa Israel, labo kepeken erbahanca bangsa enda introspeksi diri ras ngerembaken diri ras Tuhan, malah kebalikenna tek ras mindo penampat man kuasa-kuasa si deban, subuk gana-gana buaten manusia (ay. 18), kuasa raja-raja doni (ay. 23, si mengandalken kinibayaken, kuasa ras kekuaten armada perang). Bintang-bintang pe iteruh kuasa Tuhan, sabab Tuhan si nepasa (ay. 26). Enterem bangsa e si tek nandangi rasi bintang, maka lit kekuaten i bas rasi perbintangen (sukses/gagalnya usaha, hari baik guna ngelakoken sada-sada hal, rsd). Kedungenna, jungut-jungut bangsa enda tempa-tempa la iidah Tuhan kiniseranna (ay. 27). Tapi Jesaya mereken pengarapen, pengapul, gegeh, alu piga-piga penungkunen retoris ras pernyataan.

“Tidakkah kamu tahu, tidakkah kamu dengar, tidakkah diberitahukan kepadamu dari mulanya bahwa Allah pencipta langit bumi dan segala isinya … termasuk pembesar-pembesar, raja-raja, hakim-hakim?” Penungkunen enda ngingetken si lupa, maka gelgel nari enggo ieteh, ituriken maka Tuhan Dibata kap si nepa doni enda. Manusia si idoni enda desken labang ngenca akapna. Banci jadi ka pengangkan si bage lenga bo berurat berakar kel bas bangsa enda, terjeng ietehna tapi la iaminkenna.

Kuasa-kuasa raja doni enda idabuhken ras ipekitik Tuhan. Alu bage jelas Tuhan ngenca si mada kuasa, man baNa saja kita ernalem. Engai maka enggo tempa ragu-ragu bangsa Israel nandangi Dibata, la nari tek nandangi Tuhan, tapi lebih ernalem man dibata-dibata si deban, kuasa-kuasa si deban? Erkiteken pengenalen kerna Dibata dangkal, la lit pengalamenna erDibata, terjeng teori ngenca, e maka la paguh kinitekenna.

BAHAN PENGOGENTA, 1 Korinti 9:16-23, Paulus nggejapken maka dahin meritaken Berita si Meriah e me kap tanggung jawab si ibereken Dibata man baNa, e maka  labo ia ngarapken upah. Walau pe  i bas penjelasen suratna nandangi perpulungen Korinti, maka si erdahin i bas Rumah Pertoton ngaloken pangan i bas Rumah Pertoton e nari. Ras pe enggo itetapken Tuhan, maka kalak si meritaken Berita si Meriah ngaloken keperlun geluhna i bas dahinna e nari (ay. 13-14). Tapi labo e ituntut Paulus. Tapi tanggung jawab i bas melayani e nge si lebih ifokusken Paulus. Bahkan metode si ibahan Paulus e me kap “menyesuaikan diri” ras kalak si man layanenna (Jahudi, Non-Jahudi, si merampek kinitekenna), dalanna masuk guna banci nelamken kalak si ilayanina.

BAHAN INVOCATIOTA, e me pertoton bangsa Israel i bas pembuangen Babel maka man Tuhan saja ia erpengarapen. Aminna pe bangsa enda iukum Tuhan tapi beliden denga keleng ate Tuhan. E maka tek nabi si nulisken surat enda, maka lenga bo keri keleng ate Tuhan, perkuah ateNa tetap nge lit.

RELEVANSI

Tema Minggu enda “Ernalemlah kempak Dibata saja,” merupaken penjemba tole man perpulungen guna tetap erpengendes man Tuhan amin kai pe si terjadi.

Kiniseran, perbeben e me ayam-ayam i bas kegeluhenta, si paling penting fokus kita nandangi kuasa Tuhan si la ersibar asangken fokus kita nandangi persoalen sialami. Ertina, adi lebih fokus kita nandangi persoalenta, banci si kitik e pe jadi mbelin, buntu pikirenta, la erlayas ukurta. Tapi adi tetap kita ernalem man baNa, pebuai ertoto, rende, bersyukur walau pe i bas perbeben si nderpa, lit semangat, gegeh, kesabaren bahkan solusi i bas kita ngalaken perbebenta.