Bimbingen Khotbah Minggu 22 Februari 2015

BIMBINGEN KHOTBAH MINGGU 22 FEBRUARI 2015

Pdt. Larena br. Sinuhadji (Nd. Reynard Tarigan)

Introitus :

“Marilah kam si latih janah beraten, maka Kubereken pengadin-ngadinndu” (Matius 11:28)

Ogen :

Markus 1:9-15 (Tunggal)

Khotbah :

Masmur 25:1-10 (Responsoria)

Tema :

ERLEBUHLAH MAN JESUS

Penjelasen Bahan Pustaka Si Badia

I bas bahan khotbahta, Masmur 25, e me pertoton Daud mindo gelah itegu-tegu dingen ikawali Dibata (Ind. Doa mohon ampun dan perlindungan). Pengendesen diri Daud man Tuhan erkiteken ancaman-ancaman si alamina, kiniseranna ras kesadarenna kerna dosa-dosa si lakokenna. Piga-piga tafsiren ngatakenca, maka latar belakang perikop enda e me kerna pengkhianaten anakna Absalom (2 Sam. 16:15, i ja Absalom erusaha guna nggulingken kerajaan Daud ras nggatiken keduduken bapana alu dalan si la mehuli). Tuhu-tuhu mberat kel persoalen si ialami Daud. Tapi Daud tetap nggeluh erkiniteken man Tuhan, janah ijenda banci siidah :

Si pemena, Daud ertoto ras ernalem man Tuhan (ay. 1, 2), Daud erpengarapen man Tuhan (ay. 3 menantikan Engkau). Daud menanti-nantikan Tuhan, dengan pengharapan janji Tuhan pasti digenapi. Kata “menatikan” lit 3 kali bas perikop (ay. 3,5,21). Penting kel man Daud, hubungen, relasi, keintimen ras Dibata, terlebih la atena ia bertindak sendiri tapi itimaina Tuhan si nampati.

Si peduaken, ay. 4. Ipindoken Daud gelah Tuhan si ngajari ia kerna peraten Tuhan, gelah tangkas kai si arus idalankenna. La ia mindo petunjuk man kalak si beluh, penasehat kerajaan, tapi ernalem man Dibata, gelah tetap ia banci erdalan i bas kebenaren Tuhan (bdk. Absalom si mindo petunjuk man Ahitopel gelah Absalom mpedemi gundik bapana 2 Sam. 16:21).

Si peteluken, ay 6-8. Alu meteruk ukur, Daud mindo pengalami dosa i bas Dibata nari, gelah ula iinget Dibata kelepaken tupung ia nguda denga. Jelas, labo iagahkenken Daud kekuasaan ras kehebatenna sebage raja, tapi perkuah ate Tuhan si banci nasapken salah dosana.

Si peempatken. Tek Daud nandangi padan Tuhan. Janji Tuhan, maka man kerina kalak si patuh kempak Tuhan dingen ngikutken peratenNa, itegu-tegu Tuhan alu tutus ras dem keleng ate. Janah padan Tuhan enda me si mpetetap ukur Pemasmur ernalem man Tuhan, maka janji Tuhan ya dan amin. Keleng ate Tuhan tetap seh rasa lalap.

I bas pengogen I (Markus 1:9-15), ngerana kerna masa awal pelayanen Tuhan Jesus si itandai alu Jesus iperidiken Johanes i lau Jordan ras Jesus icubai i taneh mesawang. Penjelasen i bas kitab Injil Markus cukup singkat ibandingken kitab Matius. Pembaptisen Jesus sada peneguhen, maka Ia anak Dibata si la erdosa, si niutus Dibata ku doni enda jadi seri ras mananusia guna nebusi dosa-dosa manusia (bdk. ay. 4-5, khotbah Johanes i taneh mesawang, gelah si megi-megi khotbahna jera i bas dosa-dosa nari ras iperidiken). Bage pe i bas percubaan si alamiNa i taneh mesawang, i bas Ia ibabai Kesah siBadia, Jesus icubai si Iblis. Tapi Jesus tetap ernalem man Tuhan, idalankenNa peraten Dibata si enggo nuruh Ia, seh makana la ielakenna percubaan e. Alu taat dingen penampat malekat-malekat Jesus menang naluken percuban e. Kemenangen Jesus i bas ngalaken erbage-bage percuban merupaken jaminen man banta kalak si tek si tetap ernalem ras erpengarapen man baNa, maka kita pe menang ngalaken erbage-bage percuban.

Walau pe enggo ibegina, Johanes peridiken enggo ipenjaraken, labo erbahanca Jesus gentar guna tetap ber-misi nehken Berita si Meriah si rehna i bas Dibata nari, maka Kinirajan Dibata enggo seh ras teklah nandangi Berita si Meriah.

I bas bahan invocatio (Matius 11:28), undangen Tuhan man banta, si latih dingen beraten erkiteken erbage-bage persoalen si alami kita gelah tetap ernalem man Tuhan, bahan Tuhan jadi ingan pengadin-ngadinta. Datang kepada Tuhan dan Tuhan akan memberikan kelegaan kepada kita.

Perenungen

Perbeben, tantangen, percuban ialami manusia. Bahkan Jesus sendiri pe ngenanami percuban, i ja Ia icubai Iblis.

Pengendesenta tetap man Tuhan. Manusia sekali pe lit kuasa ras pemetehna, enggo pasti terbatas kuasa ras kekelengenna. Usih Pemasmur, ernalem tetap ia man Tuhan. ItimaiNa pertolongen Tuhan alu dem pengarapen. Ras mindo pengalemi dosa i bas Dibata nari. I bas si e tek ia nandangi pertolongen Tuhan dingen penegu-negu Tuhan i bas kegeluhenna (lihat penjelasen bahan kotbah). Bage pe i bas bahan khotbah, Jesus enggo mpeteruk diriNa seri ras manusia janah Ia pe icubai, menang Ia ngalaken percuban erkiteken ketaatenNa man Bapa si enggo mengutus Ia. Lawan Iblis, lawan kuasa kegelapen, alaken kerina percuban, tantangen, ula kiam i bas persoalen, tapi hadapi alu gegeh Tuhan si erkuasa nampati kita.

Tambahen Arah Pt./Dk. nari:

Pt. Nd. Billy br. Ginting : Kalak si tutus pe ngenanami perbeben tapi tetap pengendesennta man Tuhan. Absalom mindo nasehat man manusia si menjerumusken ia. Siperdiateken temanta sharing. Tapi adi  man Tuhan, la pernah ia membeberken rahasianta. Adi ras manusia banci jadi sada paksa waktu tupung lit persoalenta banci ibeberkenna. Erlebuhlah tetap man Jesus tupung lit persoalenta.