Bimbingen PJJ Tgl. 15 - 21 Februari 2015

BIMBINGEN PJJ TGL. 15 - 21 FEBRUARI 2015

(Pdt. Larena br. Sinuhadji)

Ogen :

1 Timotius 4: 13-16

Tema :

NGIAH-NGIAHI ALU TUTUS

Tujun :

Gelah ngawan ni perpulungen :

1. “Mengevaluasi” dahin Perkunjungen Rumah Tangga

2. Tetap ngiah-ngiahi i itengah-tengah perpulungen

Bena Kata

Bahan PJJ si peduaken i bas tahun enda enggo kita ipersingeti kerna dahin Perkunjungen Rumah Tangga (PRT). Maka dahin e seh kel pentingna, labo hanya man Serayan Tuhan tapi pe ikut perpulungen Tuhan, gelah semakin meningkatken kiniteken ras mpepaguhi kiniersadan i bas perpulungen. Kedekaten ras jemaat labo hanya kulit luar tapi banci sada ras si debanna banci dekat/ndeher. Guna tetap dahin enda itingkatken, maka i bas bahan PJJ sekali enda ngerana kita kerna ngiah-ngiahi alu tutus.

Penjelasen Bahan PJJ

1 Timotius 4:13-16, e me surat Paulus si pemena man Timotius, ncakapken 3 hal penting. Si pemena, pertenget kerna ajaren sesat si bengket ku perpulungen. Si peduaken, nasehat Paulus uga Timotius si nguda denga ngaturken perpulungen ras si peteluken uga arusna Timotius sebage pelayan Tuhan i bas nehken tanggungjawabna alu mehuli.

Ilumbaken maka Timotius tetap makeken kesempaten si lit guna ngogeken Pustaka si Badia man perpulungen ras iah-iahi dingen ajari perpulungen (i bas Alkitab BIS: “Sementara itu, sampai saya datang nanti, engkau harus bersungguh-sungguh membacakan Alkitab kepada orang-orang, dan mendorong serta mengajar mereka”). Adi sibandingken bas tradisi jemaat mula-mula, maka kesempaten si lit i bas Rasul-rasul guna pulung ras perpulungen, tuhu-tuhu ipergunaken perpulungen alu tutus megiken pengajaren Rasul-rasul (Perb. Rasul 2:42).

Pentingna Pustaka si Badia, ioge ras ipelajari gelah ertambah-tambah pengangkan perpulungen kerna Kata Dibata ras peraten Dibata. Rasul Paulus sendiri pe ngatakenca, maka kerina si tersurat i bas Pustaka si Badia erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli (2 Tim. 3:16).

Ertina, pulung ras perpulungen dingen erlajar kerna Kata Dibata e me kap palas si nteguh i bas ngelawan ajaren-ajaren si sesat. Kiniteken perpulungun reh paguhna ras kiniersadan i bas perpulungen kuat.

Secara khusus i jenda, siiah-iahen (saling mendorong). Persinget Rasul Paulus enda, seri ras persinget i bas kitab Heber nandangi perpulungen si kisat reh ku perpulungen, “Ola la kita reh ku perpulungen, bagi si ibahan piga-piga seninanta. Tapi lebih asa si e, siiah-iahenlah kita sabab sieteh wari Tuhan reh me” (Heber 10:25).

Ola sia-siaken pemere Dibata si enggo ibereken tapi tetap ipergunaken. Inget nubuat nabi-nabi ras asum pertua-pertua nangkuhken Timotius. Si e kerina mpegara komintmenta untuk tetap setia melayani. Dahin pelayanen e alu tutus idahiken, ola setengah hati entah pe “gelah me enggo.” Jagai dirina ras pengajarenna. Salaku Serayan Tuhan, Timotius lebe arus paguh kinitekenna, gelah ia mampu ngajarken si benar nandangi perpulungen.

Aplikasi

Tri-tugas Gereja, e me kap bersekutu, melayani ras bersaksi. Banci jadi i bas tugas e, kurang tanggung jawab perpulungen subuk i bas bersekutu (kurang kehadiren i bas Kebaktin Minggu, PJJ, PA Kategorial) ras melayani (intern perpulungen). Tanggung jawab si e si arus sipersingeti man perpulungen, alu kita ngiah-ngiahi, mpersingeti, nungkuni ras notokenca. Erbage-bage alasen maka kurang kehadiren perpulungen, bahkan lit deba enggo nahuni la reh. Lit deba kesibuken, ranak kitik, kisat, kecewa/sakit hati, lit perbeben, rsd. Si e me tugasta, tugas perpulungen guna mpersingetisa ras mereken jalan keluar. Erbage-bage cara banci si bahan e me melalui SMS, BBM, WA, entah pe ertelepon ras reh ku rumah guna nungkuni kabar ras ngajuk perpulungen guna banci hadir i bas kegiaten si enggo iaturken. Banci jadi pe i bas perjumpanta, nggit ia terbuka guna nuriken sebabna la ia reh. Arah si e me banci kita mereken pergegeh ras jalan keluar. Sabab lit deba perpulungen, perban enggo ndekahna la pernah muncul, maka enggo sungkan, mela, padahal enggo lit ketedehen atena guna reh. E maka alu saling mendorong, siah-iahen siarapeken tutus perpulungen ikut muat bagin i bas kegiaten si enggo iaturken ras kinitekenna pe reh paguhna i bas ngalaken erbage-bage tantangen si reh.

Perlu siperdiateken Tata Gerejanta kerna Disiplin Gereja pasal 5 kerna ibadah:

1. Jika ada anggota jemaat yang tidak menaruh minat untuk mengikuti ibadah-ibadah yang diselenggarakan Majelis Jemaat, maka yang bersangkutan wajib diingatkan dan didorong oleh Majelis Jemaat.
2. Jika yang bersangkutan tidak berobah (bertobat) dalam kurun waktu 1 (satu) tahun, maka dikenakan penggembalaan khusus.

Aturen enda, labo gelah kita mpedarat perpulungen, tapi siinget secara khusus tanggungjawabta guna tetap nehken kekelengen ras mpersingeti perpulungen. Sievaluasi dahin PRT-ta ras sitingkatken gelah raduken ras perpulungen tutus kita guna ngiah-ngihi perpulungen.

Tambahen Arah Pt./Dk. nari :

Pt. Bp. Klaudia Tarigan : Konteks si berbeda i bas jaman Timotius tapi tetap relevan guna ngiah-ngiahi.

Dk. Em. Bp. Santa Tarigan : sistem kepkepen siarus itingkatken.