Bimbingen PA Kategorial Tgl. 22 - 28 Februari 2015

BIMBINGEN PA MORIA TGL. 22 - 28 FEBRUARI 2015

(Pdt. Larena br. Sinuhadji)

PA HDS I :

“Iangkandu kin kai tujunna si Kubahan man bandu enda ndai?”

Tema :

JESUS MURIHI NAHE AJAR-AJAR-NA

Si Man Ogen :

Johanes 13:1-17

Metode PA :

Diskusi

Judul i bas perikop enda: “Yesus membasuh kaki murid-muridNya” (Jesus murihi nahe ajar-ajarNa). Iputarbaliken Jesus konsep si sedekah enda enggo mendarah daging bas diri ajar-ajar maka murid nge si melayani guru-guruna. Tapi i jenda, Jesus si melayani ajar-ajar arah IA murihi nahe ajar-ajarNa.

Konteksna paksa si e persiapen guna perayaan Paskah (bebasna bangsa Israel i bas Mesir nari). Jesus ras ajar-ajarNa sangana man ras-ras, janah IA sendiri enggo tehNa maka la nai nari ndekah waktuNa i doni enda. Janah ietehNa ka maka Iblis enggo erdahin i bas ukur Judas Iskariot guna ndayaken Jesus. Secara manusia tuhu-tuhu mberat kel perbeben si arus ialami Jesus, penderitaan, perpisahen ras ajar-ajar sekaligus penghianaten i bas sekalak ajar-ajarNa. Banci jadi adi kita si ngalamisa, fokus kita nandangi kiniseranta, minta dikasihani rsd. Tapi la bage Jesus. Ialaken Jesus erkiteken kekelengenNa si mbelin man manusia, man ajar-ajarNa. Keleng kel ate Jesus nandangi teman-temanNa i doni enda ras tetap ateNa ncidahken kekelengen seh kedungenna (ay. 1b). Walaupe lit kuasa kai pe bas Ia si enggo ibereken Dibata man baNa, kuasa e ipakeNa guna nehken kekelengen. E maka lalap iukurkenNa hal-hal si mehuli si banci ka iusih ajar-ajarNa, gelah aminna pe la nari je Jesus, tetap banci ajar-ajarNa erbahan si mehuli ras geluhna ermakna man kalak si deban.

Iburihi Jesus nahe ajar-ajarNa, i ja dahin enda biasa ilakoken budak (hamba). Banci jadi tupung bengket kalak enda ku rumah guna perjamuan la lit i je tuan rumahna sekaligus budakna (bdk. Mark. 14:14-16, rumah si ipinjam). Sekalak pe bas ajar-ajaraNa la lit si erbahan inisitif guna murihi nahe si bengket ku rumah e. Banci jadi berkaiten ras harga diri, la nggit ianggap lebih rendah asangken si debanna. Jesus mengubah konsep bas diri ajar-ajarNa, kerna harga diri, kebesaren ras ise si mbelinna. Bagi pernyataanNa i bas Matius 20:26-28, “Tapi i bas kam labo bage. Ise atendu jadi si mbelinna, ia arus ngelai nandangi kam kerina; janah ise atendu jadi peminpin, ia arus jadi suruh-suruhenndu kerina. bagi Anak Manusia si isuruh Dibata, reh labo guna ielai tapi guna ngelai, janah iendeskenNa kesahNa guna nebusi nterem jelma.”

“Iangkandu kin tujunna si Kubahan man bandu enda ndai?” Enda penungkunen Jesus man ajar-ajarNa. Jelas ras tangkas nina Tuhan Jesus, maka IA si ikateken ajar-ajarNa Guru ras Tuhan pe, nggit murihi nahe ajar-ajarNa, maka patut nge ajar-ajar ngusih kai si enggo ilakoken Tuhan Jesus. Enggo ibahan Tuhan kai si man usihen gelah banci ka silakoken i bas kegeluhenta. Sabab jelas nina Tuhan Jesus, “Malem tuhu-tuhu atendu adi idalankenndu i bas geluhndu” (ay. 17). Labo terjeng ikotbahken, idiskusiken tapi silakoken i bas kegeluhenta i bas kita saling melayani, merendahkan hati sada ras si debanna.

Konsep dunia, kecendrungen manusia, ateta ilayani, ihargai, ihamati. Merasa senang, ras bangga kita ngaloken pelayanen si e i bas kalak nari. Tapi sekali enda Jesus nggo ngajarken kita sekaligus mereken teladan man banta guna kita banci leben (inisiatif e ibenaken i bas kita nari) melayani ras menghargai kalak si deban, alu la pandang status. Kepemimpinen si ilakoken Jesus e me servant-leadership (kepemimpinan menghamba). Makna guru ras Tuhan, itempatken Jesus labo sekedar status/jabaten saja tapi secara fungsional. Ula hanya usihen si enggo ibahan Jesus terjeng silakoken sebage peristiwa ritual liturgis belaka. Silakoken acara pembasuhen kaki i tengah-tengah perpulungenta nginget kerna kai si enggo ilakoken Jesus,  tapi i bas kegeluhen tep-tep wari tetap ka karakterta la berubah. Sicidahken sikap arogan, merasa diri sangat penting, sepele man kalak, menindas, kasar man kalak si lebih rendah asangken kita. Sikap melayani, menghargai, memulai sesuatu yang baik arus nggeluh bas dirinta, bahkan enggo menjadi gaya hidupta. Ula timai kalak si deban, benaken ibas dirinta.