Bimbingen Khotbah Minggu 15 Februari 2015

BIMBINGEN KHOTBAH MINGGU 15 FEBRUARI 2015

PASSION I

Estomihi (Jadi Man Bangku Lingling Kecion)

Pdt. Larena br. Sinuhadji (Nd. Reynard Tarigan)

Invocatio :

“Terang e ersinalsal i bas gelap nari janah la tertaluken gelap e terang ndai” (Johanes 1:5)

Ogen :

2 Raja-raja 2:1-12 (Tunggal)

Khotbah :

2 Korinti 4:3-6 (Tunggal)

Tema :

TERANG E ERSINALSAL I BAS KEGELAPEN

PENJELASEN BAHAN PUSTAKA SI BADIA

Bahan pengogenta, 2 Raja-raja 2:1-12 e me kerna Nabi Elia iangkat ku surga. Ope Elia iangkat ku surga, teridah i je kesetian Elisa sebage pengganti Elia ngikut-ngikut Elia tempa-tempa mbiar kel ia itadingken Elia (bdk., “Tupung jumpa ras rombongen nabi-nabi subuk i Betel, Jeriho, Lau Jordan ngatakenca man Elisa, “ietehndu kang maka ibuat Tuhan ateNa tuandu sendah ibas kam nari? Kueteh nina, Elisa. Tapi la padah sicakapken kerna si e.”).

Iikut-ikutna tetap Elia subuk ku Betel, Jeriho ras Lau Jordan walau pe enggo ikataken Elia, i jenda lebe kam sabab aku isuruh Tuhan ku Betel/Jeriho/Lau Jordan, tapi alu dem ketaaten ikatakenna man Elia maka erkiteken kepatuhenna man Tuhan si nggeluh ras man Elia, la atena nadingken Elia. Ibereken Elia kesempaten man Elisa mindo kai atena guna ibereken ope ia terangkat. E maka Elisa mindo gelah ibereken Elia sada bagin kuasana gelah banci ia nggantiken Elia. Walau pe nina Elia mesera tapi tetap banci adi iidah Elisa tupung Elia ibuat i bas ia nari. Ras memang terbukti, iidah Elisa kelawesen Elia siangkat alu sada gereta perang si ernala bagi api si irintak kuda si ernala-nala bagi api. Bas Elisa pe lit tanda-tanda sengget si banci ilakokenna.

I bas bahan khotbahta, 2 Korinti 4:3-6, iturikan maka lit kalak si la tek nandangi Berita si Meriah si ilumbaken Paulus. Tulakna Firman Tuhan labo erkiteken kepalsuan isi Firman Tuhan si iberitaken Paulus, tapi erkiteken la ia tek, dingen geluhna enggo ijola-joleken/ipepentang dibata palsu jaman enda. Ajaren-ajaren si sedekah enda mempengaruhi ia guna nggeluh i bas kegelapen. Kegelapen si mengikat/membelenggu seh makana la nari ipelepasna kalak si enggo jadi pengikutna ngidah terang si ersinalsal.

Tangkas iberitaken Paulus maka labo dirina si iberitakenna, tapi Jesus Kristus, selaku Tuhan, si enggo ngenanami kiniseran, mate ras keke i bas si mate nari guna nebusi dosa-dosa manusia. Kristus si enggo mereken keselamaten man manusia, gelah alu bage manusia la nari nggeluh i bas kegelapen tapi nggeluh i bas terang (merincuh rusur erbahan si mehuli, si ngena ate Tuhan). Dibata si ngatakenca, “Ersinalsallah terang i bas gelap nari.” Ertina, kegelapen e arus italuken alu terang Kristus si enggo nggeluh i bas dirinta. I bas kerembakenta ras Kristus, si erbahanca tetap terang e ersinalsa i bas pusuhta. Seh makana la nari kita ikut terbawa arus i bas perbahanen-perbahanen kegelapen bahkan ertanggung jawab guna nerangisa.

APLIKASI

Johanes 8:12 ngatakenca maka , “Aku kap terang doni. Ise ngikutken Aku, ialokenna me terang si mereken kegeluhen, janah la nai ia erdalan i bas gelap.” Ertina, selaku pengikut Tuhan Jesus enggo seharusna la nari  kita erdalan i bas kegelapen. Tugasta sebage kalak si tek, terlebih Serayan Tuhan meritaken Berita si Meriah labo hanya melalui kata-kata terlebih arah perbahanen si lebe ncidahken maka kita e me kap Injil pelimaken (surat Kristus) si banci ioge kalak si nterem si jumpa ras kita. Tadingkenlah biak-biak kegelapen si mekatep denga nggeluh bas kita aminna pe kita enggo pengikut Kristus.

Bagi pengalamen Elisa, maka itadingken Elia sebagin kuasana si erbahanca ngasup Elisa erbahan tanda-tanda sengget ka. Bas kita pengikut Jesus enggo ibereken Tuhan kuasaNa man banta sekaligus usihen si mehuli selaku kita anak-anakNa. Kita arus naluken kuasa si gelap, perukuren si gelap, perbahanen kegelapen si ngerimrim kegeluhenta i doni enda. Terang Jesus si seh ku pusuhta ergegeh kel nampati kita ngeretapken  kuasa/biak-biak kegelapen.

Piga-piga Tambahan Arah Pt./Dk. Nari :

Pt. Bp. Edu Tarigan : Terang ersinalsal i bas gelap. Kegelapen e me situasi si ialami kita. I bas dirinta lebe kita banci encidahken terang i bas ngalaken situasi “kegelapen.”

Dk. Bp. Bayu Sebayang : Kai si ilakoken kita si banci erbahanca malem ate kalak? Memotivasi, mpenahangi ukur kalak e me perbahanen terang.

Pt. Bp. Klaudia Tarigan : Aminna Paulus iserang, iraguken kerasulenna tetap ia mampu naksiken terang. Magem terang si lit bas kita, la erkinar kel, si erbahanca kita pe terbawa arus jaman, italuken kegelapen.