BIMBINGEN KHOTBAH PEKAN BERNGI SIPEPITUKEN

BIMBINGEN KHOTBAH PEKAN BERNGI SIPEPITUKEN

THEMA:KUBUAT BAGINKU SELAKU ARON DIBATA

Invocatio : Jesaya 6 : 8

Ogen : Johanes 21 : 15 – 18

Khotbah : Pilipi 1 : 20 – 26  

-          Pengantar

Labo si gejap nggo ka kita seh ibas berngi sipepituken ntah pe berngi/wari si terakhir ibas pekan penatalayanan ibas tahun 2017. Nggo enem wari kita ngerana masalah tugas ras tanggung jawab Aron Dibata guna erlajar ibas kemandirian ibas tahun enda janah arah pelajaren teologi e banci nambahi peranenna subuk ibas keluarga, gereja bagepe masyarakat, bangsa ras Negara.

Emakana ibas berngi si pepituken enda sebagai berngi si terakhir, ipersingeti ka kita mulihken ntah pe ipindo pengakun man kita kerina gelah banci nggit ras tutus jadi Aron Dibata. Erkiteken aminna kita nggo ngerana kuja-kuje tapi adi lalit kalak nggit jadi Aron Dibata me kai si cakapken kita sedekah enem wari enda nggo ka sea-sea, erkiteken tama ngenca bas ukur tapi lalit sidalankenca.

Berngi enda tema enda ibenaken arah bahannta ibas

-          Johanes 21 : 15-18

Bagin enda nuriken percakapan Tuhan Yesus ras Simon Petrus. Percakapan enda situhunna seh kal terkenalna, erkiteken ibas bagin enda, Tuhan Yesus adi siperdiateken bahan enda mindo penegasan Simon Petrus nandangi ketutusenna guna ngelai ntah pe ngkelengi Tuhan Yesus.

Adi siperdiateken lit telu kali Tuhan Yesus nungkun man simon Petrus “O Simon Petrus keleng kin Atendu aku”?

Ibas bagin si pemena eme ayat 15, melala kalak erpengakap penungkunen Yesus nandangi Simon Petrus bagin sipemena enda ertujun nungkun keleng ate Simon Petrus enda lebihen kin asangken ajar-ajar sideban ?

Tapi ibas pengaloi simon petrus, labo nggit bandingken kekelengenna ras kekelengen ajar-ajar sideban. Janah adi siperdiateken arah bahasa aslina, kepeken kata keleng siipake Yesus ras simon petrus berbeda, Yesus makekenca agape (Kasih Tuhan), simon petrus make kata philia (Kasih manusia).

Janah ibas bagin sipeduaken ibas ayat 16, bageka, Tuhan Yesus make kata Agape, simon Petrus make kata Philia.

Ibas bagin sipeteluken ibas ayat 17, Tuhan Yesus make kata Philia, tapi bas bagin sipeteluken enda simon Petrus jababsa arah pengakunna maka Dibata metehsa kerina ntah pe kemahakuasaan Tuhan.

Emakana arah bahan enda ngatakenca adi kita nggo ngaku guna jadi Aron Dibata, maka nggeluh ras mateta ipake guna mpermuliaken Tuhan. Jadi nggo lanai lit kebiaren.

Emakana ibas bahan khotbahta, ibas

-          Pilipi 1 : 20-26

Nuriken perkataan Rasul Paulus nandangi perpulungen i pilipi, ija, sieteh ibas paksa e, kemungkinen Rasul Paulus sangana ibas penjara. Tapi aminna pe ia bas penjara, ia tetap mereken pedah nandangi perpulungen i pilipi, khususna nuriken uga perubahan caranta rukur adi kita nggo jadi Aron Dibata situhu-tuhu :

1.      Labo lit kebiaren (ayat 20)

2.      Nggeluh eme guna Kristus (ayat 21)

3.      Mate eme sada keuntungen (ayat 21)

4.      Nggeluh ipake guna jadi kiniulin man kalak (ayat 22)

5.      Mate labo kebiaren erkiteken jumpa ras Kristus (ayat 23)

Hal-hal si enda me situhunna lit ibas dirinta adi kita nggo rembak ras Dibata ntah pe jadi Aron Dibata

-          Aplikasi

Emakana bagi invocationta ndai “Enda aku Tuhan, suruhlah aku”, kai nari kebiarennta guna jadi Aron Dibata si ngasup guna erlajar mandiri. Selamat erlajar mandiri janah selamat kita ngikuti Lakon persadan sibadianta.