BIMBINGEN KHOTBAH PEKAN BERNGI SIPELIMAKEN

BIMBINGEN KHOTBAH PEKAN BERNGI SIPELIMAKEN

THEMA:ARON DIBATA SI MUAT BAGIN IBAS PELAYANEN GEREJA

Invocatio : 1 Raja-Raja 19 : 21

Ogen : Keluaren 17: 8 – 16

Khotbah : 1 Korinti 3 : 5-9 

Pdt. Maria E br Sitepu 

-          Pengantar

Salah sada biak manusia si mesukah njumpaisa emekap biak rayo ayo, si erbahanca la seri pengidah nandangi kerina jelma. Manusia nggit kel mbeda bedakan sada hal ras hal sidebanna, perlakuanna pe berbeda nandangi sada jelma ku jelma sidebanna, tentuna enda kerina tergantung rasa suka/selera/se ide.

Contohna saja adi siperdiateken adi lawes kita ku pusat perbelanjaan, pasti agak berbeda pengalon man banta erkiteken uis /gaya penampilenta. Adi necis uista ermerek ka sepatuta pasti nterem si mperkuanken dingen nungkuni kita, tapina adi bajuta pe kobas kobas rikut ras selopta pe swallow rusur siperdiateken labo piga si mperkuankenca. Enda me salah sada tanda maka manusia tetap mbedaken manusia sideban erkiteken penampilenna. Tentuna adi lit biak sibagenda ibas gereja, maka mesera kel siakap guna muat bagin ibas pelayanen gereja. Sebab dahin pelayanen gereja e labo dahin si sada sisada. Tapi dahin e emekap dahin Dibata si harus idahiken manusia.

Hal sibagenda rupana kepeken pe terjadi nandangi perpulungen korinti, enterem jelma mbue erbagena, mbue pengidah matanan janah erbage  selerana si akhirna ikut menentuken carana erkiniteken. Piah dungna lanai kiniteken si iidah rasul Paulus ibas diri perpulungen tapi justru sikap favoritisme man pemimpin. Ayat 4 ikataken, aku arah Paulus, aku arah apolos. Sikap enda tentu nuduhken biak manusia si terpecah erkiteken kesukaan/selera/si iakapna meriah piah dungna lanai siangkaan perpulungen Korinti enda.Tentuna enda lanai sejalan ras lanai se ide ras tujun Dibata makeken manusia sebagai aron ibas peken anggur Dibata.

Emaka arah bahan renungenta ibas pekan enda ipersingeti isingetken Paulus mulihi, ise kin Paulus ras ise kin Apolos. Ayat 5 jelas, ia duana pelayan Dibata labo ia tuan. Labo ia si empu dahin e tapi Dibata. Ia hanya erdahin guna negu negu gelah erkiniteken siibaratken Paulus ibas ayat 6 selaku si nuansa ras si niramsa. Ertina Paulus sendiri menyadari maka dirina emekap hanya terjeng alat Dibata. Tentuna adi sipergermetken lit nge factor si erbahanca perpulungen mengidolakan pemimpin enda, janah tentu secara doni enda kerina inilai arah kinibeluhen pemimpin enda dahiken dahin enda, tapi ate Rasul Paulus emekap gelah ola e jadi persoalan si erbahanca terjadi perpecahen sebab ayat 5 tangkas, dahin e idahiken rikutken siibereken Tuhan man bana, janah ayat 8b ikataken maka sekalak sekalak ibereken Dibata upahna rikutken pendahinna ngatakensa maka labo lit bagin manusia guna menentuken penilaian kerna bekas pendahin rasul e, emaka labo pas adi manusia rubat erkiteken penilaianna nandangi dahin pemimpin.

Tole ipertegas paulus maka si nuansa ras si niramsa emekap aron Dibata si erdahin ras-ras, janah dahin e erkesinambungen. Ertina adi la isuanken kai si man siramen, adi isuan pe tapi la isiram kai si man peranin. Tentu dahin enda pe duana saling bekerjasama maka banci erhasil. Tapi ibas si e kerina tangkas kel isadari Pulus ibas ayat 6 ikatakenna maka Dibata si mpeturahsa, janah enda me si penting. Sebaba dahin e ipasu pasu Dibata nge maka banci jadi. Ate Paulus segelah perpulungen e lanai menganggap ise pe pentingen asa Dibata. Sebab dahin e lit pe erkiteken Dibata. Janah adi turah perubaten erkiteken dahin e tentu lanai ncidahken maka Dibata e penting ibas geluh manusia, lanai ncidahken maka Dibata nge si jadi idola manusia.  Harusna manusia ngasup erdahin ras- ras terlebih ibas ndahiken dahin Dibata, sebab tanpa kerja sama labo mungkin idatken kemenangen, adi siperdiateken pe ogenta kerna perang ras bangsa Amalek. Kemenangen e erkiteken Dibata si merekenca, janah alat Dibata emekap josia si memimpin perang,  Musa rikut pe Harun ras Hur. Aminna gia Musa si ngangkat tan tapi seri nge dahin e ras dahin Harun ras Hur si menopang tanna tapi ayat 15-16 jelas kel maka Dibata nge si mereken kemenangen e man Israel.

Ibas perdalanen pelayanen I tengah gereja pe rusur kel selera ta janah idolata si erbahanca kita lanai erkiniteken. Erkiteken sura suranta lanai siakap pas kalak si deban, erkiteken penilaianta nandangi kebeluhenta lanai siakap sikap adi ipasangken kita ras kalak si deban si la siakap cocok ibas ndahiken dahin e. rusur siakap kita si empu dahin e, emaka sulit siakap kerja sama ras kalak si deban. Si parahna kel siakap perpulungen e pelayanta janah kita tuanna. Tentu lanai sue ras siituriken Paulus janah lanai sue ras siisuraken Dibata. Harus maka siinget kita enda alat Dibata, janah kinibeluhen e pe Dibata mberekenca, hasilna pe kerina guna Dibata. Marilah erlajar kita guna banci sigejapken maka kalak si deban e pe aron Dibata, labo hanya kita, gelah ngasup kit ape ngergaken kinerja kalak sideban, lebih asa si e ngasup ka kita erdahin ras ras jadi sada aron Dibata