BIMBINGEN KHOTBAH PEKAN BERNGI SIPETELUKEN

BIMBINGEN KHOTBAH PEKAN BERNGI SIPETELUKEN

THEMA:ARON DIBATA SI NGGIT RAS TUTUS ERLAJAR MANDIRI

Invocatio : Masmur 111 : 10

Ogen : Johanes 3 : 1 – 10

Khotbah : Lukas 19 : 1-10 

Pdt. Maria E br Sitepu

-          Pengantar

Ibas 2 wari si nggo bentasi kita ibas pekan enda, titik beratna adi siperdiateken eme ibas inisiatif ntah pe kerelaan kita guna muat bagin ibas dahin Dibata bagepe ibas ndalanken sura-suraNa. Hal si enda tentuna ertujun gelah kita ngangkaisa kai kin situhunna tema tahun 2017 enda eme belajar mandiri.

Adi banci iartiken nina piga-piga ahli, belajar mandiri eme “Usaha individu untuk melakukan kegiatan belajar secara sendirian maupun dengan bantuan orang lain berdasarkan motivasinya sendiri untuk menguasai suatu materi dan atau kompetensi tertentu sehingga dapat digunakannya untuk memecahkan masalah”. Jadi istilah motivasi sendiri eme si pentingna ibas tahun enda. Erkiteken kita me Aron Dibata, siipake Dibata jadi perpanjangen tanganNa guna muji ras mpermuliaken gelarNa.

Emakana adi nggo sieteh uga kininggiten enda penting ibas ate erlajar mandiri, perlu ka sieteh ise dirinta. Sieteh kerina kita me Aron Dibata ibas doni enda. Adi ngerana kita masalah aron tentuna biasana adi aron la banci lang lit perlengkapenna. Emakana adi aron Dibata perlengkapanna selain kuasa Dibata tentuna pemahaman teologi sitik perlu, gelah labo terjeng ngatakenca “Aku Percaya Yesus” tapi banci si bereken pemahaman man kalak “engkai maka kita Percaya Yesus”

Emakana adi nggo sipahami masalah si e, harus nggo banci sadar uga pentingna erlajar mandiri (lit niatta) selaku kita Aron Dibata, janah erlajar enda perlu si jemak dua hal :

1.      Nggit

2.      Tutus

Uga kin kataken kalak si nggit erlajar ras tutus erlajar ?

Ibas bahan pengogennta

-          Johanes 3 : 1-10

Enda nuriken percakapan erkiteken kelahiran baru (bas pengertin kelahiran baru enda ertina makeken manusia si mbaru janah nadingken manusia si male) Tuhan Yesus ras Nikodemus. Tapi hal enda labo siakap perlu kal guna ipegendang, tapi si paling penting rikutken temanta ibas wari enda eme sosok nikodemus enda, ise kin nikodemus enda ?

Adi siperdiateken bahanta enda, ibas ayat 1, ikataken je nikodemus enda eme kalak Farisi ntah pe pemimpin agama Yahudi, ertina ngatakenca

1. Lit kalak Yahudi si tek Yesus eme mesias (konteks kitab Johanes siitujuken man enterem kalak Yahudi)
2. Ayat 10 nuriken uga perluna kita erlajar ntah pe ngangkai si e, erkiteken sekalak peminpin Yahudi pe la iangkana.
3. Kelahiran baru e labo terjeng nandangi umat  ntah pe perpulungen ngenca tapi man kerina kita subuk perpulungen bagepe serayan si lenga lahir baru ntah pe nadingken perbahanen si la ngena ate Dibata.

Janah ibas bagin selanjutna siidah uga nikodemus nalangi pusuhna guna ngangkaisa kai si maksudken Tuhan Yesus arah percakapanna ras Tuhan Yesus. Emakana banci kataken Nikodemus enda nggit erlajar ras Yesus. Tapi adi sipegermetken khususna adi siidah ka ayat 2 ija ikataken nikodemus enda ndahi Tuhan Yesus ibas berngi, enda situhunna banci ngatakenca kepeken kininggiten nikodemus enda labo iikuti alu ketutusen ia guna erlajar. Erkiteken adi kalak tutus bagi bahannta sipeduaken ibas :

-          Lukas 19 : 1-10

Adi lit cerita si cukup terkenal ntah pe itandai enterem kalak Kristen subuk anak-anak seh ku orang tua, cerita enda me salah sadana, erkiteken sosok zakheus ibas cerita enda eme sosok si memotivasi, engkai :

1. Kininggitenna jumpa ras Yesus aminna ia gendek.
2. Kerina cara ilakokenna gelah banci ngidah. Istilah ngidah e luar biasa ya. Labo jumpa tapi ngidah saja.
3. Ia rela mereken dirina ras keluargana guna jadi Aron Dibata.

Enda me gambaren nggit ras tutus, nggit enda biasana ipahami arah ukurta, tapi adi nggo nggit ras tutus ertina ukur ras perbahanen nggo sedalanen.

-          Aplikasi

Emakana ibas wari enda, salah sada syarat ibas erlajar terkhusus teologi enda, eme nggit ras tutus, ula terjeng teori ngenca tapi ibas praktekna lalit, erkiteken ibas ilmu teologi enda, praktek enda me si bukti kenca pemahamannta erkiteken teologi.

Emakana marilah kita jadi seperti zakheus si nggit bagepe tutus guna jadi aron Dibata.