Bimbingen PJJ Tgl. 19 - 25 April 2015

BIMBINGEN PJJ TGL. 19 - 25 APRIL 2015

(Pdt. Larena br. Sinuhadji)

Ogen :

Masmur 128:1-6

Tema :

JABU SI SEMPABU (HARMONIS)

Tujun :

Gelah ngawan ni perpulungen :

1. Meteh erti jabu si sempabu

2. Ngasup ncidahken jabu si sempabu i bas kegeluhenna

Penjelasen Bahan PJJ

Masmur 128 e me salah sada ende-enden ziarah si iendeken tupung bangsa Israel berkat ku Rumah Tuhan i Jerusalem. Nde-nden kerna pasu-pasu Tuhan man isi jabu. Sada ketedehen ate, kalak si berkat ersembah man Tuhan ku Jerusalem ndatken pasu-pasu i bas Tuhan nari i bas jabuna.

Inti entah pe kesimpulen i bas perikop enda e me sangap kalak si malang man Tuhan si nggeluh ngikutken kerina perentahNa (Bhs. Ind. : “Berbahagialah setiap orang yang takut akan TUHAN, yang hidup menurut jalan yang ditunjukkanNya”). Ayat enda iulihi sekali nari/ndatken tekanen sekali nari i bas ay. 4, “Bage me pasu-pasu Tuhan man kalak si malang man baNa” (Bhs. Ind. : “Sesungguhnya demikianlah akan diberkati orang laki-laki yang takut akan TUHAN”). Ertina kesangapen/kebahagian i bas jabu ibenaken i bas sekalak bapa/imam si malang man Tuhan, si nggeluh ngikutken perentah Tuhan. Dalan Tuhan si ikutken labo dalanta. Adi kita, kadang pintas, instan, cepat la nggit susah, labo siakap masalah la sentudu bagi si ngena ate Tuhan, si penting berhasil, sukses.

Kai saja dage kebahagian/kesangapen man kalak si malang man Tuhan/ulih kalak si nggeluh ngikutken perentah Tuhan. Piga-piga hal icidahken i jenda :

Ipanna me ulihna latih, sanggap nggeluh mehuli si kerajangenna (“Apabila engkau memakan hasil jerih payah tanganmu, berbahagialah engkau dan baiklah keadaanmu”). Ternikmati kita ulihta latih e ras tuhu-tuhu maba kinulin, maba kemalemen ate. Sabab lit ka kuan-kuanen ngatakenca, “seh sura-sura turah sinanggel.” Lit i je ungkapen pengataken bujur ras erlajar mencukupken diri arah ulihta latih, bekas Tuhan si merekenca. Seh makana tuhu-tuhu maba sukacita, maba kiniulin arah kai si enggo ibereken Tuhan i bas kinilatihenta erdahin. Adi bas Buku Bimbingen, melala jelma terjeng memiliki tapi la banci menikmati.

Ndeharana bali ras anggur si meramis i sekelewet mejana. Anggur e me sada buah si cukup penting i Israel. Sada inemen si ibutuhken dingen mereken keriahen. Bage me iarapken ndehara si tuhu-tuhu jadi penolong, mereken keriahen kempak perbulangen ras seisi jabu.

Anak-anakna bali ras tunas batang saitun. Buah saitun jadi pangan dingen minakna jadi tambar, minak penangkuhen man Imam, parfum, rsd. Ertina, anak-anakna tuhu-tuhu mereken kebahagiaan man keluarga sabab tuhu-tuhu erguna kehadirenna bas jabu e. Cawir metua, maka sempat siidah kempu-kempu.

Perenungen

Jabu si sempabu (harmonis), e me tema i bas PJJ-nta sekali enda. Janah memang e me sura-suranta tupung kita erjabu ras ipasu-pasu Tuhan. Labo lit bas kita si erjabu gelah rontang jabunta, walau pe bas perdalanenna jabu e lit ketidakbahagian, rayung bahkan sirang bas perjabun. Tapi sebage kalak si tek sura-suranta, pertotonta, jabu e me jabu si bahagia, si harmonis, si jadi berkat man sekelewetta. Janah enda ibenaken i bas bapa sebage imam i tengah-tengah keluarga. Labo berarti la lit i je peran ndehara. Sabab melala nge siidah, tutusen ndehara ras anak-anak erkemalangen man Tuhan asangken bapa e sendiri. Tapi Firman Tuhan menjamin, kebagiaan, kesangapen jadi si kerajangen keluarga adi sekalak bapa lebe benakenna erkemalangen man Tuhan ras ibabaina ka se isi jabuna guna ndalanken si ngena ate Tuhan.

Ndehara penjadi penolong, ndehara menjadi tiang doa i bas keluarga, si menyempurnaken kebahagiaan e. Anak-anak jadi berkat man keluarga. Arah perbahenna, prestasina, kinitekenna jadi tambar si periahken ukur man orang tua ras kalak si deban. Sabab melala gundari anak-anakta erbahanca gulut orang tuana, latih orang tuana. Penungkunenna, anak lebe mehamat man orang tua, entah orang tua lebe si ngkelengi anak ras ididikna anak na alu mehuli? Enggo pasti kita lebe mendidik anak-anakta alu mehuli, kita orang tuana jadi usihen si mehuli mabai anak-anakta erkemalangen man Tuhan. Anak memang keturunanta, tetapi sifatna, karakterna labo erkiteken ia kesusurenta (sedikit), tapi mbuen erkiteken usihna kita. E maka la banci lang, benaken kitik-kitik nari sibabai anak-anakta mehuli, karakter mehuli lit bas ia, mentalna tangguh. Bahkan, benaken bas bertin nari pe. Jujur, adil, disiplin, mehuli, ertanggungjawab, peduli, rsd. Si lebih penting i bas si e kerina, orang tua arus arus jadi teladan, usihen (children do what they see, anak-anak melakukan apa yang mereka lihat). Adi usur idahna hal-hal si la mehuli si ilakoken orang tuana, enggo pasti sedikit banyak anak-anakta meniru kai si ilakoken orang tuana.

Mari dage i bas enggo sehna Berita Si Meriah 125 tahun ku Kalak Karo, Mamre GBKP sebage bapa, sebage imam tuhu-tuhu ngasup jadi teladan guna erkemalangen man Tuhan, njemba keluarga tetap tutus ndalanken si ngena ate Tuhan, maka banci ka siidah perubahen si luar biasa man jabu-jabunta, ipasu-pasu Tuhan kita, subuk secara jasmani-rohani, anak-anak ndauh i bas pergaulan bebas, obat-obatan terlarang (judi, narkoba), ipasu-pasu Tuhan tole nari Gerejanta, si pasti secara kuantitas reh teremna si ku Gereja lebih 70% (la nari 40%, teremen denga Moria si ku Gereja) ras mabai secara kualitas jabunta jadi sira ras terang ku sekelewetta.