Bimbingen PJJ Tgl. 05 - 11 April 2015

BIMBINGEN PJJ  TGL. 05 - 11 APRIL 2015

(Sidang Sinode GBKP)

Pdt. Larena br. Sinuhadji (Nd. Reynard Tarigan)

Ogen :

Perbahanen Rasul 15:1-21

Tema :

NGGERUNGGUI DAHIN GEREJA RIKUTKEN SURA-SURA DIBATA

Tujun :

Gelah ngawan ni perpulungen :

1. Meteh erti Sidang Sinode GBKP

2. Notoken ras ndukung pelaksanaan Sidang Sinode GBKP

Penjelasen Bahan Pustaka Si Badia

Persidangen si pemena i Jerusalem ilitken erkiteken litna ajaren si berkembang kenca kalak non-Jahudi tek man Jesus maka adi kalak enda la isunatken la banci kalak enda terkelin. Pengajaren enda itentang Paulus ras Barnabas seh makana terjadi perjengilen si mesangat. Dungna ersada arih perpulungen guna mengutus Paulus, Barnabas ras piga-piga kalak anggota perpulungen berkat ku Jerusalem guna ncakapkenca man Rasul-rasul ras Pertua-pertua. Terjadi percakapen si alot kenca piga-piga kalak i bas kalak Farisi si enggo tek man Jesus ngatakenca maka si labo kalak Jahudi arus isunatken lebe ras ikutkenna Undang-undang Musa. Kenca si e me ersidang Rasul-rasul ras Pertua-pertua guna ncakapken persoalen e. Enggo pe ndekah persidangen e lalap lenga lit kesimpulenna. Kedungenna tedis Petrus, dingen alu berani ngataken kebenaren firman Tuhan, maka la erndobahen idah Dibata kalak Jahudi ras non-Jahudi, ras si kalak non-Jahudi pe iakui Dibata alu mereken Kesah si Badia man bana pe. Kita ras teman-temanta si non-Jahudi terkelin erkiteken lias ate Tuhan. E maka ula sicubai Dibata alu namaken beban si mberat man ajar-ajar si labo kalak Jahudi si nini-nininta pe nai la ngasup mersansa, nina Petrus. Bahkan melala ka tanda sengget terjadi i tengah-tengah perpulungen si labo kalak Jahudi. Ras Jakub pe ngerana maka ula min isusahi si labo kalak Jahudi si enggo erpengesdes man Dibata. Tapi ibahan surat man perpulungen gelah ola sempat ipanna pangan si la bersih si enggo ipersembahken man dibata-dibata palsu, ola pan dareh entah asuh-asuhen si mate la perbahan igeleh ras gelah ola erlagu la mehuli.

Perenungen

Si mada gereja e me kap Tuhan, e maka dahin kai pe si nirungguken i bas gereja termasuk bas gerejanta GBKP tetap arus ersukuten man Tuhan, gelah sura-suraNa tetap si erdalan. Lit piga-piga persidangen i bas gerejanta, e me kap Sidang Runggun, Sidang Klasis, ras Sidang Sinode. Janah gerejanta menganut sistem Presbiterial Sinodal.[1] Presbiter adalah orang-orang yang dituakan terdiri dari: Pendeta, Pertua dan Diaken. Tager GBKP Ps. 16 Ay. 4, "Para Presbiter bersidang di wilayah Jemaat, diperluas di wilayah Klasis, dan secara keseluruhan di Sinode di bawah pimpinan Roh Kudus dan Firman Tuhan."

I bas Tgl. 11-18 April 2015 GBKP ngelakoken persidangen Sinode XXXV. I bas Sidang Sinode enda ievaluasi pelayanen GBKP 5 tahun si enggo berjalan sekaligus rencana si bakal silakoken 5 tahun ke depan. I bas sidang enda pe ipelimbarui Tata Gerejanta, sekaligus itetapken GBP GBKP Periode 2015-2020 ras Pemilihen Moderamen GBKP Periode 2015-2020. E maka perlu kel kerina peserta sidang si hadir (utusen Runggun-runggun, utusen Klasis-klasis, Moderamen ras Kategorial Pusat) ersidang rikutken si ngena ate Tuhan. Ertina, amin terjadi perbedaan pendapat tetap kemulian Tuhan si arus iutamaken, pelebeken sura-sura Dibata. Ula min sempat terjadi kekacauan, perjengilen si erbahanca curna gelar Tuhan. Tujunta arah persidangen enda e me gelah GBKP ke depan lebih maju subuk secara kuantitas bage pe kualitas keimanenna ras tuhu-tuhu kehadirenna berdampak i bas bangsa enda. E maka sitotokenlah pelaksanaan Sidang Sinode enda gelah banci erdalan alu mehuli sue bagi si ngena ate Tuhan.

---

[1]    Asal kata Presbiterial (Presbutoros, Yunani) adalah tua-tua atau yang dituakan. Sinode (Sun: sama-sama. Hodos: berjalan) artinya berjalan bersama-sama. Presbiterial Sinodal, adalah, Presbiter mempunyai sikap hidup, pengakuan, visi dan missi yang sama untuk melakukan tugas pelayanan bersama-sama dan bersidang di bawah pimpinan Roh Kudus dan Firman Tuhan.