Bimbingen Khotbah Minggu 26 April 2015

BIMBINGEN KHOTBAH MINGGU 26 APRIL 2015

Jubilate : Ersuraklah

Pdt. Larena br. Sinuhadji (Nd. Reynard Tarigan)

Invocatio :

“Dage tangkas kal man banta maka kita enggo rembak ras Dibata erkiteken Jesus Kristus enggo engkorbanken diriNa seh mate; tentu terlebih-lebih pe kita terkelin i bas pernembeh ate Dibata nari arah Ia” (Roma 5:9)

Ogen :

Masmur 23 (Responsoria)

Khotbah :

Perbahanen Rasul 4:1-4 (Tunggal)

Tema :

KETERKELINEN KALAK SI TEK

Penjelasen Bahan Pustaka Si Badia

Bahan Khotbah (Perb. Rasul 4:1-4). Kitab Perbahanen Rasul ngerana kerna perdalinen Berita Si Meriah si terus berkembang kenca nusurna Kesah Si Badia (Perb. 2), si ibenaken i Jerusalem nari, Judea, Samaria seh ku kuta-kuta si deban bahkan seh ku ujung doni (Perb. 1:8). Kenca idemi Kesah Si Badia, ajar-ajar Tuhan Jesus la nari mbiar-mbiaren i bas meritaken Kata Dibata, malah kebalikenna semakin berani ras gencar. Walau pe malala ambaten, tapi tetap maju ajar-ajar Tuhan Jesus guna meritaken Kata Dibata (“Semakin dibabat semakin merambat”). Termasuk i bas perikop enda, erkiteken keberanian Petrus ras Johanes maka duana kalak enda itangkap ras itamaken bas penjara.

Latar bekalang peristiwa enda e me kap kenca ipepalem Petrus ras Johanes kalak si pangpangen i pintu gerbang Rumah Pertoton. Kerina kalak kemamangen, alu kuasa kai maka banci ipepalemna kalak enda ndai. I je me langsung alu sora si lantang ras dem keberanian ituriken Petrus ras Johanes kerna kuasa Tuhan Jesus Kristus si enggo mate ras keke i bas si mate nari (ay. 16, “Kuasa Jesus nge si erbahanca erdalan kalak si itandaindu enda. Kai si enggo idahndu enda ibahan erkiteken kiniteken i bas gelarNa; kiniteken i bas Jesus me si erbahanca ia malem bagi kerina kam ngidahsa”). Sanga Petrus ras Johanes ngerana denga reh piga-piga Imam ras Kepala Pengawal Rumah Pertoton, ras piga-piga kalak Saduki. Nembeh ate kalak enda sabab iajarken Rasul-rasul si dua e maka Jesus enggo keke i bas si mate nari, si nuduhkenca maka lit kekeken i bas si mate nari (bdk. Mat. 22:23, kalak Saduki ngatakenca maka manusia labo lit keke i bas si mate nari). Kedungenna itangkap ras ipenjaraken duanna kalak enda seh pagina. Si luar biasa, lit buah pengajaren duana Rasul ndai, enterem kalak si megi pengajaren e tek; teremna dilaki si enggo tek, seh makana teremna dilaki si enggo tek tambah jadi 5000 kalak (bdk. Ps. 2:41, lit 3000 kalak tambah ku perpulungen kalak si tek).

Bahan Ogen (Masmur 23). Masmur 23 e me kap sada pujian si iendeken Daud si ncidaken kekelengen Tuhan si luar biasa desken permakan nandangi biri-birina. Pengakun iman ras penggejapen Pemasmur maka Tuhan kap Permakanna, e maka la pernah ia kekurangen. Icukupi Permakan e kebutuhen biri-biriNa: mbal-mbal si meratah, lau si teneng pemalerna, mpelimbarui gegeh. Bahkan jumpa ras perbeben (erdalan arah kelbung si gelap), la mbiar ia jumpa cilaka sabab Tuhan tetap setia nemani, alu ciken ras kayan-kayanNa. Keyakinen Pemasmur, maka Tuhan tetap melias man anak-anakNa, keleng ateNa man anak-anakNa.

Perenungen

Minggu enda igelari Minggu Jubilate, e me Minggu Ersuraklah (bersorak-sorai). Salah sada respon kalak si enggo ngaloken kekelengen i bas Dibata nari, e me ersurak, ermeriah ukur. Ersurak labo terjeng alu sora si megang tapi ikut muat bagin i bas ersaksi kerna kuasa ras keleng ate Kristus si enggo sialoken. Bagi si nilakoken Johanes ras Petrus, ersaksi kerna kuasa Tuhan Jesus si mereken keterkelinen/keselamaten. La lit nari kebiaren ras kearun ate aminna pe berhadapen ras pemimpin-pemimpin agama Jahudi si la senang ras kai si ibahan kalak enda bahkan itamaken ka ku bas penjara, erkiteken kuasa Kesah Si Badia tetap nemani ajar-ajar e (bdk. Perb. 1:8, “Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda”). Semangat ber-PI arus nggeluh bas kita, subuk alu kata, perbahanen, ras talenta si lit bas kita. Bersyukur man Tuhan GBKP merayaken sehna Berita Si Meriah ku kalak Karo i bas Tgl. 18 April 2015, Jubelium 125 tahun. Lit kalak si nggit ngkorbanken waktu, tenaga, materi, nandingken negarana, daerah asal, keluarga, berkorban perasaan, guna banci naksiken kuasa ras kekelengen Jesus Kristus man kalak Karo. Bujur ninta man Zending Belanda nari ras piga-piga hamba Tuhan i bas Minahasa nari. I bas enggo 125 tahun sehna berita si meriah, kai si enggo ibahan GBKP, subuk secara pribadi bage pe kelembagaan gerejanta? Si banci si idah kita lebe, GBKP enggo pajek i hampir kerina wilayah Indonesia, GBKP berperan aktif i bas kegiaten sosial, diakonia i bas kejadian-kejadian i negaranta, membangun ekonomi rakyat alu BPR ras CU-CUM, peduli ras kalak si butuh isampati alu litna YKPC Alfa Omega, PAK Gelora Kasih, YAPOS, rsd.

Secara kuantitas memang reh teremna kalak jadi anggota GBKP. Tapi jujur kita i bas sehna Berita Si Meriah 125 tahun, melala denga si arus man pesikapenken, khususna selaku kita hamba-hamba Tuhan, pemimpin si jadi usihen man perpulungen. Biak/karakter pelayan melala si arus man perubahenken, umpamana i bas kiniteruken ukurta, motivasi i bas melayani, ketutusen, kesadaran menjaga lingkungen tetap bersih, rsd. Melala gereja enggo peduli lingkungen, gereja sahabat alam, tapi kita mesera denga guna seh ku je. Bage pe kesaksian geluhta secara pribadi sebage kalak si enggo ngaloken keterkelinen i bas Tuhan nari, si enggo sepatutna geluhta jadi sira ras terang man sekelewetta.

Palas i bas kita tetap ersaksi i bas kegeluhenta e me pengorbanen Tuhan Jesus si erbahanca kita terkelin, e me dalanta tetap semangat i bas ersaksi (invocatio). Enggo pasti melala tantangen, ambaten si man hadapen i bas kita naksiken Berita Si Meriah, tapi Tuhan alu kuasa Kesah Si Badia tetap nemani kita, mereken gegeh ras semangat guna ngalaken erbage-bage tantangen. Rikutken Bahan Ogen, maka Dibata tetap nemani kita, Ia tetap ras kita. Mari tetap kita terus bersaksi sampai Tuhan datang.