Bimbingen Khotbah Minggu 12 April 2015

BIMBINGEN KHOTBAH MINGGU 12 APRIL 2015

Quasimodogeniti (Bagi Anak Si Mbaru Tubuh)

Pdt. Larena br. Sinuhadji (Nd. Reynard Tarigan)

Invocatio :

“Kata e me ulu kegeluhen, janah kegeluhen e maba terang man manusia” (Joh. 1:4)

Ogen :

Masmur 133 (Anthiponal)

Khotbah :

1 Joh. 1:1-10 (Tunggal)

Tema :

TERANG DIBATA MPERSADAKEN KITA

Penjelasen Bahan Pustaka Si Badia

Masmur 133 nuriken kerna penggejapen Pemasmur si seh kel senangna ras ulina adi kalak si ersenina sada perarih. Ertina, ras kalak si ndeher ras kita pe, kiniersadan arih e perlu siperjuangen ras siciptaken. Sabab mekatep si terjadi, antar ersenina entah erturang, si banci turah perjenggilen, perubaten seh ku bas akhirna perpecahen erkiteken persoalen erta warisen, keegoisan, rsd. Adi ikaitken ku bas kegeluhen Daud ras keluargana, memang anak-anakna ratana la banci kompak erkiteken beda nande. Rikutken pengakap Pemasmur, maka kiniersadan arih e merupaken hal si cukup penting i bas kegeluhen manusia. Desken minak wangi si meherga, si icucurken ku takal Harun, maler ku janggutna, maler ku kerahung jubahna. Minak biasa ipake sebage simbol pengurapen raja (simbol penghargaan, penghormaten). Ertina, adi banci siciptaken kegeluhen si ersada arih, kompak, tuhu-tuhu kalak si deban si ngenehenca pe salut. Ipujiken kalak ras jadi contoh ku sekelewetta. Si peduaken desken embun i deleng Hermon, si nusur ku deleng-deleng Sion. Erina, embun e mereken kesejukken, ketentramen, kedamen. I je me Tuhan erpadan mereken pasu-pasuNa si la erkeri-kerin man kalak si tetap nggeluh ersada perarih.

1 Johanes 1:1-10. Surat Johanes itulisken guna menghambat ajaran gnostik si enggo mempengaruhi perpulungen paksa si e. Gnostik (gnosis) = pengetahuan.[1] Alu ajarenna, Johanes tuhu-tuhu menekanken maka Jesus Kristus tuhu-tuhu Dibata 100% ras manusia 100%. Secara khusus arah surat enda itekanken kel kemanusian Jesus, alu pernyataan “Kata si mereken kegeluhen, si enggo tuhu-tuhu iidah kami alu mata kami, janah enggo pe idadap kami alu tan kami.” Adi sipergemetken, situhuna kai si ikataken Johanes dalam rangka negasken Tuhan Jesus e tuhu-tuhu manusia. Lit kulana seh makana banci idadap. E maka ilumbaken Johanes pe, kalak si ngakui Jesus Kristus reh ku doni enda selaku manusia, kalak si bage lit bas ia Kesah si Badia, sebalikna kalak si la ngakui, la lit bas ia Kesah i bas Dibata nari (I Joh. 4:2,3). Tegas Johanes menentang ajaren gnostik. Penting enda ijelasken Johanes, sabab alu cara si e nge Dibata banci menyelamatken manusia. Dibata i bas Jesus Kristus, si tuhu-tuhu menderita, bahkan nggit mate guna manusia maka banci manusia terkelin.

Isaksiken penulis enda maka Dibata e terang kap janah la lit sitik pe gelap i bas Ia (Allah adalah terang dan di dalam Dia tidak ada kegelapan). E maka kalak si tek dingen nggeluh i bas Ia, nggeluh i bas terang nggeluh i bas persadan si mehuli ras Tuhan bage pe sapih-sapih temanna manusia. Si e terjadi erkiteken enggo sigejapken pengorbanen Jesus si enggo mbersihken kita i bas dosa-dosa. Sebalikna, adi ninta kita ersada ras Ia tapi nggeluh denga kita i bas kegelapen, erbual kita subuk arah kata ras perbahanen. Johanes ngatakenca gelah saling mengakui dosa man Dibata, maka ilakoken Dibata kai si bujur, ialemiNa dosa-dosanta, janah ibersihkenna kita i bas perbahanen si la payo. Janah adi sikataken, maka la kita erdosa, sibahan Dibata jadi perguak, janah kataNa la lit bas kita. Sabab, firman Tuhan sendiri ngatakenca maka manusia siperdosa si perlu pengalemi dosa i bas Dibata nari. Janah pengampunen e sendiri enggo ilakoken Dibata i bas Jesus Kristus i bas kematenNa i kayu persilang ras keke i bas si mate nari i bas wari peteluken.

Dalanna kita banci nggeluh i bas terang e me alu kita ngakuken dosa-dosanta, sebab la lit manusia si sempurna. Dosa, kesalahen silakoken kita labo guna ibuniken (itutup-tutupi) tapi guna ibaba ku adep-adepen Dibata guna ialemiNa kerina dosa-dosanta. Je nari ipengasup Tuhan kita arah pimpinen Kesah si Badia, nggeluh i bas kegeluhen si mbaru, si ngena ateNa.

Perenungen

Minggu enda, e me minggu kenca Paskah, minggu si mulihi mpersingeti kita maka kita enggo ibebasken i bas kuasa dosa, kuasa kematen, kuasa kebiaren. Arah kemenangenNa, mabai kita kalak si tek man baNa nggeluh i bas kegeluhen si mbaru, i ja la nari kita nggeluh i teruh kuasa dosa (hidup baru di dalam Tuhan = bagi anak si mbaru tubuh). Gelah tetap banci kita hidup baru i bas Tuhan, persadanta ras Tuhan arus tetap sijaga, geluh tetap erpengendes ras ernalem man baNa (bali ras anak-anak si tetap berlindung man orang tuana).

Salah sada biak kalak si enggo hidup baru i bas Tuhan, banci nggeluh ersada arih sada ras si debanna (ogen). Perbedaan pendapat, terjadi konflik adalah hal si biasa, tading uga carana kita banci mengelola perbedaan pendapat ras konflik si terjadi alu mehuli segelah menghasilken pembelajaren si positif man banta ras temanta si deban. E maka i bas si e sikedepanken biak-biak Kristus i bas kita membangun kiniersadan, nehken kekelengen (sisampat-sampaten, ula egois, ula murah mbenceng, sikuning-kuningen labo siangeng-angengen). Adi salahta kin, mindo maaf kita. Sebalikna, adi reh temanta mindo maaf man banta, nggit kita mereken pengampunen. Sabab lit ka kalak la terdameken enggo pe temanna ndai (kade-kadena ndai) ngaku salah ras mindo maaf. Kalak si bage perbual i bas kata ras perbahanen aminna pe ikatakenna ia kalak Kristen.

---

[1]   Penganut pandangan ini percaya bahwa yang ilahi dan semua yang berkaitan dengan yang ilahi tidak bisa terlibat dengan dunia materi, karena keterlibatan itu akan membuat yang ilahi menjadi tidak murni dan tidak suci lagi. Oleh karena itu, ajaran Allah menjadi manusia di dalam Yesus Kristus menurut mereka sangat tercela. Mereka membuat garis pemisah yang tajam antara Kristus yang ilahi di satu pihak dan manusia  Yesus di pihak lain. Dengan kata lain, mereka tidak percaya bahwa Kristus yang ilahi dapat menyatu dengan Yesus yang merupakan manusia. Oleh karena itu berkali-kali Johanes menunjuk kepada fakta bahwa Kristus, Anak Allah itu, sungguh-sungguh telah datang sebagai manusia, menderita, disalib dan mati untuk menebus dosa manusia.