Bimbingen PJJ 19 - 25 Oktober 2014

BIMBINGEN PJJ 19 - 25 OKTOBER 2014

Pdt. Larena br. Sinuhadji (Nd. Reynard Tarigan)

                  

Ogen :

Ester 4:12-14

Tema :

MBELA SI BENAR

Tujun :

Gelah ngawan ni perpulungen

Meteh kai si arus ilakokenna ibas hal si benar

Tetap ndalanken si benar ibas kegeluhenna

1. Kitab Ester itujuken man kalak Jahudi si tetap denga tading i Media-Persia ras la nari mulih ku pembuangen. Kenca italuken Persia kerajaan Babel si naban kalak Israel, emaka sada-persada kalak Israel iulihken ku Jerusalem atas seijin Raja Persia.
2. Ester emekap anak Senina Mordekai ras terpilih jadi kemberahen Raja Ahasweros kenca penyeleksian si cukup ketat (Ester 2:7). Ope perikopta, maka enggo sura-sura Haman, Perdana Mentri guna ngkernepken kalak Jahudi si lit i kota Susan ibukota Persia paksa si e, erkiteken Mordekai ngenca si la nggit nembah erjimpuh i lebe-lebe Haman dalam rangka mereken penghormaten. Akibatna labo saja man Mordekai ia ernembeh ate tapi pe man kerina kalak Jahudi si lit i Persia, ersura-sura ia guna munuhsa.
3. Ibas ps. 4 me i je teridah usaha Mordekai gelah kalak Jahudi banci selamat la surung ikernepken termasuk arah Ester si enggo jadi kemberahen raja. Lebe icaingken Mordekai bajuna tanda atena ceda. Kenca bage ipakena uis guni, icaburkenna abu ku takalna, jenari erdalan ia ku tengah kuta janahna ngandung nderkuh-nderkuh alu pusuh getem. Dungna seh me ia i kerabangen istana. La ia ku bas, sabap la ise pe banci bengket adi make uis guni. Janah i belang-belang kerina propinsi, kenca perentah raja e imomoken, minter terbegi sora tangis megang i bas kalak Jahudi. Erpuasa ia, tangis ras ngandung, janah menam kerina make uis guni. Asum ieteh Ester kai si ilakoken Mordekai emaka ikirimkenna uis man paken Mordekai. Tapi la nggit Mordekai ngalokenca. Kedungena, ikirim Ester, Hatah, suruh-suruhenenna si dilaki guna nungkuni kai kin situhuna si terjadi. Kenca bage maka ituriken Mordekai kerna petaka si bakal terjadi nandangi kalak Jahudi, bahkan surat salinen raja si enggo imomoken i ibukota Susan maka kerina kalak Jahudi arus ikernepken.  Janah tole ipindoken Mordekai gelah Ester ngadap man raja mindo perkuah ate raja gelah kalak Jahudi la surung ikernepken. Tapi itenahken Ester ka kata man Mordekai, maka lit aturen mainna ibas jumpa ras raja, adi la kin bekas tenah raja maka ise pe si berinisiatif jumpa ras raja pasti ibunuh, seyakatan adi dudurken raja ciken emas kerajaan man bana.
4. Janah 2 ayat enda me si jadi bahan perikopta, si merupaken perkataan Mordekai si akhirna erbahanca lit gerakan nasional ibas Ester guna membebasken kalak Jahudi arah ia sendiri pe nggit ikorbankenna. Nina Mordekai : “Ola iarapkenndu maka kam sikapen asangken kalak Jahudi si deban erkiteken kam ringan i bas istana. Adi sinik pe kam i bas paksa-paksa si bagenda, ugapa pe reh nge penampat man kalak Jahudi tah i ja nari gia, janah kalak Jahudi e la banci lang selamat nge; tapi kam ugapa pe mate, janah keluarga si itadingken bapandu imasapken. Banci jadi guna nampati bangsa ndu nge maka kam enggo iangkat jadi kemberahen.”
5. Arah perkataan Mordekai enda, si pemena, banci siidah pemeliharaan Tuhan nandangi umatna, maka banci jadi arah Ester si kin kalak Jahudi siangkat jadi kemberahen raja, arah e dalanna bangsa Israel selamat (band. kisah Jusuf si idayaken ku Mesir, kepeken arah si e cara Dibata nehken keselamaten man kalak Israel emekap keluarga Jakub).
6. Si peduaken, la pe lit tindaken Ester guna nampati bangsa Israel paksa si e (sabab raja sendiri lenga bo tehna kemberahenna kalak Jahudi, ija sedekah enda identitasna irahasiaken - Ester 2:20),  tetap lit cara Dibata guna nelamatken bangsa Israel, alu erbage-bage cara Dibata si luar biasa si la terantusi kita secara akal pikirenta. Tapi Ester erkiteken hanya memikirken dirina sendiri, la banci lang mate, janah keluarga si itadingken bapandu imasapken. Bage me resiko/akibat sialami kita dikenca kita hanya ngukurken keselamaten diri sendiri.
7. Tapi akhirna, banci siidah perkataan Mordekai membakar semangat nasionalisme Ester ras berani berkorban guna keselamaten bangsana, ras kedungenna Haman sendiri nge si igantung raja alu tiang gantungen si enggo isikapkenna guna Mordekai (senjata makan tuan) ras bangsa Israel selamat bahkan Mordekai imuliaken jadi Perdana Menteri gantiken Haman (Ester 7:10, 8:16-17).
8. Lagu Nasionalta : “maju tak gentar membela yang benar” (bukan yang bayar) arus nggeluh tetap bas kita. Kebenaren arus itegaken ras ibela, ras enggo pasti mbue tantangen ras resiko si arus sialami ibas kita nehken kebenaren. Sebage contoh, tidak popular, mbuen kalak si la senang, sebab umumna kalak diam cari aman entah pe terbawa arus nggeluh ibas ketidakbenaren. Meriah ukurta adi ipake Dibata kita guna nehken kebaneren, sabab pasti Dibata mereken gegeh ras nampati kita ibas erbage-bage tantangen sialami, bagi sialami Ester ras Mordekai. Tapi banci jadi, enggo pe sibela ras silakoken kebenaren, keselamaten la berpihak man banta, banci jadi menderita entah jadi korban ibas membela kebenaren (contoh: Munir, Widji Thukul, termasuk Jesus sendiri), tapi geluhta lebih bermartabat, sabab seh ku ujung geluhta tetap kita pang ndalanken kebenaren.