Bimbingen Khotbah Minggu 26 Oktober 2014

BIMBINGEN KHOTBAH MINGGU 26 OKTOBER 2014

Pdt. Larena br. Sinuhadji (Nd. Reynard Tarigan)

Introitus :

“Tapi lebih asa si e, perayaken kami e me kap ndarami uga maka ngena ateNa, subuk i bas rumah kami si i jenda tah pe i jah.” [2 Kor. 5:9]

Ogen : 

Masmur 1:1-6 (Responsoria)

Khotbah : 

1 Tesalonika 2:1-8

Tema : 

BIAK PERBERITA SI MERIAH

1. Tesalonika emekap ibukota Makedonia. Tupung Paulus nehken pelayanen/penginjilenna i kota enda, maka Tesalonika sada kota si sangana berkembang pesat ibas perdangangen ras pelabuhenna ras jumlah penduduk paksa si e 200.000 jiwa. Khotbah-khotbah Paulus maba enterem kalak erkiniteken man Jesus, tapi i samping si e mbue perbeben si reh ibas kalak si la tek nari. Secara khusus ibas perikop enda ituriken Paulus kerna pelayanen si ilakokenna, maka keleng kel ate Paulus nandangi perpulungen si ilayanina, janah e icidahkenna arah keriahen ukurna nehken berita si meriah si rehna ibas Dibata nari bahkan geluhna pe iendeskenna guna perpulungen gelah banci enterem kalak tek man Jesus.
2. Karakter/biak si deban si isaksiken Paulus, maka tetap megenggeng aminna pe mbue perbeben si alamina erkiteken nehken Berita si Meriah (ay. 2). Ope ia ku Tesalonika maka enggo leben Paulus isiksa ras igombang-gombangi kalak i Filipi, tapi labo e erbahanca ia aru ate, mbiar entah pe tadingkenna pelayanen. Tapi tetap ia berkomitmen. Sebab Dibata la pernah nadingken kalak si tetap setia nehken berita si meriah. Ipetetap Dibata ukurna guna nuriken Berita si Meriah, aminna pe reh erbage-bage kiniseran si man bentasen.
3. Ibas ia nehken berita si meriah, tetap ilumbakenna Kata Dibata rikutken singena ate Dibata, labo gelah ngena ate manusia sabab Dibata sendiri si enggo petunggungken Paulus guna meritaken Kata Dibata. Perpulungen jadi saksina, maka sedekah pelayanen Paulus labo pujin manusia si idaramina (labo reh alu ranan metade ndahi perpulungen/labo kata tengteng tapi kata si tuhu ibelaskenna). Entah pe lit biak pekulah-kulah/munafik guna nutupi kerangapenna. Paulus labo ndarami keuntungen (merangap) arah penginjilenna. Ibas ia nehken Berita si Meriah labo keuntungenna si lebih ipelebekenna tapi Kinirajan Tuhan (band. Mat. 6:33 “Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu”).
4. Paulus pe la nggit memberatken perpulungenna, walau pe situhuna lit hakna guna ndatken penampat ibas perpulungen nari (band. 1 Kor. 9:13-15 “Tentu enggo ietehndu maka kalak si erdahin i bas Rumah Pertoton ngaloken pangan i bas Rumah Pertoton e nari, janah kalak si mpersembahken persembahen tutungen dat bagin i bas persembahen e nari. Bage me pe enggo itetapken Tuhan maka kalak si meritaken Berita Si Meriah ngaloken keperlun geluhna i bas dahinna e nari.Tapi sada pe labo kupake hakku enda.”) erkiteken ia rasul Kristus. Janah memang Paulus sendiri labo erjabu (selibat). Tapi ibas pelayanen Paulus, ibahanna perpulungenna e desken anakna, janah ia selaku nande si melias. Ertina, kai pe si nilakoken Paulus, dalam rangka membangun kiniteken perpulungen si ilayanina.
5. Enda me biak Perberita si Meriah si arus nggeluh man banta (Pdt., Pt./Dk. ras kerina kita si enggo ngaloken keselamaten ibas Dibata nari si rutang guna nehken Berita si Meriah) amin sekali mbue tantangen. Sabab perayakennta rikutken introitus emekap, “Tapi lebih asa si e, perayaken kami e me kap ndarami uga maka ngena ateNa, subuk i bas rumah kami si i jenda tah pe i jah” (2 Kor. 5:9).
6. Maka tetap ngasup kita nehken si ngena ate Tuhan adi Kata Dibata sipekusur ibas pusuhta ras sipakeken suari ras berngi. Meriah ukurta (labo merupaken beban) ibas matuhi UU Tuhan ras ngukurisa suari ras berngi. Malem me atena dingen sangap ibas kerina si idahikenna. Kalak benar itegu-tegu dingen ikawali Tuhan (termasuk ibas ngalaken perbeben). Tapi kebalikenna, kalak jahat (band. Perberita Injil Palsu, kebaliken dari karakter Paulus), ia bali ras segal si iembus angin. Kerina kalak perdosa iukum Dibata dingen akhirna erdalen kubas kebenen.
7. Puji Tuhan, sendah Presidenta ras wakil Presiden pe-7-ken Joko Widodo ras Jusuf Kalla enggo ilantik. Revolusi Mental terus ilumbaken ibas kepemimpinenna: kerja, kerja dan kerja, kerendahan hati, kesederhanaan, merangkul semua kalangen secara khusus golongen si sedekah enda idiskriminasi. Mari sidukung pemimpin baru, erdahin ras melayani kita sue ras profesinta masing-masing ras terlebih ibas membangun perpulungen Tuhan alu karakter Kristus nggeluh bas kita. Selamat melayani.