Bimbingen Khotbah Minggu 19 Oktober 2014

BIMBINGEN KHOTBAH MINGGU 19 OKTOBER 2014

Pdt. Larena br. Sinuhadji (Nd. Reynard Tarigan)

Introitus :

"E maka berekenlah man sekalak-sekalak kai si patut ialokenna” (Roma 13:7a)

Ogen : 

Jesaya 45:1-7 (Anthiponal)

Khotbah : 

Matius 22:15-22 (Tunggal)

Tema :

SEHKEN RAS DALANKENLAH TANGGUNGJABABNDU!

1. Hak ras kewajiben/tanggung jawab arus radu ras idalanken. Kai si jadi tanggung jawabta, kewajibenta alu patuh sidalanken, janah kai si jadi hakta arus sialoken. Enggo pasti terjadi persoalen dikenca salah sada hal la seimbang idalanken. Umpana, kewajibenta enggo sipenuhi, tapi hakta la sialoken. Entah pe sebalikna, enggo pasti terjadi persoalen: ketidakadilen, semena-mena, rsd.
2. Lit kerja sama si la mehuli antara kalak Parisi ras piga-piga ibas Partai Herodes (Herodian) guna ncubai Jesus alu penungkunen soal nggalar pajak man Kaisar. Padahal sedekah enda, kalak Farisi ras Herodian ermusuhen/beda pendapat. Kalak Herodian setuju pajak sedang kalak Parisi lang. Tapi erkiteken seri kepentingenna emekap menyingkirken Jesus, kelompok enda akhirna erkoalisi. Lebe alu sada pernyataan si sangat menyanjung. Reh alu kalimat si hebat si situhuna enda perangkap. Pernyataan si kin payo tapi situhuna la teraloken kalak enda pengajaren ras perbahanen Jesus si enggo isanjung kalak enda ndai. Maka payo nge situhuna Jesus kalak bujur, ngajar alu terus-terang kerna sura-sura Dibata nandangi manusia, alu la biar-biaren man ise pe. Sabab la erpilihen manusia i lebe-lebe Jesus. Payo memang isi pernyataan kalak enda ndai, tapi adi kita enggo tersanjung, terperdaya, akhirna la nari pang kita ngataken si benar, mbiar la nari ipujiken. Emaka ibas si enda, arus kita tetap metenget gelah ula iperdaya. Penungkunenna, “la kin ngelanggar UU Agama Jahudi adi igalari pajak man pemerentah Roma?” Padahal kalak Jahudi sedekah enda pe enggo nggalar pajak man pemerentah Roma, amina pe situhuna mejungut ia ndalankenca sabab kalak Jahudi paksa si e ijajah Roma. Penungkunen si menjebak. Adi jawab Jesus la banci, kalak Herodian enggo pasti merawa ras ngelaporken Jesus man pemerentah Roma gelah Yesus banci itangkap. Adi sebalikna, Jesus ngatakenca banci, kalak Yahudi menganggap Yesus sebage pengkhianat si pro-Roma.
3. Tapi ieteh Yesus sura-sura si jahat ibas 2 kelompok si nungkun enda ras pekulah-kulah. Emaka ipindo Jesus gelah icidahken kalak enda ndai selembar duit. “Gambar ras gelar ise kin enda?” nina Jesus nungkun. “Gelar ras gambar pemerentah Roma.” Emaka nina Jesus, “bereken man pemerentah Roma kai patut iberekn man bana, janah berekenlah man Dibata kai patut ibereken man Dibata.” Intina, maka kita sebage warga negara dunia ras warga negara Surga, duana tanggung jawab enda arus sisehken alu mehuli.
4. Pengakun ras ketaatan man pemerentah emekap wujud kinitekenta man Dibata, maka bangsa ras negara ija kita jadi rayaktna emekap alat Tuhan guna nehken keselamatenNa. Sitaati pemerentah sebab ia perpanjangen tan Dibata guna nehken si ngena ateNa. Tanggung jawabta sebage rakyat sidalanken secara khusus ibas nggalari pajak ras tanggung jawab si deban. Bage pe man Tuhan tanggung jawabta selaku kalak si enggo iselamatkenNa arus tetap sidalanken, ras la e terbatas kubas penggalaren perpuluhen, persembahen ras kerina si berkaiten ras duit guna Gereja Tuhan. Perbahanenta man Tuhan la ibatasi kewajiben ras tanggung jawab saja. Sabab kegeluhenta ras kerina si enggo sialoken kita ibas geluh enda rehna ibas Dibata nari, terlebih enggo iberekenNa keselamaten man banta. Enggo sepatutna si terbaik kel sibereken man Tuhan (Roma 12:1,2 ngendesken geluhta jadi persembahen si nggeluh man Tuhan: waktu, pemikiran, tenaga, talenta, harta, keluarga, rsd.).
5. Roma 13:1 “Kerina kam arus patuh man pemerentah si erkuasa, sabap labo lit pemerentah si la i bas Dibata nari, janah pemerentah si lit genduari e pe Dibata nge netapkenca. Kalak si ngelawan pemerentah si lit e, ilawanna kap kai si enggo itetapken Dibata.” Arus siakui maka pemerentah emekap alat Dibata dingen si itetapken Dibata. Bandingken ogenta, ibas Jesaya 45, maka Koresh iangkat Tuhan jadi raja guna naluken bangsa-bangsa. Ras memang raja Koresh (Persia nari) ipake Tuhan guna membebasken bangsa Israel ibas tabanen Babel nari (Band. 2 Kronika 36:22-). Nina Tuhan “Kubereken gegeh man bandu, amin la gia itandaindu Aku.” Arah si enda tetap kita mendukung pemerentahta la pe ia sada kiniteken ras kita. Sebalikna adi pemerentah la banci ndalanken tanggung jawabna alu mehuli, tetap kita alu berani menyuarakan suara kenabian. Gereja la banci diam. Konfesi GBKP ngatakenca, “Panggilan Gereja adalah menyelamatkan dunia, mengubah dan mentransformasikannya.”