Bimbingen PJJ 12 - 18 Oktober 2014

BIMBINGEN PJJ 12 - 18 OKTOBER 2014

(Minggu Zending GBKP)

Pdt. Larena br. Sinuhadji (Nd. Reynard Tarigan)

Ogen : 

2 Raja-raja 4:8-17

Tema :  

IPASU-PASU TUHAN GUNA JADI PASU-PASU

Tujun :

Gelah ngawan ni perpulungen :

Meteh tanda-tanda kalak si ipasu-pasu

Nggejapken kerna pasu-pasu Dibata ibas kegeluhenna

Tetap nggit ndalanken kegeluhenna jadi pasu-pasu man kalak si deban.

1. Perikopta emekap kerna turin-turin Elisa ras diberu si bayak i Sunem nari (Sunem adalah sebuah kota di Israel, sekitar 40 km di sebelah utara Samaria). Elisa emekap nabi Tuhan penggati Elia si ibereken Tuhan karunia lako banci erbahan tanda-tanda senget/mujizat.
2. Ije tading sekalak diberu si secara finasial bayak ras mehuli jelmana. Alu inisiatifna itenahkenna kemahen Tuhan e man i rumahna. Ras untuk seterusna, adi Elisa ku Sunem i rumah diberu e ia rusur man. Reh rusurna kalak enda jumpa, turah kepercayaan ibas diberu enda, maka Elisa emekap sekalak dilaki sibadia. Emaka iarihkenna ras perbulangenna, gelah banci ibahan sada bilik kitik i babo tarum, ras itamaken i je sada ingan medem, sada meja, sada kursi ras sada lampu. Ertina kerina keperlun Elisa icukupi keluarga enda ndai.
3. Sada paksa waktu Elisa merasa berhutang budi, emaka arah suruh-suruhenna Gehasi gelah nungkuni diberu kalak bayak ndai guna mbalas kerina kelatihenna nikapken keperlun Elisa ras si erdahinna. Bahkan sebage nabi si erdahin ibas lingkungen kerajaan, enggo nggit Elisa maba sura-sura diberu enda man raja guna icakapken. Tapi diberu enda ndai la aji mumpung bahkan la lit bas ia prinsip take n give entah mbalas-membalas. Nina, “kerina keperlunku enggo cukup dat aku i tengah-tengah bangsaku.” Diberu enda ndai ngasup ngataken bujur arah kai si enggo lit bas ia. La lit biak rangap bas ia, enggo ia erlajar encukupken diri arah kai si lit bas ia. Sebab melala kalak bayak, secara materi la kurang tapi tetap denga kurang-kurangen, itambahina kinibayakenna alu cara si la mehuli, ngaloken sogok, kurupsi, nebu-nebu, rsd.
4. Diberu enda la ngarapken si muluk-muluk. Tupung ikataken Elisa, maka tahun si reh diberu enda enggo ngangkip sekalak anak dilaki, maka nina “Ola kam erguak bangku, sabab kam suruh-suruhen Dibata!” Ras memang terbukti, setahun kemudian  enggo ipupusna sekalak anak dilaki.
5. Tema: “Ipasu-pasu Tuhan guna jadi pasu-pasu.” Geluhta ipasu-pasu Tuhan subuk secara pribadi ras keluarga, bage pe gereja sebage sada persekutuan (GBKP). Si eme si arus sigejapken kita. Maka kai pe si lit ibas kita rehna ibas Dibata nari, tugasta tading menatalayankenca ras pepalersa man si deban, si membutuhken rikutken kebutuhen masing-masing dingen rikutken si lit bas kita.
6. Minggu Zending ngingetken kita kerna tugasta sebage Pekabar Injil, mpembarken Berita si Meriah man kalak si lenga begina kabar sukacita (Amanat Agung Mat. 28:19-20). Perkuah ate Tuhan arah Zending NZG (Nederlandsch Zendeling Genootschap), emekap Pekabar Injil si reh ibas Belanda nari ras akhirna 5 kalak pendeta Minahasa nari si ikut nampati seh makana kalak Karo nandai Jesus Kristus. Uga tugasta, tanggung jawabta, keterbebanenta ibas meritaken Kata Dibata, Kabar Baik subuk man kalak si lenga nandai Dibata entah pe man senina turangta si enggo tek man Jesus tapi merampek denga kinitekenna. Kita enggo ngaloken pasu-pasu si mbelin emekap berita kesalamaten si akhirna kita jadi kalak si tek, pengikut Kristus. Tugasta guna nehken kabar sukacita, berita Injil alu kata ras perbahanen man sekelewetta. Contoh konkrit, ke depan lit sibahan program kerja samanta ras sada runggun ibas sada klasis si lenga megegeh perpulungenna ras kesempatenta guna banci er-PI, entah pe terus kita nampati mpepaler pasu-pasu guna senina turangta si terkena erupsi Sinabung.
7. Kai pengangkan bayak/kaya? Kalak si nggejapken kerina si lit bas ia rehna ibas Dibata nari ras ibagikenna, ipepalerna man kalak si deban. Jadi tidak secara otomatis, ikataken bayak secara materi tapi adi ia egois, hanya ngukurken diri sendiri, pelit, kurang ipakena geluhna jadi berkat man kalak si deban, rsd, situhuna ia nge si musilna. Ajaren Calvin, kekayaan harus dikelola alu mehuli, sebage tanggung jawabta man Tuhan, emaka Calvin menekanken gaya hidup sederhana, aminna secara finansial bayak gelah banci kita berbagi man kalak si deban.
8. Natal tahun 2014 sipebuai aksi sosial dalam rangka kita jadi saluren pasu-pasu. Enggo mbue aksi ras terus perlu itingkatken, piga-piga contoh : Saniogarih motivator man anak sekolah i Tanah Karo (Alumni UI), Klasis Jakarta - Bandung, Jakarta - Banten er-PI ku kuta-kuta labo hanya KKI tapi membangun jemaat ras desa secara ekonomi, PERMATA Mahanaim nehken penampat man mahasiswa si kurang mampu tapi berprestasi. Kita, kai nari si banci silakoken (berarti sedekah enda enggo lit tapi perlu denga itingkatken).