PA Moria 26 Okt. - 01 Nov. 2014

PA MORIA 26 OKT. - 01 NOV. 2014

(Pdt. Larena br. Sinuhadji)

Tema :

UKUR SI JAHAT ITALUKEN ALU KINIULIN

Tujun :

Gelah Moria :

Ngidah kiniulin Jusuf nandangi seninana si la erelem-elem

Nggit janah ngasup jadi orangtua man kalak si pernah erbahan kesalahen man bana.

Bahan  :

Kejadin 50:15-21

1. Ogenta ngerana kerna Jusuf si mpetetap ukur senina-seninana si pernah ndayaken ia. Jusuf menjadi orang nomor dua i Mesir kenca Raja Firaun. Ibas terjadi kelihen si mesangat, keluarga Jakub termasuk anak-anakna pindah ku Mesir ras ialo-alo Jusuf alu meriah ukur. Tapi kebiaren ukur senina-seninana kenca enggo mate bapana, Jakub. Ibas ukur senina-senina, entah segat ate si Jusuf ras mpelawesna kari senina-senina erkiteken kejahaten si enggo pernah ibahanna kerina man Jusuf.  (Kesalahan yang pernah kita lakukan mengejar-ngejar kita, membayang-bayangi kita, bayang-bayang dosa ncerawisi kita). Emaka ibahana senina-senina pesan terakhir Jakub/amanah kalak si nandangi mate gelah ialemi Jusuf salah senina-senina man bana. Emaka alu kesadaren penuh, senina-senina pe mindo maaf man Jusuf kerna kesalahen si enggo pernah ilakokenna. Tangis Jusuf tupung ialokenna tenah/amanah e. Erjimpuh kerina senina ras ngatakenca maka kalak enda siap kerina jadi budak Jusuf. Tapi Jusuf reh mpetetap ukur senina-senina alu statement teologis, “ola mbiar labo banci aku jadi gancih Dibata ngukum kalak. Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari. E maka ola pada sitik pe kam mbiar. Aku pekena-kena kam ras anak-anakndu." Dage alu kata si melias e, ipetetap Jusup mulihi ukur senina-seninana seh maka malem atena kerina.”
2. Jusuf ngasup ngenen si mehuli (positif) arah kejadin si la mehuli (negatif). Jusuf ngasup ngangkai perdalanen geluhna ibas perencanaan Dibata si mehuli. Emaka la lit istilah dendam ibas Jusuf, justru ipetetapna ukur senina-senina.
3. Ula kel subuki si jahat alu perbahanen si jahat tapi alu keleng ate. Sejarah membuktiken adi kejahaten italuken alu kejahaten asilna tetap kejahaten ras la lit pernah ujungna. Kebalikenna adi kejahaten ibalas alu kinulin pasti asilna perdamean. Ajaren doni mata gancih mata, nyawa nganti nyawa, janah e ka nge ajaren ibas UU Taurat (Imamat 24:20). Kelengilah temanndu ras elem-elemlah man imbang-imbangndu (Mat. 5:43 atau Imamat 19:18). Tapi ajaren Yesus, kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran (Mat. 5:44). Termasuk pe teologia Paulus, ngatakenca, “Adi lit kalak erbahan jahat man bandu, ola balas alu kejahaten. Bahanlah si mehuli rikutken pengakap jelma si nterem (Roma 12:7). Keleng ate Kristus ras ajarenNa nge si mpengasup kita nehken kekelengen bahkan mengampuni dikenca lit kalak erbahan si jahat man banta, entah pe sebalikna, kita dimaafkan asum kita reh mindo maaf kalak si pernah kita ngelakoken kesalahen man bana. La lit elem-elem.
4. Konflik, beda pendapat, perubaten, ngelakoken kesalahen subuk arah kata ras perbahanen la banci sihindari i bas kegeluhenta. Ula lebe ras jiran tetangga, teman sada dahin, teman bas perpulungen, ibas hubungen suami-istri, ersenia ras turang pe kadang lit pergesekan. Bahkan contoh bas perikopta antar ersenina. Si paling penting uga kita banci mengelola konflik alu mehuli. Saling mengintropeksi diri, karena tidak ada kita yang sempurna. Asum sieteh kita salah, sedar kita, minta maaf. Bage pe sebalikna, reh kalak minta maaf man banta, sialoken  permohonen maafna, tanpa lit je dendam/elem-elem. Senina-senina Jusuf reh minta maaf, sedarina kesalenna, Jusuf la berkeras, lang situhuna pasti sakit kel ukurna, tapi tetap banci iidahna rencana Dibata ibas kai si enggo jadi man bana, emaka imaafkenna senina-senina. Istilah kalak Karo, “sada matawari pe ateku lang,” “kam si salah aku si robah” perlu sipekena. Adi enggo Kristus nggeluh bas dirinta, adi kin kita salah, kitalah si robah, janah adi enggo reh teman minta maaf man banta, bereken ka pengampunan alu tulus iklas. Eme si erbancanca kegeluhenta reh damena, kita pe sehat-sehat, kiniersadan reh teguha. Tepuk tangan tidak bisa sebelah saja, arus dua tangan. Bage me, ibas kegeluhenta si mehulina, saling mengasihi, saling mengampuni, saling menghargai, e me si idealna. Tapi adi la bage, kebalikenna  si terjadi, jahat perbahanen kalak man banta, la kita iergaina, sepele ia man banta, tetaplah kita erbahan si mehuli. Taluken si la mehuli alu kiniulin.