Bimbingen PJJ 26 Okt. - 01 Nov. 2014

BIMBINGEN PJJ 26 OKT. - 01 NOV. 2014

PENJEMAATAN YKPC GBKP ALPHA OMEGA

(Pdt. Larena br. Sinuhadji)

Ogen :

Juna 4:1-11

Tema :

NGASUP NGERGAI KEMANUSIAN

Tujun :

Gelah ngawan perpulungen :

Tetap ngangkai maka manusia meherga i lebe-lebe Dibata

Tetap ‘terpanggil’ guna ngergai manusia si berbeda ras ia

Tetap ndukung pelayanen YKPC GBKP Alpha Omega

Juna e me salah sada Nabi si isuruh Dibata nehken misi pertobaten ras penghancuren nandangi penduduk Niniwe si enggo ersalah ras jahat i lebe-lebe Dibata (ps. 1:2) tapi akhirna ielukenna ku kuta Jope erkiteken ietehNa maka Dibata e Dibata si perkeleng, uga pa pe labo nggit Dibata ngkernepken kuta e. Sampe akhirna Juna ndatken sada pergumulen si mberat kapal si itumpangi hampir tenggelam. Sedar Juna enda jadi erkiteken kesalahenna (ps. 1:12, “Ngaloi Juna nina, “Ambekkenlah aku ku lawit maka tenang ka ia mulihi. Kueteh maka erkiteken salahku nge maka angin kaba-kaba enda reh engkenai kam”). Kenca jenari maka Juna ngikutken kata Tuhan, lawes ia ku Niniwe isiar-siarina kuta e dingen ngatakenca maka 40 wari nari ikernepken Tuhan me kuta Niniwe. Anak kuta Niniwe benaken pemimpinna, raja, pegawai seh ku kerina rayat, erpuasa, ertoto ras itadingkenna kerina lagu langkah si melket dingen ipengadina perbahanen-perbahanen si jahat. Alu sada pengarapen salih ukur Dibata ras la nari nembeh ateNa guna ngkernepken anak kuta Niniwe. Terbukti salih ukur Dibata, la surung iukumNa kalak e, labo hanya erkiteken bangsa e ertoto ras erpuasa tapi erkiteken enggo iidah Tuhan la nari bangsa e ngelakoken si jahat. (enggo “jera,” shub, “berbalik,” ay. 10). Enda me pertobaten si sejati, si labo hanya erbahan tekad, mindo pengalemi dosa, ngandung (terjeng tindakan lahiriah), tapi tuhu-uhu perubahan ukur, pusuh ras perbahanen (total berbalik).

Si tuhuna kai si terjadi nandangi anak kuta Niniwe erbahanca Juna ermeriah ukur, sebab la sia-sia ia ngelumbaken berita pertobaten seh makana terjadi perubahen ibas diri anak kuta Niniwe bahkan Tuhan la nari surung menghukum anak kuta e. Tapi kebalikenna Juna ernembeh ate bahkan seh merawa. Seolah-olah kai si enggo ibahanna sia-sia. Perban memang enggo itandai Juna maka Dibata e, perkeleng ras perkuah ras nggit ngobah keputusenNa gelah ula surung penghukumen e. Eme dalan-dalanna Juna lompat ku Jope (Spanyol). Bahkan erkiteken ngilas atena, ulin ia mate saja ras pindokenna man Tuhan gelah buat Tuhan saja kesahna (2 kali, ay. 3 ras 8).

Jawaban Tuhan, “Bujur kin kam merawa?” (penungkunen si la perlu man jawaben). Emaka lawes ia ku julun kuta e, kundul ia ras ibahanna sada sapo-sapo guna inganna cilinggem ras tetap itimaina kai si nandangi jadi. Ibahan Tuhan sada gambaren si ncidahken kerna pergumulen nabi e, e me arah ipeturah Tuhan batang lulang (jarak), i babo Juna seh makana linggem iakapna ras senang kel ukurna. Tapi la ndekahsa mate batang lulang ndai erkiteken ipangani nipe-nipe. Iparpari las matawari Juna. Merawa ia man Dibata ras madin akapna mate.

Arah gambaren batang lulang e ate Dibata membuka perukuren Juna, maka ia saja keleng atena nandangi  batang lulang si labo ia peturahsa … merawa Juna, ndele atena kerna si jadi nandangi batang lulang sabab memang menguntungken man bana. Si tuhuna Juna mekuah atena man dirina, kenyamanenna si terganggu, labo kerna batang lulang si mate ndai. Sedangken Dibata ndauh kelengen nandangi anak kuta Niniwe i ja lit 120.000 danak-danak si lenga meteh apai si benar, apai si salah.

Juna mengatur Tuhan alu pemeteh ras pemikirenna si terbatas. Tapi Dibata si mada kuasa si dem alu keleng ate ietehNa si terbaik guna kiniulin anak-anakNa si penting lit ukur si mehuli ras nggeluh ibas pertobaten. Juna keberaten erkiteken sikap Dibata si ‘kondisional’ sipatna, atena min Dibata arus konsekuen ras konsisten arah kai si enggo ibelaskenNa. Terbatas kel Juna nandai Dibata termasuk kita pe. Jelas ibas kitab Esekiel pe, Dibata enggo ngatakenca, “Aku TUHAN si Erdolat, la ukurKu meriah ngidah sekalak perdosa mate. Riahen ukurKu ngidahsa ia ngadi erbahan dosa gelah ia nggeluh. “O Israel, ngadikenlah kejahatenndu. Engkai maka nggiten kam mate?” (Esekiel 33:11). Bage pe bas Padan si Mbaru i ja tadingken Jesus kerna biri-biri si bene, ija tadingkenna si 99 guna ndarami sada biri-biri si bene. Emaka nina Jesus, “Belinen pe keriahen i Surga nandangi sekalak perdosa si jera asangken si siwah puluh siwah kalak si akapna ia benar dingen la perlu jera. Jelas 1 jiwa berarti kel man Tuhan Jesus.

Inti Pustaka si Badia, PL ras PB emekap keleng ate Dibata man manusia ras puncana ibas kerehen Jesus Kristus si jadi Juruselamat manusia. Keleng ate Tuhan si la pernah erkeri-kerin ku tengah-tengah kegeluhenta. Sikap Dibata si dem kekelengen, sangat menghargai kemanusian eme si jadi usihenta. Bas bimbingen enggo jelas, selaku orang tua, arusna lebih sipentingken keselamaten ras keutuhen keluarga asangken dahin/usaha. Percakapen antara sekalak nande ras anakna si kitik :

Anak : “apakah mama mau menitipkan harta mama yang seperti emas dan uang kepada pembantu kita?

Mama : Ya tentu tidak lah sayang…

Anak : Lalu kenapa mama tega menitipkan aku kepada mbok sepanjang hari, tapi kata mama aku adalah harta mama yang paling berharga?

Mama : (terbengong dan tersipu malu)

Selaku pengusaha, siutamaken keselamaten kerja karyawan asangken produksi kerjana. Selaku gereja, programta pe arus lebih berorientasi kubas keselamaten jasmani-rohani perpulungen asangken usaha si berorientasi profit, entah pe situmpuk senta bas bank ras kurang lit program si membangun jemaat. Perban gereja berbeda ras perusahan si berorientasi keuntungan, rsd. Perlu mbue program si bentukna ngergai kemanusian, salah sadana, orang tua asuh terhadap anak jemaat di dalam atau di luar gerejanta si kurang mampu guna isupport pendanaanna secara gotong royong.

Secara khusus ibas penjemaatan Yayasan Kristen Penyandang cacat (YKPC) GBKP Alpha Omega. Bujur sikataken man Tuhan anak-anakta si berkebutuhan khusus iperdiateken GBKP. Perlu sitingkatken, paling tidak sekali setahun lah kita muat bagin mendukung yayasan enda. Nina Yesus  “Kukataken man bandu: Kai si ibahanndu man sekalak si musilna i bas seninangKu enda, e me si tuhuna perbahanenndu man bangKu” (Matius 25:40).