BIMBINGAN KHOTBAH MINGGU 25 MARET 2018

BAHAN KHOTBAH MINGGU 25 MARET 2018

MINGGU PASSION VII(PALMARUM

THEMA:TUHAN KAP RAJA SI MBISA MABA KEBENAREN

Invocatio : Ketangkasan 19:7

Ogen : Ketangkasan 19:6-10

Khotbah : Masmur 99:1-7

-          Penjelasan Teks

a.       Ketangkasan 19:6-10

Adi ngerana erkiteken kitab enda, tentuna si eteh kitab enda eme tulisan Yohanes sangana ia ibuang i Pulau Patmos. Melala kalak erpengakap kitab enda eme sada pengenehenen Raul Yohanes erkiteken kejadin ibas wari si pepagi. Tapi adi siperdiateken latar belakang ntah pe sejarah kitab enda, kitab enda itulis sangana pemerintahan Raja Domitianus kalak Romawi. Ibas paksa si e,

raja Domitianus menuntut gelah kerina rakyatna ndilo ia eme sekalak tuhan ntah dibata. Emakana enda jadi pertentangan si luar biasa nandangi kalak Kristen erkiteken tentuna kalak Kristen tek maka Jesus Kristus eme Dibata. Erkiteken si e ka maka ibas paksa si e kalak Kristen ngenanami penganiayaan si mesangat kal.

Emakana arah konteks enda, sieteh salah sada tujun penulisan kitab enda eme guna mpegegehi ntah pe mpeteguhi kiniteken kalak Kristen gelah tetap tek maka Tuhan Yesus eme Dibata ras nggo lit janji guna si e kerina.

Emakana adi si perdiateken bahan pengogennta sendah, enda situhunna sada bagin ras Ketangkasen 18 si nuriken erkiteken keruntuhen Babilon. Keruntuhen babilon enda eme sada symbol si nurikenca kekalahan kuasa-kuasa doni. Erkiteken si e bahannta cidahken uga keriahen kita selaku kalak Kristen si tetap patuh ngikutken Dibatanta nandangi kemenangen si iberekenNa man banta.

Emakana perlu sisadari ibas bahan enda, aminna pe mbue masalah ras perbeben si reh kubas kegeluhennta kita tetap tek bahwa lit paksana Tuhan mereken kemenangen man kalak si tetap erpengendes man baNa.

b.      Masmur 99:1-7

Bagin pengogennta sipeduaken enda termasuk ibas masmur Pujin man Dibata erkiteken ia eme Raja Si Mbelin, Raja Simbisa ras Si Mada Kuasa ibas kegeluhen enda.

Emakana adi siperdiateken bagin bahan pengogennta enda, maka banci si nin

1.      Ibas ayat 1-3

Pemasmur nuriken uga Dibata eme Raja mada kuasa. Arah enda tentu si pertama lebe harus sipahami eme pengakunnta nandangi kuasa Dibata. Enterem kalak la ngejapken kuasa Dibata, erkiteken la ia tek Dibata si mada kuasa, emakana wajarlah adi la igejapkenna. Adi secara logika si ukuri jenari banci sigejap Dibata si Mada Kuasa ibas kegeluhennta adi la kita tek. Emakana pemasmur si pertama lebe si ilakokenna eme mereken pengakun nandangi kuasa Dibata si mbelin

2.      Ayat 4-5

Ibas bagin enda, pemasmur nuriken salah sada sifat Dibata ka eme ngena ateNa kebenaren ras kebujuren.

Enda harus sipahami alu mbages, erkiteken kebenaren ras kebujuren Dibata tentuna makai sudut pandang Dibata, labo sudut pandangta, adi enda sipahami emakana sieteh kai kin situhunna rencana Dibata nandangi geluhta enda

3.      Ayat 6

Bagin enda nuriken 2 kalak eme Musa ras Harus si idengkehken pertotonna. Ertina ngatakenca, kita harus nuriken man Dibata kai si perlu. Megati kita erkiteken kesalahan pemahaman nandangi sifat Dibata eme metehsa kerinana, emakana lanai si pindo man Dibata. Payo tuhu sope pe kita mindo nggo ieteh Dibata kais i perluken kita. Tapi inget selaku anak-anakNa eme sada kewajiban man banta guna nuriken keperlunnta man Dibata.

-          Aplikasi

Temanta minggu enda eme “Tuhan kap Raja si mbisa maba kebenaren”. Tema enda eme tema nutup minggu Passiion si nggo pitu kali si bentasi, ertina sope kita masuk kubas minggu paskah, makana perlu sigejapken ras siakuken Dibata me kap Raja si mbisa maba kebenaren. Ertina Dibata tuhu-tuhu mereken si terbaik man banta, aminna pe mungkin ibas paksa si e melala denga pengarapennta lenga seh kubas kegeluhennta, tapi harus tetap siakuken lit rencana Dibata nandangi kegeluhennta enda.