BIMBINGAN PA MAMRE GBKP Tgl 18-24 Maret 2018

BAHAN MAMRE Tgl 18-24 Maret 2018

Thema:BIAK SISAMPAT-SAMPATEN

Ogen : Galati 6:2-3 

-          Penjelasan Teks

a.       Galati 6:2-3

Kitab Galati eme kitab si itulis Rasul Paulus nandangi perpulungen kalak i galati. Bagi surat-surat si ibiasa itulis Rasul Paulus, ibas paksa si e melala persoalen si idatken perpulungen Kristen i Galati, erkiteken lit piga-piga guru-guru agama Yahudi si memaksakan aturan-aturan agama Yahudi harus idalanken kalak Kristen guna datken keselamatan.

Emakana Surat enda itulis guna menegaskan bahwa lalit hubungen antara aturan Yahudi ras keselamatan ntah pe kasih karunia si ibereken Tuhan Jesus man banta.

Emakana ibas bagin enda khususna secara keseluruhan Rasul Paulus nuriken kai si harus ilakoken kalak Kristen nandangi persoalen si reh kubas kegeluhenna eme Sisampat-sampatenlah perban adi bage dalankenndu undang-undang Kristus.

-          Aplikasi

Minggu enda kita bengket kubas minggu diakonia ibas bahan pa mamrenta, tentu siinget diakonia eme salah sada ibas tritugas panggilan gerejannta emakana nggo jadi sada kewajiban man kita kalak Kristen guna dalanken si e. Cuma persoalenna adi ngerana masalah diakonia si pertama perlu lebe ipeturah ibas dirinta eme biak si sampat-sampaten. Sada hal si la masuk akal adi ngerana kita diakonia tapi bas dirinta la lit biak enda. Perban diakonia dasarna eme biak si enda.

Sisampaten si imaksudken jenda situhuna labo terjeng ibas lingkungennta ngenca tapi nggo harus keluar gelah kalak pe nggejapken kerehen Tuhan Jesus arah perbahanennta janah diakonia enda pe harus bersifat mendidik gelah lit kemajun ibas kalak si isampati kita.

Adi siinget konsep aron ibas kalak karo, emakana situhunna sebagai kalak karo si nggo tek man Kristus aturenna biak enda semakin iperlengkapi labo reh kurangna. Emakana marilah si peturah biak sisampat-sampaten ibas geluhta enda gelah reh menahangna geluh enda subuk man dirinta bagepe man temannta.