BIMBENGEN PJJ GBKP 4 - 10 MARET 2018

BAHAN PJJ TGL 04-10 MARET 2018

THEMA:TATANG-TATANGLAH PEMERENTAHTA

Ogen : 1 Timotius 2:1-7

 Pdt. Maria E br Sitepu

-          Penjelasan Teks

a.       1 Timotius 2:1-7

Adi ngerana kita erkiteken surat enda, tentu sieteh kerina, surat enda eme surat kiriman rasul Paulus man Timotius anak Rohani Rasul Paulus, si tentuna guna mereken pengajaran, pergegeh bagepe nasihat man Timotius gelah reh sikapna ia guna dalanken tugas pelayananna.

Adi siperdiateken kitab enda, situhunna lit 3 hal si penting si ate ipeseh Rasul Paulus man

Timotius, eme :

1.      Pertenget nandangi pengajaran si papak ibas perpulungen

2.      Ngaturken uga harusna sekalak perpulungen bagepe kebaktin.

3.      Uga arusna jadi persuruhen Jesus Kristus si mehuli ras tanggung jawab Timotius nandangi erbage-bage golongan kalak sitek.

Emakana rikutken telu tujun surat enda. Situhunna nggo me tangkas kai latar belakang bahan pengogennta ibas wari si sendah eme guna ngaturken perdalanen kebaktin ibas perpulungen, janah kai si harus ilakoken ibas kebaktin.

Si menarikna adi siperdiateken bahan enda, eme ibas ayat 1-2, ija siidah uga Rasul Paulus mindo gelah Timotius ngelakoken Sapaat, pemindon, pengatakan bujur man Dibata guna raja-raja ras kerina si erkuasa alu tujun gelah banci geluh alu dame ras senang.

Menarik kal, erkiteken kai si kataken Rasul Paulus man Timotius, erkiteken maun-maun ibas kegeluhen enda, kita lupa notoken bangsa ras negaranta, kita lupa bahwa kita nggeluh denga ibabo pertibi enda, emakana kita harus tetap natang-natang pemerintahnta gelah banci ilakokenna perbahanen si mehuli si tentuna si e guna kiniulinnta kerina.

Maun-maun adi siperdiateken ntah sigejapken pertotonnta enda gundari melala mindo guna dirinta ngenca, kita lupa hal si e.

Emakana selaku warga Negara si mehuli, labo terjeng dalanken kewajibannta saja seperti nggalari pajak, taat man peraturan, tapi si perlu eme totonta man Dibata guna pemerintahta enda.

-          Aplikasi

Adi siinget pemerintah eme persuruhen Dibata si ertugas guna mereken keteraturan ibas doni enda. Emakana sieteh dahin enda labo dahin si menukah, emakana aminna pe kita rakyat biasa si lalit kedudukannta ibas Negara enda, tapi selaku kalak erkiniteken kita tetap ngasup menopang pemerintahta enda alu pertotonnta man Dibata. Emakana marilah sitotoken pemerintahta enda subuk ibas pertotonnta pribadi bagepe ibas pertoton itengah-tengah perpulungen.