BIMBINGEN PA MORIA GBKP 4 - 10 MARET 2018

BAHAN MORIA

“ERPOLITIK ALU BENAR”

Ogen : 1 Samuel 24:1-15
Pdt. Maria E br Sitepu

-          Penjelasan Teks

a.       1 Samuel 24:1-15

Adi ngerana kita erkiteken cerita enda, harus siinget lebe kejadin engkai maka Saul ngayak-ngayak Daud janah ibunuhna atena Daud enda.

1.      Erkiteken Daud naluken goliath janah cakap kalak si ngatakenca, “Ibunuh saul meribu-ribu tapi ibunuh daud erpuluh-puluh ribu” hal si enda si erbahanca la ngena ate Saul

2.      Sope Daud jadi kela Saul, Daud naluken 200 kalak Pilistin, erkiteken si e tangkas teridah man Saul maka Tuhan ras Dad janah Mihal anakna keleng kel atena man Daud.

Hal si tentuna aneh siakap adi rikutken sada pemahaman eme regenerasi. Tapi sipahami ka adi ibas paksa si e, tentuna saul erpengakap Daud jadi sada ancamen takhta kinirajanna.

Emakana erkiteken si e iayak-ayak saul me daud. Janah ibas sada paksa ngadi saul ibas sada gua ija gua enda pe ingan Daud cebuni ras teman-temanna.

Ibas paksa si e teridah jiwa Daud selaku calon pemimpin

1.      Ietehna Saul eme Pilihan Dibata

Melala ibas kita adi situasi bagenda tentu siakap menguntungkan man banta janah erkiteken si e biasana adi manusia mis buatna kesempaten enda. Tapi Daud sadar bahwa labo e sura-sura Dibata emakana la surung ia munuh Saul aminna pe melala pengajuk arah temanna.

2.      Daud ngerana man saul

Adi siperdiateken bahan enda, siidah uga kinipangen Daud ngerana man saul padahal ibas paksa si e saul sangana ngayak-ngayak Daud guna ibunuhna.

Tentuna enda pe jadi sada hal si banci jadi usihen man kita ibas ate kita berpolitik, ija tentuna ibas berpolitik enda pasti lit lawan politik, tapi si e kerina arus ihadapi alu cara si benar labo alu cara si la benar ntah pe kotor

-          Aplikasi

Erlajar arah pengalaman daud enda, situhunna nggo me jadi sada pelajaran man morianta si terkadang labo meriah akapna ngerana masalah politik, tapi harus inget e la banci terhindari. Daud ngajari moria uga berpolitik secara benar, erkiteken tentuna politik enda situhunna pemere Dibata nari, si tentuna ka enda guna tujunna si mehuli adi ipake alu payo, emakana moria pe harus sadar ras erlajar arah enda, gelah ia pe banci paling tidak jadi penggurun ibas cara berpolitik alu mehuli.