BAHAN PA MAMRE GBKP TGL 15-21 APRIL 2018

BAHAN MAMRE TGL 15-21 APRIL 2018

THEMA:DEMOKRASI

Ogen : Perbahanen Rasul-Rasul 15:6-21

Pdt. Maria E br Sitepu.

-          Penjelasan Teks

1. Perbahanen Rasul-Rasul 15:6-21

Adi siperdiateken bahan enda, emakana lit kuakap perpayona adi sioge ibas ayat 1-5 nari gelah sieteh kai kin persoalen si terjadi emakana banci lit sidang si ilakoken i Yerusalem man rasul-rasul ras penatua-penatua.

Ibas ayat 1 tangkas kal maka si jadi persoalen maka banci lit sidang enda eme masalah sunat. Hal si enda tentuna labo rehna ibas kalak Yahudi si lenga tek man Yesus

tapi rehna ibas kalak Yahudi si nggo jadi Kristen, emakana erkiteken si e iakap lit si mehulina gelah barnabas ras Paulus ngelakoken perjumpan ras Rasul-rasul ras penatua-penatua guna cakapken persoalen enda.

Tapi kepeken sidang enda labo erdalan alu mehuli erkiteken tentuna pasti melala perdebatan si terjadi ije, emakana ibas ayat 7-11, ngerana me Petrus erkiteken uga kin situhuna pandanganna ibas masalah enda. Menarik kal adi siperdiateken uga rasul Petrus ngingetken man kalak si reh ibas paksa si e, kai kin si jadi tujun ibas dahin guna Kristus emakana isingetkenna ka tole uga Dibata labo erndobahen ernin kerina kalak, emakana engkai maka kita mereken persoalen ka man kalak si nggo tek man Kristus khususna masalah sunat ras la sunat.

Emakana kenca si e kerina kalak sinik janah ibegikenna kerina si nggo ilakoken Paulus ras Barnabas nandangi kalak si labo Kalak Jahudi janah kedungenna ngerana me Yakobus alu ngutip bagin Pustaka ibas kitab Amos 9:11-12, ije teridah uga padan Dibata si reh peduakaliken guna nelamatken kerina bangsa subuk e kalak yahudi ntah pe kalak sideban si nggo tek man Kristus.

Tapi tentuna perlu lit hal-hal si perlu i masapken ibas kebiasaan-kebiasaan kalak si non Yahudi (ayat 20)

-          Aplikasi

Demokrasi tentuna si eteh ertina eme salah sada bentuk pemerintahan ija kerina kalak lit hakna guna mereken keputusen si banci merubah kegeluhen kalak enda. Sidang ibas Yerusalem pe cidahken si e kerina, uga kerina kalak banci mereken masuken ibas sada persoalen tapi tentuna kerinana harus ipandang alu kacamata Dibata.

Ibas kegeluhennta enda pe hal si e perlu sipahami janah si ilakoken, subuk ibas jabu bagepe ibas masyarakat, erkiteken kita kerina enda makhluk sosial si memerluken penampat kalak sideban ibas kegeluhennta janah tentuna kita kerina lit perbedan ibas ngukuri sada persoalen emakana perlu lit demokrasi ntah pe runggu gelah sieteh kai kin sura-sura kalak sideban janah arah si e kita banci muat keputusen si mehuli guna kita kerinana.