BIMBINGEN KHOTBAH 09 APRIL 2017

BIMBINGEN KHOTBAH 09 APRIL 2017

PASSION VII (PALMARUM)

THEMA“TUHAN SINAMPATI AKU”

Invocatio : Jesaya 50 : 7

Ogen : Matius 21 : 1 – 11

Khotbah : Jesaya 50 : 4 – 9a

Pdt. Maria E br Sitepu

-          Pengantar

Adi minggu silewat kita ngerana masalah nggeluh ibas sura-sura Kesah SiBadia, emakana teringat aku salah sada lagu adi kita ngerana ngikutken Tema ibas minggu si lewat eme salah sada lagu si cukup popular ibas piga-piga waktu silewat si erbahanca si ngendekenca datken popularitas si luar biasa. Sepenggal lagu enda berisi eme “Kesana kemari membawa alamat, namun yang kutemui bukan dirimu, Sayang yang kuterima alamat palsu”. Siinget tentu Ayu Ting-Ting ia me si erbahanca popular lagu enda.

Menarik kal adi sihubungken ras tema minggu silewat ras tema minggu enda, erkiteken sedekah enda kita ndarami-ndarami sesuatu situhunna si nggo ieteh kita banci erbahanca kita terkelin, tapi erkiteken perukuren doni lalap sipake kita, emakana lanai sidatken kita sie. Matanta lalap tertutup erkiteken kenikmatan doni enda, si man daramen kita situhunna bas doni enda lanai pernah kita jumpa.

Emakana ibas minggu enda, kita ngerana erkiteken penampat si banci erbahanca kita ngasup dalani nggeluh enda.

Ngerana masalah penampat tentuna la banci lepas kita ngerana erkiteken kalak si man sampaten, adi gelarna penampat tentuna pasti lit si man sampatenna. Adi siidah kegeluhennta gundari enda, tentuna melala perbeben si datken kita si erbahanca maun-maun lanai kita ngasup guna ngukurisa, janah erkiteken si e, enterem kalak darami penampat-penampat si deban si sada sisi adi siukuri tersampat situhunna kita, tapi 2 hal banci jadi :

1.      E sifatna temporer

2.      Mabasa kita kubas dalan si gelap

Emakana perlu nge si sadari ras siukuri apai situhunna penampat situhu-tuhu

Ibas bahannta bas minggu enda, khususna ibas bahan khotbahta eme

-          Jesaya 50 : 4-9a

Bagin enda biasana ikataken deutero Yesaya, eme tulisan Nabi Jesaya sangana bangsa Israel ibas tanah tabanen ntah pe tanah pembuangan i babel. Tulisan enda eme sada teguran nandangi bangsa Israel si rusur junggut-junggut ras nalahken Dibata erkiteken kai si terjadi bas dirina. Tapi adi siperdiateken kepeken kesalahen e labo situhunna Dibata erbahanca, erkiteken adi siidah bahan enda, Dibata nggo berena kita kebeluhen eme :

1. Ngerana guna mpegegehi kalak si latih
2. PekekeNa ukurta gelah kita ngasup dengkehken pengajarenNa
3. IberekenNa kita pengertin
4. Deher Dibata ras kita
5. Ngkapiti kita

5 hal enda tentuna jadi sada modal si luar biasa ibas kita ngalahken kerina persoalen si lit ibas kegeluhennta. Tapi enda me maun-maun manusia, nggo ibere Dibata kerinana man bana tapi la ipakena si e kerina, sura-surana ngenca si pake. Emakana ula ka kita rusur junggut-junggut man Dibata tempa-tempa la iperdiateken Dibata kegeluhennta enda. Tapi aminna gia bage mbelin pemere Dibata man banta, lit perlu silakoken gelah tuhu-tuhu pemere e teridah ibas kegeluhennta, ibas

-          Matius 21 : 1-11

Cerita enda nuriken uga pengalo-ngalo jelma si enterem nandangi Tuhan Jesus si sangana ate bengket ku kuta Jerusalem guna ngerayaken paskah kalak Yahudi. Siidah ibas bahan enda, uga luar biasana keriahen kalak ngalo-ngalo Tuhan Jesus. Ibas ayat 8-9 siidah uga jelma :

1. Ngkimbangkenna uisna i dalan, janah lit ka deba ngamparken lambe
2. Erdalan ia arah lebe Jesus janah ersurak ia kerina

2 hal si lakoken kalak enda situhunna luar biasa kal nandangi Jesus ibas paksa si e.

hal si enda pe tentuna la banci lepas arah tanda sengget si ilakoken Jesus ibas matius 20:29-34, ija ibas paksa si e ipepalem Jesus dua kalak si pentang.

Emakana arah bahan enda kita iajarken gelah kita :

1. Perlu lit persiapan

Ibas ayat 1-2, ituriken je uga nandani Jesus bengket ku kuta yerusalem lit harus ilakoken ajar-ajar nandangi Jesus. Tentuna hal si enda pelru silakoken ibas geluhta. Adi ngerana masalah tema sendah Tuhan Sinampati aku, tapi tentuna ibas penampat Dibata enda perlu ka kita persiapken dirinta selaku kalak si merhat isampati.

2. Perlu pengorbanen

Ibas ayat 3-7, siidah uga ajar-ajar mindo kalde man kalak. Tanpa basa-basi banci kataken min bereken kalak ah ndai kalde man ajar-ajar Jesus. Enda pe sada hal ibas kita nggit isampati Dibata, ula setengah-setengah bereken dirinta man Dibata, kerina bereken alu pusuh si meciho ntah alu keikhlasan.

3. Perlu kita ngalo-ngalo Tuhan Jesus enda alu keriahen
4. Perlu pengakun erkiteken Tuhan Jesus

-          Aplikasi

Minggu palmarum ntah pe minggu palma, eme minggu siirayaken kita sope kita bengket kubas minggu paskah. Palma gelarna erkiteken ibas paksa si e adi siidah kai si amparken kalak sangana Jesus atena bengket kubas kuta Yerusalem eme lambe ntah pe palma. Palma enda situhunna melambangkan kemenangan ibas kematen. Emakana bagi temanta “Tuhan Sinampati Aku” arah kematenNa Tuhan Jesus nampati kita ibas dosa si ibahan kita. Tapi perlu siinget adi gelarna penampat tentuna pemahamannta nampati si man sampaten, tapi penampat Tuhan Jesus maun-maun mabasa kita kubas konsekuensi bahwa penampatNa la bagi sura-sura, erkiteken kai?erkiteken Dibata lebe metehsa kai si harus isampatiNa kita ibas nggeluhta. Emakana bagi bahannta ndai ibas matius ibas pengakunnta nandangi Jesus jadi penampatta perlu si endesken dirinta man Dibata, gelah tuhu-tuhu banci si eteh kai situhunna sura-sura Yesus ibas kegeluhennta.