Bimbingen PJJ Tgl. 3 - 9 Mei 2015

BIMBINGEN PJJ TGL. 03 - 09 MEI 2015

Pdt. Larena Sinuhadji

Ogen :

Heber 11:13-16

Tema :

DONI KALAK MATE

Tujun :

Gelah ngawan ni perpulungen :

1. Ngangkai doni kalak mate

2. La nai mbiar ngalaken kematen

Penjelasen Bahan Alkitab

Surat man kalak Heber itujuken man kalak Kristen si sangana ngenanami kiniseran si mesangat erkiteken kinitekenna man Jesus Kristus. E maka icidahken i jenda tokoh-tokoh kalak si tetap erkiniteken alu paguh man Tuhan aminna pe mbue perbeben si man alankenna gelah tetap perpulungen enda pe megegeh i bas ngalaken perbebenna. Bagin si jadi ogenta ngerana kerna kerina kalak si mate i bas kinitekenna, e me Abil, Enoh, Nuah, Abraham, Sara, Ishak, Jakub, Jusuf, Musa, Rahab, Gideon, Barak, Simson, Jepta, Daud, Samuel. Kerina kalak enda mate i bas kinitekenna. Ertina, aminna mbue perbeben sialamina, la pernah tundalkenna ras tadingkenna Dibata, tetap kalak enda kerina ernalem man Tuhan. Aminna kai si ipadanken Dibata la ialokenna, tapi ndauh-ndauh nari enggo idahna si e, maka meriah iakapna. E me pernyataan kerna erkiniteken, maka erkiniteken ertina tek nandangi siarapken kita, tek kerna si la iidah. Aminna pe lenga idahna kai si niarapkenna tapi tek ia maka enggo ialokenna kegeluhen si rasa lalap, si erbahanca ia ermeriah ukur. Jelas iakuina maka ia kerina kalak perlajang i doni enda/kesilang ngenca. Labo doni enda ingan si tetap. Adi Paulus ngatakenca, kita erkemah ngenca bas doni enda (2 Kor. 5:1). La nari atena metedeh nandangi negeri si enggo itadingkenna. Pengalamen bangsa Israel i bas perdalanen i gurun pasir, jungut-jungut ras merawa man Musa tupung litna kesusahen, ras ngatakenca, ulin kami mulihken ku Mesir ras mate i jah, asangken mate i jenda. Tapi pengakun kalak si erkiniteken enda kerina la nari atena tedeh nandangi negerina si mbarenda si enggo itadingkenna, tapi tedehen atena negeri si terulin, e me negeri i Surga. Ayat enda pe nuriken maka uga pa pe resikona i bas perdalanen kegeluhen i doni enda, la pernah menyesal ia i bas ngikuti rencana Dibata, sabab mbelin pengarapenna nandangi negeri i bas Dibata man bana si ndauh ulin asangken Mesir bage pe taneh perpadanen. E maka la ia mela ngakuken Dibata jadi Dibatana, sabab tek kel ia, enggo isikapken Dibata sada kuta man kalak enda kerina.

Perenungen

Labo doni enda ingan si tetap man banta, sada paksa waktu mate kita sitadingken doni enda. Penungkunenna ku ja kita lawes kenca sitadingken doni enda? Enggo pasti kalak si tek enggo isikapken Dibata inganna e me kap i Surga. Ope Jesus lawes nandingken doni jelas nina man ajar-ajarNa, “I bas rumah Bapangku mbas ingan; janah lawes me Aku nikapken ingan man bandu. Tuhu kap kata enda; adi lang labo Kukataken bage man bandu. Kenca Aku lawes nikapken ingan man bandu, reh denga pagi Aku ngalo-ngalo kam, gelah i ja Aku i je kam pe” (Joh. 14:2-4).

Tematna, DONI KALAK MATE. Adi i bas Padan si Ndekah doni kalak mate igelari Syeol (Mas. 6:6, “I bas doni kematen labo Kam iinget, la ise pe muji Kam i je,” Mas. 89: 48-49, Bil. 16:28-34; Mas. 55:15; Ams. 1:12; Yes. 5:14). Sedangken i bas Padan si Mbaru, i bas bahasa Junanina istilah si seri e me kap Hades (kuburen, ingan sementara). Kesimpulenna, maka kalak si enggo mate, baik kalak si tek entah pe si la tek, labo langsung bengket ku Surga entah Neraka, tapi lit i bas sada ingan sementara seh reh Tuhan Jesus peduakaliken i bas Ia ngadili kerina manusia.

I bas salah sada bagin Pustaka si Badia si ngerana ka kerna kematen 1 Tes. 4:13-18, maka kalak si mate si tek man man Jesus tetap ersada ras Jesus. Janah i bas kerehen Jesus si peduakaliken, lebe kalak si enggo leben mate si tek man Jesus si pemena ipegeluh mulihi ras kalak si nggeluh denga asum kerehenNa ipepulungna i datas embun ras ersada ras Jesus. Bage pe i bas Luk. 23:40-43, kerna sekalak penjahat si ngatakenca “Adi kita ma bujur nge bagenda, sabab kita iukum sue nge ras perbahanenta. Tapi Ia labo lit perbahanenNa si salah. E maka nina, “Jesus inget aku asum Kam pagi reh jadi raja.” Nina Jesus, “Kukataken man bandu maka sendah me kam ras Aku i Pardis.” I bas konteks enda, segera ia ras Jesus i Pardis (Surga) ras menikmati kiniersadan ras Jesus tanpa arus nimai kerehenNa sipedualiken. (Bdk. Pardis ras pengangkan Paulus i bas pengenehenenna, 2 Kor. 12:3).

Janah i bas Joh. 5:24-29 jelas Jesus sendiri nuriken maka kalak si tek dingen nggeluh rikuteken si ngena ate Tuhan, ialokenna kegeluhen si tuhu-tuhu si la erkeri-kerin. Ibereken Bapa man Jesus kuasa guna mereken kegeluhen ras ngadili, “Sabap reh me paksana maka kerina kalak mate si i bas kuburen megi sora Anak e, je nari ndarat me ia kerina i bas kuburen e nari. Kalak si enggo erbahan si mehuli ipekeke guna nggeluh; tapi si jahat perbahanenna ipekeke guna iukum.”

Rikutken aya-ayat enda, maka lit kegeluhen kenca kematen. Ope kerehen Jesus si peduakaliken kalak si mate, lebe i bas ingan si sementara, tapi banci langsung ersada ras Jesus bagi pengalamen penjahet si ras Ia isalibken. Si paling penting man banta kita kalak si tek man baNa, maka enggo isikapkenNa ingan si senangna kel, e me kap Surga. Tetap si jaga kinitekenna i bas kegeluhenta i doni si dem keguluten enda. Bagi pengakun Paulus, “E maka genduari enggo sikap pemere kemenangen e guna iendesken man bangku, e me rudang-rudang kebenaren si ibereken Tuhan, Hakim si adil, si iberekenNa man bangku i bas Wari e. Janah pemere e labo man bangku saja, tapi pe man kerina kalak si nimai kerehenNa alu erkeleng ate. Usahakenlah maka pedas kam reh ndahi aku. Alu bage la nari mbiar kita ngalaken kematen, sebab nggeluh ras mate ras Tuhan kita.”