Bimbingen PJJ Tgl. 10 - 16 Mei 2015

BIMBINGEN PJJ TGL. 10 - 16 MEI 2015

(Pdt. Larena br. Sinuhadji)

Ogen :

Matius 28:19, 1 Korinti 11:24-26

Tema :

SAKRAMEN I BAS GBKP

Tujun :

Gelah ngawan ni perpulungen :

1. ngangkai erti ras makna sakramen si lit bas GBKP

2. ncidahken ulih sakramen i bas kegeluhen si teptep wari

Pengertin kata “sakramen” iambil alih i bas kebudayaan Roma, e me kap berasal i bas kata sacramentum (bhs. Latin). Istilah enda iperkenalken Tertullianus (sekalak tokoh Sejarah Gereja si berpengaruh i bas abad II - III) si tangtangna nari, sebage istilah teologis. Kata sacramentum berarti : benda sunci, perbahanen si badia entah pe rahasia suci. Seh asa gundari istilah sakramen enda terus igunaken gereja merujuk ku hal-hal si kudus (badia) si ilakoken i gereja. I bas perkembangenna, Gereja-gereja Reformasi, termasuk GBKP mengakui dua sakramen, e me kap Peridin ras Lakon Persadan si Badia. Makana dua ngenca sakramen bas gereja Protestan umumna, erkiteken si e ngenca iperentahken Tuhan Jesus bas Pustaka si Badia: “Peridiken ia i bas gelar Bapa, gelar Anak, ras gelar Kesah si Badia” (Mat. 28:19); “Enda me dagingKu si ibereken man gunandu. Bahanlah bagenda guna peringet-ingeten man bangKu” (Luk. 22:19). Peridin ras Lakon Persadan si Badia, menjadi tanda ras materai perjanjian Tuhan kerna pengalemi dosa i bas kematenNa i kayu persilang (Mat. 26:26-28). Alu tanda-tanda e ibahan Dibata jaminen kerna perkuah ateNa. Pustaka sibadia ngataken man banta kerna peran tanda-tanda. Pelangi, tanda perjanjian Dibata ras Nuh (Kej 9:13), Sunat tanda perjanjian Dibata ras Abraham bage pe kesusurenna (Kej 17:1). Dareh anak biri-biri siitamaken ibas pintun rumah kalak Israel i Mesir (Kel 12:7) emekap tanda perlindungen Tuhan nandangi kalak Israel i Mesir. Termasuk, duana sakramen enda merupaken tanda keselamaten Jesus Kristus siilakokenna man kerina manusia ibas kematen ras kekekenNa.

Lakon Peridin si Badia erpalas ku bas amanat agung perintah Tuhan Jesus man ajar-ajarNa ope IA nangkih ku Surga (Mat. 28:19). Lawes ku kerina bangsa manusia ras mperidikenca i bas gelar Bapa, Anak ras Kesah si Badia. Baptis (Yun.: baptizo) si ertina: membasuh, membasahi, menyelamkan ku bas lau. Makna i bas baptisen e me kap tanda i bas kegeluhenta si male (duniawi), ibenamken/icelupken ku bas kematen Kristus, gelah bagi Kristus ipekeke i bas si mate nari, kita pe nggeluh i bas kegeluhen si mbaru. Kalak si iperidiken (ipercik/igedapken bas lau), lau e labo berubah menjadi lau si berkasiat. Simbol lau ngatakenca maka kalak si enggo iperidiken, enggo itanemken ras Jesus ras radu ras Jesus ka keke i bas simate nari. Nuduhkenna maka kalak si enggo iperidiken, enggo nggeluh i bas kegeluhen si mbaru (Rom. 6:4). Jadi peridin e me kap tanda/materai perpadanen Dibata ras manusia kerna keselamaten si enggo ilakoken Jesus i bas IA mate i kayu persilang.

Perbedaan pendapat Gereja-gereja Reformasi ras Gereja-gereja beraliren Pantekostal & Kharismatik, e me kap kerna baptis selam entah baptis percik. Bagi gereja-gereja Pantekostal, baptis selamat iakap paling Alkitabiah, erkiteken Jesus pe ibaptis Johanes Peridin alu igedapken i Sungai Jordan (Mat. 3:13-17, Mark. 1:9-11; Luk. 3:21-22). Maka la akapna sah adi lenga iperidiken secara gedapken. Makana lit istilah kalak enda “baptis ulang,” erkiteken lit anggapen peridin alu igedap ngenca si banci menyelamatken. Padahal jelas, si nelamatken manusia labo cara-cara teknis, tapi kiniteken man Jesus Kristus si enggo nelamatken kita.

Erkiteken sakramen Peridin si Badia merupaken iketen perpadanen antara Dibata ras manusia, maka peridin man anak-anak pe ibereken (labo menjadi persoalan teologis). Sabab Tuhan sendiri si berinisiatif i bas iketeken perpadanen e. Adi sikaitken ku bas PL, perpadanen si ibahan Dibata man manusia erkelengken Abraham e me kap sunat. Kej. 21:4, “Ikataken maka Abaraham menyunatken Ishak anakna si umurna 8 wari denga.” Ertina, iketeken perpaden e, banci ilakoken aminna pe lenga iangka anak-anak e. E maka tanggung jawabta guna membimbing ras mabai ia guna nggeluh i bas malang man Tuhan. Selain si e, i bas Pustaka si Badia pe lit contoh-contoh peridin man anak-anak amin pe la isebutken secara spesifik, misalna man Kryspus sada jabu bas Perb. Rasul 18:8, sada jabu e termasuk ras anak-anakna. Bage pe man keluarga Lidia i bas Perb. Rasul 16:15.

Sakramen Lakon Persadan si Badia (LPS) itetapken gereja erpalas ku bas tindaken ras karya Tuhan Jesus sendiri raduken ras ajar-ajarNa. Ope IA ngenanami kiniseran, Jesus erbahan acara perjamuan makan malam terakhir. Erpalas ku bas perikopta, maka fungsi/makna i bas LPS e me :

1. Berpungsi sebage peringet-ingeten kerna karya keselamaten si enggo ibahan Jesus Kristus (“Lakokenlah bage guna peringet-ingeten kerna Aku,” 1 Kor. 11:24b,25b). Roti ras lau anggur si ilayanken i bas LPS, labo ka erbahanca berubah jadi daging ras dareh Jesus. Tapi ncidahken karya keselamaten Dibata arah Jesus i bas ia ngendesken kulana (Roti) ras ngamburken darehNa (lau anggur), guna pengalemi dosa.
2. Berpungsi sebage iketeken kiniersadan (persekutuan), e me kap kiniersadan ras Jesus Kristus si enggo menang bage pe membangun kiniersadan ras perpulungen sebage sada kula ni Kristus.
3. Berpungsi sebagai pengharapan eskatalogis (kerehen Jesus sipeduakaliken, ay. 26b, “Alu bage iberitakenndu kematen Tuhan, seh ngayak IA reh mulihken”). Ertina, arah kita erbahan LPS, kegeluhen kalak si tek tetap iarahken ku bas pendungi jaman. Jadi LPS e me kap merupaken tanda penantian iman kerna kerehen Kinirajan Dibata (paripurna), alu bage perpulungen tetap ersikap katawari paksa pe guna mengaplikasiken geluh kinitekenna.