Bimbingen Khotbah Minggu 10 Mei 2015

BIMBINGEN KHOTBAH MINGGU 10 MEI 2015

Pdt. Larena br. Sinuhadji (Nd. Reynard Tarigan)

Invocatio :

“Tutuslah ibas ertoto, janah sanga kam ertoto ersikaplah dingen kataken bujur man Dibata” (Kolose 4:2)

Ogen :

Masmur 22:25 -31 (Anthiponal)

Khotbah :

Perbahanen Rasul-Rasul 10:44-48 (Tunggal)

Tema :

LA ERNDOBAHEN I ADEPEN DIBATA

Penjelasan Bahan Alkitab

Perikop enda ibere judul “Kesah si Badia nusur man si labo kalak Jahudi” (Bangsa-bangsa lain yang bukan Yahudi menerima Roh Allah).

Perikopta ilatarbelakangi kerna kehadiren Petrus ras piga-piga kalak si tek si reh i Jope nari i rumah Kornelius sekalak komandan Pasuken tentera Romawi. Kerehen Petrus erkiteken penjemba Kesah si Badia arah pengenehenna sada lembar uis si mbelang ras idatasna lit erbage-bage rubia-rubia si njoler bage pe perik-perik si meliar, si ngatakennca man Petrus kekekenlah ras panlah rubia-rubia e. Pengenehenen e jadi telu kali. Ope si e, Kornelius si sangana ertoto jam telu karaben, ia pe dat pengenehenen i ja Malekat Tuhan reh dingen ngatakenca man bana maka pertotonna enggo ibegiken Tuhan janah enggo iidah Dibata kai si sedekah enda ilakoken Kornelius i bas nampati kalak musil. Janah i bas pengenehenenna isuruh Malekat ia guna ngelegi Simon Petrus si sangana i Jope. Arah e dalan-dalanna Petrus reh ras mberitaken Berita si Meriah i rumah Kornelius, i ja enggo pulung kerina kade-kadena bage pe teman meriahna si enggo itenahkenna (ay. 24). Arah kerehenna ku rumah Kornelius dingen arah pengenehenen Kornelius igejapi Petrus maka la erndobahen iakap Dibata manusia e. Tep-tep manusia i bas bangsa siapai nari gia, adi ia erkemalangen man Dibata dingen mehuli perbahanenna, ialoken Dibata kap. Janah terus Petrus bersaksi kerna Jesus Kristus, si enggo mate ras keke i bas si mate nari, si jadi Juruselamat manusia. Nina Petrus maka ajar-ajarNa termasuk ia sendiri enggo iutus guna meritaken man jelma si nterem dingen naksiken maka Jesus me si enggo itetapken Dibata guna ngadili kalak si nggeluh ras si enggo mate (ay. 44). Tupung Petrus ngerana denga nusur me Kesah si Badia man kerina kalak si megiken berita e. Teman-teman Petrus si reh ras ia si reh i Jope nari si enggo tek, kemamangen atena, erkiteken man kalak si labo Jahudi pe icucurken Dibata Kesah si Badia. Kalak enda kerina ngerana i bas erbage-bage cakap si deban, dingen ipujiNa Dibata (berkata-kata dalam bahasa Roh dan memuliakan Allah). E maka nina Petrus, arah penungkunen retoris, maka kalak enda enggo ngaloken Kesah si Badia bali ras kalak Jahudi si tek i Jerusalem asum rehna Kesah si Badia, banci kin siambati i bas kerina kalak enda iperidiken i bas gelar Jesus? Arah kai si nilumbaken Petrus maka tuhu-tuhu iakui Petrus kerehen Dibata i bas peristiwa enda, bali ras Dibata hadir i bas wari Pentakosta. E maka la lit alasen guna menolak kalak enda iperidiken i bas gelar Jesus. Janah asum Petrus tading denga piga-piga wari i Kaisarea rikutken pemindon kalak enda kerina, tuhu-tuhu igejapina maka kalak non-Jahudi pe enggo ialoken sebage bagina i bas perpulungen kalak si tek, janah kalak Jahudi ras non-Jahudi pe banci ersada erkiteken kiniteken man Kristus Jesus.

Bagin pengogen si pemena e me kap kerna ungkapen Pemasmur arah ertoto ras penangkih ende-enden pujin tupung ia ngalaken kiniseran. Awalna penggejapen Pemasmur maka Dibata nadingken ia dingen la ialoina tupung ia erlebuh man Tuhan. Tapi kepeken penggejapenna enda lepak. I bas ay. 25 maka icidahken Pemasmur, Dibata e la erndobahen, tetap iperdiatekenNa ras ialoiNa kalak ras si ngenanami kiniseran (Allah tidak memandang hina dan merasa jijik terhadap kesengsaraan orang yang tertindas). Arah penampat ras perkuah ate Tuhan, maka Pemasmur ngangkatken pujian man Tuhan, dingen maba persembahen si enggo ipadankenna ndube. Kerina kalak si enggo nggejapken kinulin Tuhan ersembah man baNa. Ay. 28 kerina suku bangsa mulihken nembah man baNa, kalak si meganjang ukur erjimpuh i lebe-lebeNa (lit kesadaren), manusia si ermasap-masap erjimpuh iadep-adepenNa, kesusuren si nandangi reh pe ersembah man Tuhan, bahkan man si lenga tubuh pe enggo ituriken maka Tuhan enggo engkelini bangsaNa.

Perenungen

I bas Minggu Rogate, Minggu Ertoto, Firman Tuhan mpersingeti kita maka la erndobahen kita iadep-adepen Dibata. Sabab terkadang kita si erbahan pemisahen ras pengkotak-kotaken. Pendahin Kesah si Badia la banci ibatasi alu kai pe, subuk suku, bangsa, tingkat pendidiken, sosial termasuk Gereja. Sabab lit pernyataan si ngatakenca, “i gereja suku la lit Kesah si Badia.” Kesah si Badia secara leluasa erdahin rikutken sura-sura Dibata. Kesah si Badia erbahanca Gereja e berkembang ambah warina. Perkataan Gamaliel tupung tua-tua kalak Jahudi ngolangi pendahin Petrus ras Rasul-rasul si deban, “Pelepas sajalah, sabab adi i bas manusia nari kin ajarenna, masap nge pagi. Tapi adi i bas Dibata nari, labo mungkin kam ngasup ngolangisa, banci jadi kam nge si ngelawan Dibata” (Perb. 5:38-39). Kesah si Badia, si mpengasup Gereja subuk secara pribadi ras lembaga ngalaken erbage-bage tantangen ras nggeluh jadi saksi Tuhan subuk arah kata ras perbahanenna. Sabab jelas ulih Kesah si Badia, litna kekelengen, kesabaren, kiniulin, keriahen ukur, kesetiaan, pengusaan diri, rsd. (Gal. 5:21-22).

Kesah si Badia erbahanca kalak si enggo ngaloken peridin tetap iperlengkapi alu pengajaren kata Dibata, i ja paksa si e ipindokenna piga-piga wari Petrus tading i Kaisarea. Janah enda sue ras Amanat Agung Tuhan Jesus ope Ia nangkih ku Surga. Mat. 28:19-20a, “Laweslah ku kerina bangsa manusia, bahanlah ia jadi ajar-ajarKu. Peridiken ia i bas gelar Bapa, gelar Anak, ras gelar Kesah si Badia, janah ajari ia ngikutken kerina si enggo Kupedahken man bandu.” Labo hanya terjeng iperidiken/ngawanken ras tercatat jadi anggota tapi iajerken gelah tambah pengangkanna kerna Kata Dibata. Ertina, arus i je timbal balik, Gereja siap guna mereken pengajaren, dingen si bersangkuten tutus ate guna ngaloken pengajaren.

Minggu enda, Minggu Ertoto, si tole mpersingeti kita maka kalak si tek la banci erleka ras Tuhan. Gegehta, kegasupenta ndalani wari-wari erkiteken kerembakenta ras Tuhan, secara khusus arah pertotonta. Arah kita ertoto, reh paguhna kinitekenta, sura-sura Dibata e reh tangkasna man banta, amin sekali la bagi ukurta si jadi, tapi tek kita maka ieteh Dibata kai si terbaik i bas geluhta. Bagi Pemasmur i bas pengogen si pemena, i ja penggejapken awalna, Tuhan la mperdiateken ia. Tapi kedungenna tek ia Dibata tetap mperditeken ia ras kalak si tetap erkemalengen man Tuhan. I bas Invocatio, tole Paulus mpersingeti kita tetap tutus i bas ertoto, janah sangana kita ertoto ersikap dingen kataken bujur man Dibata.