Bimbingen Khotbah Kamis 14 Mei 2015

BIMBINGEN KHOTBAH KAMIS 14 MEI 2015

PERINGETEN TUHAN JESUS NANGKIH KU SURGA

Pdt. Larena br. Sinuhadji (Nd. Reynard Tarigan)

Invocatio :

“Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda." Kenca ikatakenNa si e iangkat Ia ku Surga i lebe-lebe rasul e nari, jenari lit embun ngeligeni Ia erbahanca lanai Ia idah rasul-rasul e.” (Perbahanen Rasul-Rasul 1:8-9)

Ogen :

Masmur 8:2-10 (Responsoria)

Khotbah :

Matius 28:16-20 (Tunggal)

Tema :

JADIKEN KERINA BANGSA JADI AJAR-AJAR-KU

Penjelasan Bahan

Matius 28:16-20 e me kap perikop kerna perjumpaan Jesus si terakhir ras ajar-ajarNa kenca IA keke i bas si mate nari. Ajar-ajar Jesus si 11 kalak (Judas Iskariot enggo ndelisken bana, Mat. 27:5), lawes ku Galilea bagi si ikataken Jesus man diberu-diberu tupung Jesus keke i bas si mate nari (bdk. Ay. 10, “Nina Jesus man bana, "Ola kam mbiar to lawes, suruh senina-seninangKu ku Galilea. I jah idahna me Aku.”). Asum idah ajar-ajar e Jesus, isembahna IA, aminna gia piga-piga kalak i bas ajar-ajar e sangsi. Labo jelas kai si erbahanca piga-piga i bas ajar-ajar e sangsi. Banci jadi, erkiteken enggo ieteh ajar-ajar e maka Jesus enggo mate ras ikuburken, lit keraguan, apakah tuhu Jesus e enggo keke i  bas si mate nari.

Kenca bage ideheri Jesus ajar-ajarNa ras mereken piga-piga hal :

• Enggo ibereken Dibata man Jesus kerina kuasa i surga ras i doni. Ertina, kerina kuasa tunduk i bas kuasa Tuhan Jesus. I bas diri murid-murid ras manusia tetap mengandalken kuasa Tuhan, sabab beliden kuasa Tuhan Jesus asangken kuasa kai bas doni enda. Bahkan i Surga pe IA erkuasa.
• Ajar-ajar isuruh guna lawes ku kerina bangsa manusia. Perentah enda sedalanen ras kai si ikataken Jesus man ajar-ajarNa ope IA nangkih ku Surga, “Tapi ialokenndu pagi gegeh asum Kesah si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda.” (Perb. Rasul 1:8). Ertina, perintah guna lawes ku kerina bangsa manusia, sebab6 keleng ate Tuhan e secara universal, la hanya kalak Jahudi si enggo ipilihNa.
• Ras bahan ia kerina jadi ajar-ajar Tuhan. Guna jadi ajar-ajar Tuhan, arus lebe iperidiken i bas gelar Bapa, gelar Anak ras gelar Kesah si Badia. Amanat enda merupaken dahin sakramen i bas gereja guna mperidiken kalak si tek man Jesus guna ngaloken keselamaten i bas Jesus ras bengket ku bas perpulungen kalak si tek.
• Ngajari kalak si enggo iperidiken ndai guna ngikutken kerina si enggo ipedahken Tuhan Jesus man ajar-ajarNa. Ertina, tugas ajar-ajar (gereja) labo hanya terjeng mperidiken tapi mpelengkapisa alu pengajaren Firman Tuhan gelah lit pertumbuhen kiniteken kalak si enggo tek man Jesus.

Padan Tuhan Jesus tetap nemani ajar-ajarNa seh kedungen jaman enda. Enda me si arus iinget ajar-ajar gelah ula mbiar i bas ndalani tanggung jawab si enggo ibereken Tuhan Jesus, amin mbue tantangen.

I bas ogen si pemena, Pemasmur nehken puji-pujin man Tuhan erkiteken kiniulin si enggo ibereken Tuhan man manusia, si kin si tuhuna la metunggung manusia ngalokenca. Kemulian Tuhan si luar biasa si teridah i belang-belang doni. Bahkan kemulian Tuhan teridah arah manusia si ibereken Tuhan man bana kemulian ras kehamatenka. Posisi manusia iteruh Tuhan, janah itangkuhken manusia e guna jadi ‘raja’ merentah kerina tinepa Dibata si deban (bdk. Kej. 1:28, “Demi, dingen taluken ras kuasai kerina rubia-rubia”). Kerina itamaken Tuhan i tapak-tapaken nahen manusia. Tanggung jawab si mbelin si enggo ibereken Tuhan man manusia arus idalanken alu mehuli. Manusia tetap ngasup ncidahken kemulian Tuhan arah tanggung jawab si ibereken Tuhan man bana. Sabab melala contoh banci siidah, manusia menyalahgunakan tanggung jawab e, si akhirna ncurnaken gelar Tuhan erkiteken keegoisen, kerangapen i bas ncedaken tinepa Dibata si deban. Bahkan sesama manusia pe kurang ngasup ia ngkelengisa (homo homini lupus : manusia menjadi serigala bagi sesamanya).

Perenungen

Wari Kamis enda kita mperingeti wari Tuhan Jesus nangkih ku Surga. Kenca 40 wari Jesus keke i bas si mate nari, icidah-cidahkenNa diriNa man ajar-ajarNa, guna mbuktiken man ajar-ajarNa maka Jesus tuhu-tuhu nggeluh (Perb. Rasul 1:3). Janah i bas kita mperingeti kenangkihen Tuhan Jesus, Firman Tuhan mpersingeti kita guna kita jadi saksi Tuhan si nggeluh, “Jadiken kerina bangsa jadi ajar-ajarKu.” Kita, kalak Karo e me kap hasil penginjilen zending Belanda nari ras piga-piga hamba Tuhan Minahasa nari. Ajar-ajar Tuhan Jesus si enggo idemi kuasa Kesah si Badia, berpencar ku erbage-bage daerah seh makana enggo enterem kalak si tek man Jesus. Tanggung jawabta guna bersaksika man kalak si deban si lenga tandaiNa Jesus Kristus. Bersaksi kita alu kata ras perbahanenta. Tapi si la kalah pentingna e me situhuna soal pengajaren kenca iperidiken gelah paguh kinitekenna ras ernanam man sekelewetna.