Bimbingen Khotbah Minggu 31 Mei 2015

BIMBINGEN KHOTBAH MINGG 31 MEI 2015

MINGGU UEM & TRINITATIS

(Pdt. Larena br. Sinuhadji)

Invocatio :

"Kupilih kam ope denga Kubereken man bandu kegeluhen. Ope denga kam tubuh enggo Kuserapken kam jadi nabi man bangsa-bangsa.” (Jeremia 1:5)

Ogen :

Ketangkasen 4:1-11 (Tunggal)

Khotbah :

Jesaya 6:1-8 (Tunggal)

Tema :

I JENDA AKU SURUHLAH AKU

Penjelasen Bahan Pustaka

Bahan ogenta ngerana kerna pengenehenen Johanes si idemi alu kuasa Kesah Si Badia (ay. 2),  i ja idahna talang pintu i surga. I bas pengenehenenna, Johanes idilo Jesus Kristus guna bengket ku surga guna ngenehen peristiwa-peristiwa si terjadi i bas doni “arah datas nari” (maksudna, arah sudut pandang Dibata). Idahna kursi Kinirajan Surga ras ikeleweti enterem kalak ras erbage-bage hal si ikut muat bagin i bas karya penyelamaten Dibata (ay. 2-6a). Kalak si enterem e me kap 24 kalak Pertua-pertua (ay. 4), e me 12 suku Israel ras 12 Rasul-rasul Tuhan si enggo ndatken keselamaten ras enggo imuliaken Dibata. Si deban, e me kap 4 mahluk si nggeluh, si dem mata arah lebe ras arah pudi. Tep-tep mahluk e lit enem kabengna janah kerina kabeng e dem mata arah bas ras ndarat. Mahluk e la erngadi-ngadi rende suari ras berngi (ay. 6b-7). Mahluk-mahluk e simbol tinepa Dibata si enggo iselamatken Dibata. Je nari lit lawit kaca (ay. 6), lawit e me simbol kejahaten si menentang Dibata si enggo italuken Dibata kuasana. Maksud i bas pengenehen Johanes enda e me kap, gelah Gereja entah pe kalak si tek si enggo ngaloken keselamaten i bas Dibata nari (i bas paksa si e, entah paksa gundari) tetap menilai kai pe si terjadi i bas geluhna alu kacamata kiniteken man Dibata. Engkai? Erkiteken Tuhan erkuasa i bas sejarah, ras la lit sada peristiwa pe si terjadi i tengah-tengah doni enda tanpa campur tan Dibata. E maka kerina peristiwa si terjadi i bas sejarah nandangi GerejaNa bage pe kalak si tek, arus siimani sebage rencana Dibata guna kinulin kalak si erkeleng ate man Tuhan. Dibata la pernah nadingken GerejaNa, bage pe kalak si tek i bas panggung sejarah. 24 kalak Pertua ras mahluk-mahluk i surga si inen Johanes e me bukti kemulian Dibata si bakal idatken GerejaNa ras kerina kalak si tek si tetap bertahan ngadapi kerina tantangen si lit i bas sejarah doni enda. E maka ola mbiar, tetaplah nggeluh i bas Dibata.

I bas bahan khotbahta, Jesaya idilo Tuhan jadi nabi, ikaitken ras kematen raja Uzia. Adi sioge 2 Raja 15, i bas masa pemerentahen raja Usia i ja 16 tahun denga usiana ia enggo jadi raja, janah kidekah 52 tahun ia memerentah jadi raja. Memang tantangna ia jadi raja, luar biasa pembaharuan si ibahanna, tapi la total pembaharuan si nilakokenna. Ingan ersembah man dibata-dibata si deban la radaskenna, arah si e mabai bangsa Israel ersembah man 2 Tuhan. Termasuk pemimpin-pemimpin si deban pe la jadi contoh. Si lit sen ngenca kasusna ibelana, bahkan la lit kebujuren. Si megegeh nindes si la megegeh. Secara ekonomi, politik, keamanan, sosial, morat-marit. I bas situasi si bagenda me Dibata ndilo Jesaya jadi suruh-suruhenNa. Icidahken man banta i bas sada pengenehenen, idahna Tuhan i bas Rumah Pertoton. Ia sangana kundul i bas kursi kemulianNa, jubahNa ndemi kerina Rumah Pertoton. Isekelewetna lit tedis Malekat Serafim, si ernala-ernala bagi api, lit 6 kabengna (2 nutupi ayona, 2 nahena, 2 nari guna ia kabang). Sialon-alon kerina Malekat Serafim e rende muji Tuhan, “Badia, badia, badia Tuhan si mada kuasa badia kap, doni enda dem alu kemulianNa.” Bagem bagi sora koor, merdu, erbolo-bolo, seh makana palas Rumah Pertoton e mugur-ugur ibahan sorana janah Rumah Pertoton dem alu asap. I bas perjumpaanna ras Tuhan, sedar Jesaya kerna dirina, sedar ia kerna Dibata mada kuasa si enggo idahna, minter iungkapkenna, “Cilaka me aku.” Itandai Jesaya dirina kalak si perdosa, meluat, tiap ranan si mentas i bas biberna nari dosa kerina, bahkan tading bas lingkungen si perdosa ka. Penggejapen kerna dosana secara pribadi, kinilatunggungenna, janah dosa bangsana. Kenca idahna Tuhan, la nai iakapna ia metunggung, la layak. Kenca bage sada i bas Malekat Serafim ndai nari kabang ndahi Jesaya. Ibabana rara si ibuatna i bas batar-batar persembahen nari alu jepit-jepit. Ikuitna biber Jesaya alu rara ndai, jenari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi.” Api e me sada lambang penyucian, pembersihen. Jesaya isuciken alu api sebagai lambang ia enggo ibersihken, ikudusken seh makana la nari seri ia ras situasi sekelewetna. Jesaya nggejapken, ia si awalna la metunggung, enggo ipetunggungken Tuhan, lit proses pendamaian arah pengalemi dosa i bas Dibata nari, si erbahanca gundari lit perbedaanna, lit gegeh si mbaru, semangat si mbaru. Jesaya ijadiken Tuhan Jesaya si mbaru, tampil beda ras kalak si deban. E maka nina Tuhan, “Ise enda Kusuruh, ise si nggit maba berita i bas Aku nari?” E maka minter ialoi Jesaya, “Enda aku Tuhan, suruhlah aku.” Igejapi Jesaya, Tuhan si mpetunggungken ia, si melayaken ia, si mereken gegeh, makana pang ia ngatakenca “I jenda aku Tuhan suruhlah aku.”

Perenungen

Erbage-bage cara Tuhan ndilo kita jadi alatNa, perkakasNa. Lit deba bagi Musa, Jeremia (bagi invocatio-ta) benaken bas bertin nari, bagi Paulus mantan penganiaya kalak Kristen, termasuk kita. Si pasti  kita enggo masuk ku bas rarasen Tuhan, enggo ngaloken tanda peridin i bas Dibata nari, enggo itebusNa, enggo imenangken, janah enggo iberekenNa Kesah Si Badia demi pusuh ras ukurta. Sura-sura Dibata kita kerina banci jadi perkakasNa, alatNa guna menyuarakan suara kebenaren, guna mpermuliaken gelar Tuhan, rikutken situasi, kondisi, talenta, profesinta sekalak-sekalak. Proses bagi si ialami Jesaya enggo ialami, kita enggo ibersihken, iselamatken bahkan enggo ibereken Tuhan Kesah Si Badia erdahin i bas kita si tetap mpelimbarui geluhta, si nampati, si mpegegehi, si ngapuli. Ertina, iperlengkapi Tuhan kita, la kita itadingkenNa. Tapi melala kita la sitandai banta, la sieteh ngataken bujur. Entah pe sitandai banta, tapi la kita nggit reh ku Tuhan guna ipelimbaruiNa (ditransformasikan, diubahkan Tuhan). Lit deba perpulungen e la ku Gereja alu alasen melala dengan dosa silakokenna, “La aku layak ku Gereja” (padahal Gereja bukan untuk orang yang bersih tapi man kalak si igejapina ia mbue ngelakoken kesalahan, la metunggung iadep-adepen Tuhan). Tuhan ngenca alu keleng ateNa banci mbersihken ia i bas kerina dosa nari. Penandaita kerna Tuhan merupakan dasar i bas kita banci nandai banta, kita kalak perdosa. Desken pengalamen Jesaya asum ia berhadapan ras Tuhan. La lit dosa si banci ibuniken asum kita jumpa ras Tuhan.

Perkuah ate Tuhan beliden asangken dosa-dosanta. Uga pe belinna dosa-dosata, Tuhan la pernah nadingken kita. Dietrich Bonnhoofer, “Grace is free, but is not cheap.” Anugerah Tuhan itu memang diberikan secara gratis (free) tetapi itu bukan anugerah yang murahan (cheap) karena di dalamnya ada satu pribadi tidak berdosa dan tidak bercela yang harus mati, mencurahkan darahNya menanggung dan mengampuni dosa-dosa kita. Pengangkan si bagenda rupana mabai kita nggit guna ipake Tuhan, jadi perkakasNa, benaken i bas jabunta, sektor, inganta erdahin, sekolah, i japa pe (terpanggil kita, kepate kita). Kisah Bob Bufford, CEO Bufford Television, si ipasu-pasu Dibata. Lit 3 hal si banci sipelajari arah geluh Bob Bufford: 1) Hidup yang bermakna adalah bukan hanya sekedar sukses, diberkati, tetapi juga berbagi kesuksesan dan berbagi berkat bagi orang lain. 2) Hidup yang bermakna bukan sekedar puas diri, tetapi membuat orang lain yang berinteraksi dengan kita merasakan kepuasan yang sama (kita ngenca puas, senang, kalak menderita siban). 3) Hidup bermakna itu jika kita tahu apa tujuan untuk menempatkan kita di dunia ini, yaitu  memberitakan Kabar Baik/Sukacita, memuliakan Tuhan (zona nyaman perlu digoyang).

Minggu Trinitatis (trinitas: tritunggal, Dibata si telu sada) mabai kita nginget kerna kebadiaan Dibata Bapa, Jesus Kristus ras Kesah Si Badia i bas GerejaNa ras i bas kegeluhen kalak si tek (nen Kata Penaruh i bas Liturgi Kebaktin Minggu Trinitatis). Bage pe i bas Minggu UEM (nen cataten i teruh) enda, ipersingeti mulihi kita kerna tugas misionerta, pendilo Tuhan man banta, e me meritaken Berita Si Meriah i japa pe kita ringan alu kai pe si banci ilakoken kita, gelah melala kalak i sekelewetta nandai Jesus Kristus. “Enda aku Tuhan suruhlah aku” menjadi semangat i bas kita ndahiken pendilo Tuhan e. Lit i je niat, kesediaan, kesungguhan, komitmen, kosistensi (la mburlah-mburlih) sebab idahiken subuk senang, susah, bagi ukur la bagi ukur, ula meros, ula menggo, ula mbue alasen, termasuk kita si enggo ibereken Tuhan tugas khusus. Enggo pasti melala tantangen, tapi bagi ogenta, Dibata si erkuasa i bas sejarah, enggo ibuktikenNa menang IA naluken kuasa kejahaten, la pernah tadingkenNa kita. Nehenlah kerina tantangen si ihadapi kita i bas sejarah geluhta alu kacamata iman man Dibata bahwa e kerina terjadi guna kiniulinta, guna keselamatenta. E maka ola mbiar, tetap kita ernalem man Tuhan i bas nehi sura-suraNa sabab KesahNa Si Badia tetap nemani ras nampati kita seh rasa lalap.

Cataten :

RMG (Rheinische Missionsgesellschaft), tahun 1970-an menjadi VEM (Vereinte Evangelischen Mission), sejak 1996 menjadi UEM (United Evangelical Mission), lembaga misi dari Jerman yang berkarya di Sumatra Utara sejak tahun 1861, kini menjadi wadah persekutuan internasional 34 Gereja-Gereja di 3 benua (Asia, Afrika, Eropa) yang tetap melakukan misi Pekabaran Injil melalui berbagai program-programnya. UEM merupakan mitra GBKP (mungkin) sejak 8 Februari 1979 karena pada tanggal tersebut dibentuk Sekretariat Bersama Gereja-Gereja Partner VEM disingkat SEKBER partner VEM di Sumatra Utara (Medan), dan sejak tahun 1996 menjadi SEKBER UEM.