Bimbingen Khotbah Minggu 24 Mei 2015

BIMBINGEN KHOTBAH MINGGU 24 MEI 2015

PENTAKOSTA

(Pdt. Larena br. Sinuhadji)

Invocatio:

“Si nampati, e me Kesah Si Badia, si isuruh Bapa pagi i bas gelarKu, iajariNa kam kerna kai pe; dingen ipersingetiNa kam pagi kerna kerina si enggo Kukataken man bandu.” (Johanes 14:26)

Ogen:

Masmur 139:1-12 (Antiponal)

Khotbah:

Perb. Rasul 2:22-23 (Tunggal)

Tema:

KESAH SI IPADANKEN DIBATA

Penjelasen Bahan Pustaka

Bahan Khotbahta, Perb. 2:22-23, e me kap bagin i bas khotbah Petrus kenca peristiwa Pentakosta. “Pentakosta” (bhs. Yunani) ertina “wari pe-50-ken” kenca kekeken Tuhan Jesus Kristus. I bas tradisi Yahudi, Pentakosta e me kap Shavout (Ibr. ertina “minggu-minggu”) e me kap wari raya pengataken bujur kerna masa panen gandum, si nirayaken 7 minggu berturut-turut kenca Paskah. Paskah i bas tradisi Jahudi e me kap peringeten ndaratna bangsa Israel i bas perbudaken Mesir nari (Im. 23:5; Bil. 9:1-4; 28:16), si nilaksanaken tep-tep bulan Nisan (sekitar bulan Maret ras April i bas kalender Masehi).

Paskah ras Pentakosta i bas tradisi Kristen la nari irayaken bali ras tradisi Jahudi, erkiteken Tuhan Jesus keke tepat i bas kalak Jahudi mperingeti wari raya Paskahna, ras kenca wari pe-50-ken kekeken Tuhan Jesus i je me nusur Kesah Si Badia bagi si enggo ipadankenNa man ajar-ajarNa (Luk. 24:49; Yoh. 14:16-17,26; Yoh. 15:26; Yoh. 16:7-14; Kis. 1:8). Khotbah Petrus man ribuan kalak Israel si enggo pulung i Jerusalem guna merayaken wari raya Shavout e me kap kerna kesaksianna nandangi Jesus Kristus si pernah hadir i tengah-tengah ajar-ajarNa alu tanda-tanda sengget, je nari mate isalibken, keke i bas si mate nari. Kenca Tuhan Jesus nangkih ku surga, maka nusurlah Kesah Si Badia si enggo ipadanken Tuhan Jesus. Lit 3 hal penting si terjadi asum nusurna Kesah Si Badia. Si pemena, ajar-ajar Tuhan si awalna percicik jadi pang (berani) guna naksiken Berita si Meriah. Si peduaken, Kesah Si Badia menggerakken enterem kalak guna megiken khotbah Petrus ras jera i bas dosa nari je nari mereken dirina guna iperidiken, kira-kira lit 3000 kalak (Perb. Rasul 2:41). Si peteluken, Kesah Si Badia erdahin tepat i bas perayaan wari raya Shavuot, i ja enggo terjadi pembaharuan, pemaknaan baru, nandangi tradisi Jahudi kerna pengataken bujur. Kesah Si Badia maba sada pembaharuan si mehuli.

Invocatio, Yoh. 14:26, e me kap kerna padan Tuhan Jesus nandangi ajar-ajarNa guna mereken Pengapul (Si Nampati), e me kap Kesah Si Badia, alu kapasitasNa si banci ngapuli, ngajari kerna kai pe, dingen mpersingeti kerna kerina si enggo ikataken Tuhan Jesus. I bas Pasal si seri khususna i bas ay. 16-17, Kesah Si Badia ibahasaken Tuhan Jesus sebage Si Nampati, Kesah Kebenaren si fungsina tentu saja nampati ajar-ajarNa guna mereken kesaksin guna ngelumbaken kebenaren ras tetap nemani ajar-ajar e seh rasa lalap. I bas Joh. 16:7-14, ikataken maka Kesah Si Badia (Pengapul), berfungsi guna menyadarken manusia i bas dosa, mpetangkas kebenaren Kata Dibata, mpersingeti kerna ukumen si pepagin, ras mpermuliaken Dibata. Banci ikataken, maka Kesah Si Badia si nipadanken Dibata e tuhu-tuhu bas Ia lit gegeh (daya) ras fungsi si luar biasa man kalak si tek man baNa.

Pengogen, Mas. 139:1-12, e me kap kerna pengakun kiniteken Pemasmur kerna ke-Maha Hadir-an Dibata (Omnipresence), ke-Maha Tahu-an Dibata (Omniscience), ras ke-Maha Kuasa-an Dibata (Omnipotence). Dibata la banci ibatasi alu batasan-batasan si ibahan manusia. Tuhan erkuasa i bas kerinana. IetehNa kai pe, termasuk si la ieteh manusia pe. Dibata hadir i japa pe, digan saja pe, katawari saja pe, la ibatasi ruang ras waktu.

  

Perenungen

Enggo seminggu kita ngikuti Pekan Doa Sedoni. Pekan Doanta menaken i bas tahun enda ilakoken kenca kita mperingeti wari Kenangkihen Jesus Ku Sorga ras sada minggu ope Pentakosta. Tentu lit sada tujun maka iubah waktuna, bulan September ku bulan Mei enda. Kepeken adi siperdiateken kai silakoken ajar-ajar Tuhan Jesus mulih ku Jerusalem kenca enggo idahna Jesus nangkih ku Surga, e me kap kerina ajar-ajarNa tutus ertoto. Perb. Rasul 1:13-14, “Kenca seh i Jerusalem, lawes ia ku loteng rumah inganna numpang. Kalak enda e me: Petrus ras Johanes, Jakup ras Andreas, Pilipus ras Tomas, Bartolomeus ras Matius, Jakup anak Alpeus, Simon Pejuang ras Judas anak Jakup. Tutus atena kerina ras-ras ertoto, ikut pe diberu, bage pe Maria nande Jesus ras senina-senina Jesus.” Kata “tutus,” ncidahken kerna intensitas (terus-menerus) ras ketekunen (kesungguhan) ajar-ajar e. Kata “ras-ras” (sehati) njelasken kerna keadaan ajar-ajar si ersada arih, sepenggejapen, sepikiren asum kalak enda pulung ras-ras guna ertoto ras megiken Kata Dibata piga-piga wari dekahna (10 wari). Kenca ajar-ajar pulung, ertoto ras megiken Kata Dibata, maka nusur me Kesah Si Badia man ajar-ajar i Jerusalem.

Kesah Si Badia labo hanya ibereken man ajar-ajarNa, tapi pe man banta kalak si tek. Si e me si perlu sisedari kita sebage kalak si tek man Tuhan. Kesah Si Badia si erdahin ras erkuasa bas kita tentuna mabai kita reh dewasana i bas erkiniteken ras teridah perubahen si mehuli i bas dirinta. Bagi penjelasen i bas bahan Invocationta maka Kesah Si Badia e ngapuli kita, nampati, mpengasup kita guna naksiken kerna kebenaren, mpersingeti kerna kesalahen silakoken kita, ras nampati kita guna mpermuliaken Dibata. Bage pe tupung Petrus erkotbah, Kesah Si Badia mendorong perpulungen tutus megiken Kata Dibata ras kedungenna mereken dirina jera ras iperidiken. Kesimpulenna, Kesah Si Badia mengubah kegeluhenta sentudu bagi si ngena ate Dibata.

Wari enda, i bas kita mperingeti wari nusurna Kesah Si Badia, jadi moment penting guna kita banci merenung, enggo seh i ja perubahen si mehuli i bas geluhta. Banci sicek pribadi lepas pribadi. Tupung lit pergumulenta, dekahen nge kita jungut-jungut (kelsehen) entah ngataken bujur, sabab tek kita rancangen Dibata i bas geluhta e me kap rancangen damai sejahtera? Tetap nge lit dame sejahtera i bas erbage-bage perbeben sialami kita? Pang nge kita ngelumbaken kebenaren? Sedar nge kita asum kita ngelakoken kesalahen ras minta ampun man Tuhan termasuk ras kalak si ersoal man banta (kadang gengsi kita guna minta maaf). Adi sikaitken ku bas bahan pekan doanta, lit ketutusenta ertoto labo hanya guna dirinta, tapi pe guna kalak si deban gelah banci kita nggeluh sepenggejapen i bas perpulungen, ras sekelewet, mau terus-menerus belajar dan diajar, geluhta ernanam man kalak si deban, si maba kejuah-juahen, rsd. Adi enggo ertoto berarti kai sipindoken kita man Tuhan, e ka nge sidalanken i bas kegeluhenta. Umpamana, ertoto guna geluh sepenggejapen, berarti bas kegeluhenta pe arus ka kita saling peduli ras menolong. Ula terjeng ertoto saja. Sabab, lit ka deba kalak Kristen tapi la lit perubahen bas ia, la lit pertumbuhen bas ia. Enggo pe ndekah jadi kalak Kristen, la lit ketutusen guna ikut muat bagin i bas kerina kegiaten Gereja, geluhna jadi batu antuken asangken mpermuliaken Tuhan, meganjang ukur, rsd. Intina la lit pertumbuhen i bas ia. Ertina, kuasa Kesah Si Badia si enggo ibereken Dibata man bana la erdahin erkiteken la lit kerembakenna ras Tuhan. Jelas Paulus ngatakenca i bas Gal. 5:16-17, “Sura-surangku e me: Kesah Si Badia min si negu-negu kegeluhenndu maka ola iikutkenndu perukurenndu secara manusia. Sura-sura ukur manusia erlawanen ras Kesah Si Badia, janah Kesah Si Badia erlawanen ras sura-sura ukur manusia.” I bas kita tetap mengandalken Tuhan, rembak ras Tuhan, mindo perkuah ateNa erdahin bas geluhta, maka Kesah Si Badia si tetap erkuasa ras erdahin bas geluhta. Sebalikna, adi sipake gegehta, la kita perlu Tuhan, sura-suranta si lebih mengendaliken geluhta seh makana si nggesuh sidalanken kita. Enggo jelas asilna la mpermuliaken Tuhan. E maka tetaplah kita ernalem man Tuhan i bas segedang-gedang geluhta, tutus ertoto, ngoge ras dalanken kataNa, gelah Kesah Si Badia tetap mpelimbarui geluhta.