Bimbingen PJJ Tgl. 24 - 30 Mei 2015

BIMBINGEN PJJ TGL. 24 - 30 MEI 2015

PENTAKOSTA

(Pdt. Larena br. Sinuhadji)

Ogen :

Galatia 5:22-26

Tema :

IDEMI KESAH SI BADIA

Tujun :

Gelah ngawan ni perpulungen

1. Meteh tanda-tanda kalak siidemi kesah siBadia

2. Ngasup ncidahken ulih kesah sibadia ibas kegeluhenna

Penjelasen Bahan Pustaka

Surat Paulus man Perpulungen Galatia itulisken dalam rangka mpesikap pengangkan si salah i bas piga-piga perpulungen erkiteken terpengaruh pengajaren si lepak, maka keselamaten manusia idat arah ngikutken undang-undang. Alu tegas Paulus ngatakenca maka syarat si payo jadi kalak Kristen e me kiniteken. Alu kiniteken manusia iperdameken ras Dibata. Janah kiniteken si enggo ibereken Dibata man manusia arus irespon alu nggeluh si erbuah, geluh si ernanam man kalak si deban ras mpermuliaken Tuhan. Secara khusus i bas perikop enda Paulus ngelumbakenca maka kalak Kristen geluhna arus ipimpin Kesah Si Badia, Kesah si Badia si negu-negu. Adi Kesah Si Badia si negu-negu kegeluhenta, sura-suranta e me kap ngelakoken si ngena ate Dibata. Sabab perukurenta secara manusia enggo imasapken i kayu persilang rikut ras kerincuhen daging bage pe sura-suranta, asum kita tek man Tuhan Jesus ras ngendesken kegeluhenta secara total man baNa. Sura-sura ukur manusia erlawanan ras Kesah Si Badia. Ertina, adi enggo Kesah Si Badia e si ngkuasai geluh manusia, maka la nari ateta ngelakoken perbahanen-perbahanen si erpalasken sura-sura ukur manusia. Geluh rikutken sura-sura ukur manusia lit denga ijumpai bas perpulungen Galatia: siatahen dingen sikaraten (Gal. 5:15, meganjang ukur, sitokoh-tokohen, sician-cianen, erbahan perpecahen, mabuk-mabuk, rsd.).

Adi ngerana kerna perbahanen si erpalasken sura-sura ukur manusia, Paulus make istilah “perbahanen,” sedangken ngerana kerna Kesah Dibata, Paulus make istilah “ulih Kesah Si Badia.” Ertina, ipake Paulus kata “perbahanen” erkiteken usaha manusia sendiri, sedangken “ulih Kesah Si Badia” erkiteken kiniersadan kalak si tek man Tuhan arah penegu-negu Kesah Si Badia. I bas perikopta, isingetken alu terang indikator ulih Kesah Si Badia e me: 1) lit kekelengen; 2) lit keriahen; 3) lit kemalemen ate; 4) lit kesabaren; 5) idalankenna perbahanen si mehuli; 6) mehuli ia; 7) setia; 8) meteruk ukurna; 9) ngasup ngkuasai dirina. Alu perbandingen enda jelas, ate Paulus gelah ngawan perpulungen mampu mengevaluasi  dirina sekalak-sekalak, payo nge bas ia lit Kesah Si Badia, ntah kesah si deban? Payo nge ia Kristen entah pura-pura Kristen. Kristen ertina pengikut Jesus Kristus. E me sababna i bas ay. 24-26 itegasken Paulus tanda kalak si enggo jadi sikerajangen Kristus Jesus, perukurenna secara manusia enggo ibunuhna i kayu persilang rikut ras kerincuhen dagingna bage pe sura-surana (bdk. Gal. 2:20, “Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erkiteken kiniteken man Anak Dibata, si ngkelengi aku dingen ngendesken diriNa man gunangku”).

Perenungen

Kerina kalak si tek enggo ibereken Dibata kuasa Kesah Si Badia i bas geluhna (bdk. Perb. Rasul 2:38). Si jadi perenungenta, uga makana Kesah Si Badia e erkuasa guna mpelimbarui geluhta tep-tep wari seh makana ngasup kita ncidahken ulih Kesah Si Badia e bas kegeluhenta. La banci lang geluhta arus tetap rembak ras ernalem man baNa. Subuk arah hubungenta secara pribadi ras Tuhan (saat teduh, doa, ngoge kataNa) bage pe raduken ras teman-teman sada kiniteken.  Arah si e me geluhta tetap itegu-tegu Kesah Si Badia (bdk. Roma 8:11, “Adi Kesah Dibata si enggo mpekeke Jesus i bas si mate nari ringan i bas kam, maka Dibata si enggo mpekeke Kristus i bas si mate nari e la banci lang mereken geluh si mbaru man kulandu si arus mate e, arah KesahNa si ringan i bas kam e”).

Ulih Kesah Si Badia labo banci secara instan lit bas kalak si erkiniteken, tapi erproses/bertahap. Bagi sada lagu nina, “Sedikit demi sedikit tiap hari tiap sifat, Yesus mengubahku.” Ertina, arah erbage-bage tantangen i bas kegeluhenta i je Dibata memproses kegeluhenta gelah karakterta e bali ras karakter Kristus. Kadang ipake Dibata situasi si berlawanen ras si nipindoken kita. Si ipindoken penguasaan diri, pagi kedun enggo lit si man hadapen si berkaiten ras “tahan selera” subuk i bas pangan-pangan, belanja entah pe mengontrol emosi. Si iarapken kita, menang kita ngalaken situasi si e erkiteken penegu-negu Kesah Si Badia, seh makana ulih Kesah Si Badia e enggo menjadi karakter i bas kegeluhenta si tep-tep wari.