Bimbingen Khotbah Minggu 4 Januari 2015

BIMBINGEN KHOTBAH MINGGU 4 JANUARI 2015

EPHIPANIAS I

(Pdt. Larena Sinuhadji)

Invocatio :

“Malem me ate kalak si la megiken pedah kalak jahat, si la ngusih perbahanen kalak perdosa si la erteman ras kalak megombang man Dibata. Tapi keriahenna e me matuhi Undang-undang TUHAN dingen ngukurisa suari ras berngi.” (Masmur 1:1-2)

Ogen :

Jesaya 63:7-9 (Tunggal)

Khotbah :

Roma 2:17-29 (Responsoria)

Tema :

IKUTKENLAH UNDANG-UNDANG TUHAN

BAHAN KHOTBAH

Bahan Khotbahta, si ibere judul “Kalak Jahudi ras Undang-undang” ncidahken man banta kerna kesombongen kalak Jahudi i jah megah kel iakapna sebage bangsa pilihen Dibata ras ernalem nandangi Undang-undang Dibata.  Labo terjeng je saja, kemegahenna pe icidahken arah ia enggo jadi teladan, iakapna: ngajari kalak si motu, guru kalak si nguda denga, si negu-negu kalak si pentang, terang nandangi kalak si lit i bas gelap. Tapi kepeken kenca itelusuri maka si ilakoken bangsa e terjeng formalitas ngenca, munafik, sabab bangsa e sendiri la ndalanken kai si enggo iajarina man kalak bahkan ia sendiri si ngelakoken kai si ilarangna. Ay. 21-24 jelas ituriken Paulus kemunafiken bangsa e, i ja imomokenna ula nangko, ia sendiri nangko. Ula erlua-lua, sedangken ia sendiri pe erlua-lua. Ciga atena berhala, tapi ia sendiri si ngerampasi benda-benda i rumah pertoton ingan nembah berhala e. Arah kai si ilakoken kalak Jahudi maka enggo ipermalukenna gelar Dibatana man bangsa-bangsa si deban. Bangsa e enggo jadi batu antuken man kalak si deban.

Bage pe lit pengangkan si salah i bas kalak Jahudi maka keselamaten manusia terjadi erkiteken lit tanda lahiriah, e me kap sunat. Janah kalak enda enggo isunatken. Tapi nina Paulus, maka sunat la erguna asum kalak melanggar Undang-undang Tuhan. Ay. 28-29 merupaken kesimpulen ibahan Paulus, maka kalak Jahudi si tulen/si tuhu-tuhu labo hanya penampaken ndarat nari saja/kulit luarna saja, tapi si enggo isunatken pusuh peratenna. Labo undang-undang si tersurat si erbahanca kalak enggo jadi kalak Jahudi, tapi kuasa kesah Dibata nge.

Sunat hati/sunat pusuh labo konsep mbaru si itawarken Paulus man perpulungen. Padan si ndekah pe piga-piga kali menekanken perluna sunat pusuh (Ul. 10:16, Yer. 4:4). Penekanen i bas aspek batin i jenda merupaken kritik tajam nandangi kalak Jahudi si cenderung mengagungken hal-hal si lahiriah (sunat, hukum taurat tapi ia sendiri la makesa).

BAHAN OGEN

Bahan ogenta, ngerana kerna keleng ate Tuhan si la lit sibarna nandangi bangsaNa Israel. Tek kel Tuhan nandangi umatna, “BangsaKu kap ia e maka la mungkin Aku itipuna.” Tuhu-tuhu ikeliniNa bangsa e, iberekenNa pasu-pasu simpar, ipekena-kena Tuhan kegeluhen bangsa e. Labo malekat tapi Tuhan jine turun tangan engkelini bangsa e. Tapi air susu ibalas air tuba. I ja i bas ay. 10, ceda ibahanna ukur Tuhan, ilawanna Tuhan, erkiteken si e Tuhan erkusur jadi imbangna janah iperangi Tuhan bangsa e.

APLIKASI

Tema : “Ikutkenlah Undang-undang Tuhan. Jelas man banta labo Undang-undang Tuhan si menyelamatken man banta, sebab keselamaten enggo sialoken i bas Dibata nari arah perkuah ateNa. Undang-undang e desken petujuk/arah kerna kai si arus sidalanken sebage kalak si enggo iselamatken Tuhan. Undang-undang Tuhan e ula jadi beban man banta sebab enggo jelas adi bage si terjadi lebe-lebe jelma si nterem bagi si patuh kel kita, tapi la je kalak, kita nge si megegehna ngelanggar Undang-undang Tuhan. Introitus jelas ngatakenca man banta, “Malem me ate kalak si la megiken pedah kalak jahat, si la ngusih perbahanen kalak perdosa si la erteman ras kalak megombang man Dibata. Tapi keriahenna e me matuhi Undang-undang TUHAN dingen ngukurisa suari ras berngi.”

Ula usih bangsa Israel, i ja terlalu mengagungkan hal-hal si lahiriah. Sabab mekatep tanpa sisedari bage ka perbahanenta. Kekristenana si lebih mengutamakan hal-hal si lahiriah ibandingken ras batiniah. Simbol-simbol kekristenan: salib, slogan-slogan kekristenan, ku gereja ras kerina kegiaten-kegiaten keagamaan, rsd., tapi la berbanding lurus ras hal-hal si positif si kin arusna jadi kontribusinta guna jadi sira ras terang man sekelewetna. Malah sebalikna kita ka jadi batu antuken ras kai silakoken kita hanya topeng guna nutupi kerina kejahaten si ilakoken.

Kalak Kristen labo si secara lahiriah Kristen, tubuh bas orang tua nari si kin kalak Kristen, keluarga Kristen, ibaptis rsd. Tapi pe karakter sebage pengikut Kristus arus tetap sicidahken i bas kerina pengkebet geluhta. E me tandana keleng ateta Kristus si enggo ngkelengi kita alu keleng ateNa si la pernah erkeri-kerin. I bas minggu pemena tahun si mbaru enda, sitekadken guna setia mpelajari ras makaken perentah Tuhan, ras e silakoken alu dem keriahen ukur.