Bimbingen Khotbah Minggu 21 Desember 2014

BIMBINGEN KHOTBAH MINGGU 21 DESEMBER 2014

MINGGU ADVENT IV

Pdt. Larena br. Sinuhadji (Nd. Reynard Tarigan)

Introitus :

“Lit kin si metahat i bas Tuhan?” (Kejadin 18:14a)

Ogen :

2 Samuel 7:1; 11-16 (Tunggal)

Khotbah :

Lukas 1:26-38 (Tunggal)

Tema :

LABO LIT SI METAHAT I BAS DIBATA 

INTROITUS

I bas introitusta, Abraham enggo 100 tahun umurna ras ndeharana enggo 90 tahun, janah Sara pe la nai reh bulanna. Secara logika la nari mungkin banci lit pupusna. E maka tupung reh temuena si telu kalak (Tuhan sendiri si ncidahken diriNa, ay. 1) ku inganna i Mamre, janah ngatakenca “Siwah bulan nari, reh ka Aku ku jenda, i je pagi Sara enggo mupus sada anak dilaki.” Ibegiken Sara cakap temuena enda ndai ras tawa ia nina i bas ukurna, “Banci denga kin merincuh aku man perbulangenku adi aku pe enggo melus, janah perbulangenku pe enggo seh tuana?" E maka itegur Tuhan Abraham, engkai maka tawa ndeharana Sara. Ras ilanjutkenNa, “Lit kin si metahat i bas Tuhan?” Ras memang terbukti, siwah bulan kenca si e Sara mehuli kulana ras ipupusNa sekalak anak dilaki e me Ishak.

OGEN

Bahan ogenta e me kerna sura-sura Daud guna majekken Rumah Pertoton Tuhan. Tapi ipetangkas Tuhan arah nabi Natan maka anak Daud nge si bakal majekken Rumah Pertoton e. Janah alu tangkas ituriken Tuhan man Natan kerna perbahanen Tuhan man Daud, ibenaken permakan biri-biri ras ibahan Tuhan jadi raja bangsa Israel. Ku ja pe Daud Tuhan tetap ras Daud, italuken Tuhan kerina musuh-musuh Daud ras ibahan Tuhan Daud terberita. Kai si terjadi i bas kegeluhen Daud semata-mata erkiteken Tuhan.

KHOTBAH

Bahan khotbahta e me kap kerna kerehen Malekat Tuhan man Maria guna mpetetap ukurna, i ja ibereken Tuhan perkuah ateNa, sebage nande Juruselamat. Situasi paksa si e, Maria si nguda-nguda denga, janah nina Malekat Tuhan mehuli kulana, janah ipupusna sada anak dilaki ras bahan gelarNa Jesus. Ipertegas Malekat maka anakna e jadi kalak si mbelin dingen igelari pe Anak Dibata si meganjangna kel. Si ikataken Malekat Tuhan tuhu-tuhu erbahanca Maria sengget, e maka nina, “Kuga e jadi man bangku, sabab aku si nguda-nguda denga.” Ipetetap Malekat Tuhan maka Kesah si Badia pagi nusur ku babona, janah kuasa Dibata ringan i bas Maria. Ertina, i bas Maria ngaloken perkuah ate Tuhan e, amin sekali mberat Dibata arah Kesah si Badia tetap ngkawali Maria. Ras ibandingken Malekat Tuhan  pe kerna kai si jadi nandangi Elisabet, kade-kadena, si enggo pe-enambulan-ken natang tuah, amin pe enggo metua ras ikataken kalak maka la nari banci mupus. “La lit si metahat i bas Tuhan,” nina Malekat Tuhan. Jenari, alu dem ketaatan ialoken Maria perkuah ate Tuhan ndai, amin sekali secara manusia mberat ngalakenca. Tapi tek Maria, maka Tuhan tetap nemani ras masu-masu kegeluhenna.

PERENUNGEN

Tidak ada yang mustahil bagi Tuhan. Ras lit lagu pe si mpetetap ukurta maka, “Bagi Tuhan tak ada yang mustahil, bagi Tuhan tak ada yang tak mungkin.” Adi nina Tuhan banci, la ise pe banci ngolangisa. Kuasa ras Mujijat Tuhan labo hanya terjadi i bas kejadin-kejadin si tersurat bas Pustaka si Badia. Ipegeluh Tuhan kalak si mate, ipelawesNa Setan Iblis, kalak si sakit ipepalemNa, 5000 kalak lebih ibereNa man ras melala denga si deban. Ras kuasaNa tetap denga terjadi i bas paksa gundari enda. I bas erbage-bage hal si ialami kita, sakit-pinakit, persoalen ekonomi, ngaloken tuah, pulah i bas perbeben si mberat. Erpengendes kita man Tuhan, ietehNa kai si terbaik i bas kegeluhenta, alu cara ras waktuNa si la banci terukuri kita, tapi tetap pertolongenNa tepat i bas waktuNa.