Bimbingen Khotbah Minggu 14 Desember 2014

BIMBINGEN KHOTBAH MINGGU 14 DESEMBER 2014

MINGGU ADVENT III

(Pdt. Larena br. Sinuhadji)

Introitus :

“Kesah TUHAN si Erdolat lit i babongku. Enggo ipilihNa aku, lako maba berita si mehuli man kalak musil. Isuruhna aku pepalem kalak si getem pusuhna, meritaken kebebasen man kalak si tertaban; janah kalak si i bas penjara enggo banci ndarat ia.” (Jesaya 61:1)

Ogen :

1 Tesalonika 5:16-24 (Tunggal)

Khotbah :

Jesaya 61:1-4; 8-11 (Responsoria)

Tema :

KITA IDILO MABA BERITA SI MEHULI

BENA KATA

           

Lit lagu KAKR si isina ngatakenca “Bersaksi T’rus Sampai Tuhan Datang.” Ertina kita sebagai Duta Kristus, kalak si enggo iselamatken arus tetap bersaksi, ngelumbaken kebenaren Kabar Baik, Firman Tuhan seh ngayak Maranatha (bdk. Mat. 24:14, “Dan Injil Kerajaan ini akan diberitakan di seluruh dunia menjadi kesaksian bagi semua bangsa, sesudah itu barulah tiba kesudahannya”). Ras salah sada ibas Tri Tugas Gereja e me kap bersaksi. Kita e me kap Injil si pelimaken. Ertina, arah kerina pengkebet geluhta: perukuren, pengerana ras perbahanenta iarapken gelah kita banci maba daya tarik man kalak si deban isekelewetta gelah ia pe semangat ras dem i bas pengarapen i bas kegeluhenna. Janah kabar baik enda ka si ilumbaken Jesaya man kalak Israel si paksa e lit i bas penderitaan amin enggo mulih bas pembuangen nari.

ISI

Judul i bas perikop enda “Berita Keriahen Kerna Pembebasen” (Ind “Kabar Selamat Kepada Sion”), ertina keselamaten kalak si tek, keselamaten setiap manusia si ngaloken IA sebage Juruselamat, sekaligus nubuaten kerehen Mesias. Bahkan nubuaten Jesaya enda ka si nioegeken Jesus Kristus asum IA i kuta Nasaret ras rembang wari Sabat, iogekenNa bagin i bas nubuaten Jesaya e (Luk. 4:18-18). Kenca dung iogeken Jesus, maka iujungiNa alu kata, “Sendah enggo seh isi Pustaka si Badia si ibegindu ndai.” Ertina, nubuaten Jesaya terealisasi i bas kerehen Jesus Kristus, janah berita si mehuli e me Jesus sendiri.

Perikop (ps. 61) lit i bas bagin Trito Jesaya (Jesaya pe-3-ken), itulisken kenca bangsa Israel mulih i bas pembuangen nari. Persoalen si muncul paksa si e, kiniseran lenga bo ngadi, walau pe enggo bebas i bas pembuangen nari, secara khusus man kalak si musil. Kalak si tingkat sosialna lebih mapan kurang peduli, seh makana si bayak reh bayakna, si musil reh musilna. Tutus beragama tapi la ibarengi alu kepedulian man kalak si menderita. Lit ka si mindo penampat labo hanya man Tuhan tapi man kuasa si deban. Maka berita si ipeseh Jesaya enda, tuhu-tuhu mereken sukacita, semangat mulihi man kalak si sangana menderita.

Janah Jesaya ipake Tuhan guna meritaken berita si mehuli e, erkiteken kesah Tuhan si erdolat lit bas ia. Sabab lit ka, nabi si la pang meritaken berita si mehuli bahkan lit nabi-nabi palsu si hanya berpihak man penguasa ras si erjabaten. Perikop memastikan maka Tuhan peduli ras keleng ateNa man umatNa secara khusus man kalak si tertindas.

Berita si ibaba Jesaya man kalak musil, si sedekah enda ipinggirken, isepeleken maka kalak musil pe iperdiateken Tuhan. Terbukti i bas kerehen Jesus, berita si pemena ipeseh man kelompok permakan i mbal-mbal Efrata. Kalak si getem pusuhna erkiteken erbage-bage persoalen (rumah tangga, anak, ekonomi, sakit pinakit) ipepalem/ipulihken Tuhan, dingen meritaken pembebasen man kalak si tertaban (subuk belenggu dosa, kuasa kegelapen, himpitan persoalen) maka i bas Jesus lit kelepasen.

Ay. 2, Tuhan sendiri erbalas man musuh-musuh bangsa Israel ras terbukti i bas pembebasen Israel i bas Babel nari i ja ipake Tuhan tan bangsa Persia. Kalak si rate ceda isuruh Tuhan nabiNa guna ngapulisa. Ertina lit i je perubahen suasana, ndele ate jadi meriah ukur, ukur si kote isalihken jadi semangat si mbaru.

Arah berita si ipeseh Jesaya pe, maka ilumbaken ngena ate Tuhan man kebujuren ras ciga ate Tuhan penindasen bage pe kejahaten (ay. 8). Bangsa Israel paksa si e merespon alu dem sukacita perbahanen Tuhan arah berita si ipeseh Jesaya, ay. 10, “Meriah kal kuakap erkiteken Tuhan, tendingku ersurak erkiteken perbahanenNa. Igambarken desken selakak penganten tupung pesta perjabunna. Bage pe bali ras benih si iamburken ku bas taneh, si la banci lang pasti turah.” Ertina, berita pemulihen, kesalamaten, berita sukacita enda labo hanya terjeng berita tapi terealisasi i bas kerehen Jesus bage pe kita sebage Duta-duta Kristus.

PENGKENAINA

Tema : KITA IDILO MABA BERITA SI MEHULI. Tema enda labo hanya sekedar perentah man banta tapi sada tanggung jawab/tugas si arus alu dem sukacita silakoken. Paling tidak sebage si maba Berita si Mehuli, kita lebe enggo iubahken erkiteken berita sukacita Kristus. Adi kita pe erdele ate denga, erceda ate, susah erkiteken erbage-bage persoalen maka berita si ibaba kita la banci erkuasa. Kita lebe enggo mengalami sukacita i bas Kabar Baik si enggo sialoken kita, i bas kita tek man Kristus. Ertina, mampu kita bersyukur, bersukacita, kuat i bas ngalaken erbage-bage persoalen, maka banci teraloken kalak berita si nipeseh kita.

Ogen I, surat Paulus man perpulunen Tesalonika mpersingeti kita sebage kalak si enggo ersada ras Kristus gelah tetap meriah ukurta katawari paksa pe, ertoto kata wari pe ras ngataken bujur i bas si kugapana pe (kata-kata bijak “Tetaplah tersenyum. Senyum bukan tanda bahwa kamu pura-pura semuanya baik-baik saja. Senyum adalah tanda bahwa apa pun yang terjadi, kamu punya lebih banyak alasan untuk bersyukur dan ada selalu makna yang membahagiakan di setiap situasi”).

Bahkan sebage si maba berita si mehuli ula kita jadi pelaku si erbahanca kalak erdele ate/susah. Kasus si tetap denga marak terjadi kekerasen nandangi PRT, koruptor si erbahanca kalak musil reh musilna, peredaren narkoba, miras erbahanca melala keluarga-keluarga menderita. Kita adalah perpanjangan tangan Tuhan guna mpenahangi kiniseran si ialami kalak. Mother Teresa ngatakenca, “Jangan pernah orang yang datang kepadamu pergi dengan beban lebih berat, usahakan kehadiran kita, membawa sukacita kepada siapa pun.” Ngasup kita jadi Duta-duta Kristus, erkiteken kuasa kesah Tuhan erdolat i bas kita. Kuasa e ibereken Tuhan man banta si tetap setia ngelakoken kebujuren, keadialen ras kekelengen i bas kegeluhenna.