Bimbingen Khotbah Malam Tahun Baru 31 Desember 2014

BIMBINGEN KHOTBAH 31 DESEMBER 2014

NUTUP TAHUN

Pdt. Larena br. Sinuhadji (Nd. Reynard Tarigan)

Introitus :

“Tapi i bas si enda kerina tuhu-tuhu kita lebihen asa kalak si permenang erkiteken Kristus si erkeleng ate man banta.” (Roma 8:37)

Ogen :

Roma 8:31-39 (Tunggal)

Khotbah :

Masmur 121:1-7 (Responsoria)

Tema :

KITA LEBIHEN ASA PEMENANG

PENARUH

Ungkapen “kita lebihen asa pemenang” merupaken ungkapen kalak si tetap nggeluh i bas kiniteken man Tuhan. Ertina, i bas kerina dampar geluhna, senang susah, meriah ukur ceda ate, sehat bahkan sakit mekelek pe si ialamina, ngasup tetap ia ngataken bujur bahkan tetap banci idalankenna si mehuli i bas kegeluhenna. Mampu bersyukur bahkan i bas si la bagi ukur pe si jadi, tetap ia mpermuliaken Tuhan ras erbahan si mehuli i bas kegeluhena. Adi geluh sebage pemenang, e me kap i bas si bagi ukurta si terjadi, juara, sukses, berhasil i je kita bersukacita ras bersorak-sorai, ngataken bujur man Tuhan. E me hal si biasa si banci ilakoken kerina kalak. Walau pe lit ka deba jelma, i bas si bagi ukurna si terjadi pe la ka ngasup ia ngataken bujur bahkan kebalikenna, jungut-jungut lalap, merasa kurang denga arah kai si enggo ibereken Tuhan i bas kegeluhenna. Tapi Firman Tuhan i bas wari terakhir tahun enda, mpersingeti kita, maka kita kalak si tek, lebihen asa pemenang.

OGEN / INTROITUS

I bas perikopta, Paulus ngelumbakenca maka kita enggo ibereken Tuhan Jesus kemenangen i bas Ia enggo jadi Juruslamatta. Arah perikop enda ate Paulus gelah pengikut Kristus si ngenanami kiniseran tetap kinitekenna man Tuhan sebab kai pe la ngasup nirangken kita ras keleng ate Kristus. Lit piga-piga penungkunen retoris: Adi Dibata temanta, ise kin ngasup ngelawan kita? Enggo jelas jawabenta la ise pe ngasup ngelawan kita, sabab anakNa pe ibereken gunanta. Ise kin ngasup nirangken kita i bas keleng ate Kristus nari? La ise pe banci. Subuk kiniseran, kepiceten, penganiayaan, kurang pangan entah uis, ancamen entah kematen la banci nirangken kita ras keleng ate Kristus. Kalak si igejapkenna enggo ia ersada ras Kristus, jadi kalak pemenang bahkan lebihen  asa pemenang. Ertina, i bas kai pe la ia talu. I bas erbahan si mehuli ras i bas ngalaken erbage-bage perbeben la ia talu. La ise pe banci nirangken kita ras keleng ate Kristus, subuk kematen entah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe kai si jadi pagin. Kai si ibelasken Paulus, labo erkiteken pendapatna entah pe keyakinen pribadi, tapi erkiteken pengalamen si enggo ialami Paulus, tek kel ia nandangi keleng ate Kristus.

KHOTBAH

Masmur enda merupaken Masmur kenca bangsa Israel mulih i bas Rumah Pertoton Israel. La banci lang mbue ancamen i bas perdalanen: nipe, kacip gelang, serigala ras si debanna. I je me Pemasmur ndarami sekawal/pelindung. Ras sada keyakinen i bas diri Pemasmur maka penampatna e me kap Tuhan, si enggo njadiken langit ras doni. Dibata, si la pernah madat mataNa dingen la tertunduh pe. Dibata si tetap mereken kejuah-juahen, la ibahanna bangger umatNa aminna kena las matawari, entah pe tupung kalak enda erdalan berngi wari. Tuhan si ngkawali i bas kerina mara nari. Tuhan si ngkawali peberkat ras permulihna bangsaNa rasa lalap.

PENGKENAINA

Bujur ninta man Tuhan si enggo naruhken kita ku bas wari terakhir i bas tahun 2014. Janah gegeh ras keleng ate Tuhan ka si naruhken kita seh ku tahun si mbaru. Mulai Tgl. 1 Januari seh akhir tahun enda melala enggo sialami i bas kegeluhenta, subuk si biak sukacita bage pe si la bagi ukurta si erbahanca ceda ateta. Penungkunen man banta enggo me kita nggeluh lebihen asa pemenang? I bas si bagi ukur tetap kita mampu bersyukur ras memuliaken Tuhan, sigejapken maka jadi e man banta (kesuksesan, keberhasilan i bas studi, pendahin) erkiteken keleng ate Tuhan. Bage pe, i bas erbage-bage pengalamen menyedihkan: kegagalan, ngalaken sakit-pinakit, ras erbage-bage pencobaan, ngasup nge kita ngataken bujur bahkan tetap erbahan si mehuli si ngena ateNa?

Terkadang ula lebe kegeluhen lebihen asa pemenang, kegeluhen bagi pemenang saja gagal kita ndalankenca. I bas keberhasilen, kesuksesan labo kita bersyukur, bahkan turah ka kiniganjangen ukurta, jenari sepele ka kita man kalak si deban. Kegeluhenta i babo doni enda erpaksa-paksa: maun reh paksa perlego, ntisik nari musim perudan, jenari nangkeng-nangkeng janah lit ka paksana kendit ras ngincuah ka dalan si dalani kita. Si paling penting, kai pe la banci nirangken kita ras keleng ate Kristus. Megegeh kita ngalakenca erkiteken Tuhan sekawalta.

Arus lit sada keyakinen bas kita, bagi penggejapen Pemasmur maka Dibatanta, si tetap mereken kejuah-juahen banta, si ngkawali kita. Keyakinen enda banci turah erkiteken pengalamen kegeluhen si enggo sialami kita, maka Tuhan tetap serta, sabab tetap Ia inganta ernalem katawari paksa pe i bas kegeluhenta. Jadilah kita pengikut Kristus si tetap megenggeng: setia, tekun, sabar ras la mesunah putus asa i bas ngikutken Tuhan amin kai pe si terjadi.