Bimbingen Khotbah Minggu 7 Desember 2014

BIMBINGEH KHOTBAH MINGGU 7 DESEMBER 2014

Minggu Advent II

Terbit Ibas Warta GBKP Maranatha (WGM) Edisi November 2014

(Pdt. Larena Sinuhadji)

Introitus:

“Lit sora erlebuh nina, “Pekena dalan Tuhan ibas taneh si mesawang. Ibas gurun pasir, pesikap dalan man Dibatanta.” (Jesaya 40:3)

Ogen:

Jesaya 40:1-11 (Responsoria)

Khotbah:

2 Petrus 3:8-15 (Tunggal)

Tema:

PESIKAPLAH DALAN MAN DIBATA

BENA KATA

Surat Petrus si peduaken itulisken la ndekahsa ope ia mate. Itujuken man kerina kalak Kristen i Asia Kitik (Anatolia, Asia Barat Daya - Turki) ras kerina kalak Kristen si sangana erjuang ngalaken tantangen erkiteken litna ajaren-ajaren papak. Ajaren enda erbahanca enterem kalak Kristen si enggo murtad. E maka tujun tulisen enda e me ncidahken guru-guru palsu ras ajarenna gelah perpulungen tetap metenget bage pe njemba kalak Kristen gelah semakin dewasa i bas erkiniteken.

Secara khusus i bas perikop khotbah enda ngerana soal kerehen Tuhan si peduakaliken si la ise pe metehsa digan IA reh sabab kerehenNa bagi pinangko (Mat. 24:36, 1 Tes. 5:2, 2 Pet. 3:10). Bahkan i bas  Kitab Why. 16:15 jelas ikataken, “Lihatlah, Aku datang seperti pencuri. Berbahagialah dia, yang berjaga-jaga dan yang memperhatikan pakaiannya, supaya ia jangan berjalan dengan telanjang dan jangan kelihatan kemaluannya.” E maka penting i je soal persiapen ras tetap erjaga-jaga.

ISI

Ajaren papak si berkembang paksa si e la tek nandangi kerehen Tuhan si peduakaliken, alu pengajaren-pengajaren ras penungkunen si banci membingungken adi la paguh kinitekenta. Ay. 3b-4, “Alu megombang, nungkun ia nina, “Ma kin erpadan Tuhan maka IA reh? Ija dage IA? Bapa-bapanta enggo mate, tapi kerina bali denga nge ras asum doni enda ijadiken!” Soal kerehen Tuhan si peduakaliken enggo pasti, la nari erbera-bera (bdk. Joh. 14:3, Perb. 1:11). Janah persoalen kerehen Tuhan semata-mata otoritasNa, kuasaNa, la banci kita ngatursa.  Jelas maka Dibata la ibatasi alu waktu. Secara manusia mungkin banci memakan waktu ribuan tahun tapi bas Dibata banci sada wari idungiNa, bage pe sebalikna. Si niakap kita banci nge pedas, cepat tapi ndekah ibahan Dibata prosesna (bdk. Perjalanen bangsa Israel Mesir nari ku taneh Kanaan si itempuhna 40 tahun, padahal banci 40 wari) kerina otoritas Tuhan. Ras enggo jelas maka jawabna erkiteken mbelin kekelengen Tuhan man manusia. Si e kerina i bas rancangen Tuhan. Labo berarti Tuhan melet ngelakoken kai si enggo ipadankenNa, bagi lit kalak si erpengakap bage. Tapi si e kerina erkiteken kesabaren Tuhan, sabab la ateNa sekalak pe ikernepken, tapi gelah kerina min jera i bas dosa-dosana nari (bdk. Esek. 33:11, “la ukurKu meriah ngidah sekalak perdosa mate. Riahen ukurKu ngidahsa ia ngadi erbahan dosa gelah ia nggeluh”). Bahkan i bas ay. 15 ikataken maka kesabaren Tuhan e (engkai maka siakap meletsa/ndekahsa) jadi sada kesempaten man banta gelah banci kita terkelin. Salah sada tafsiren ngatakenca maka “penundaan” kerehen Tuhan peduakaliken berkaiten ras Pekabaren Injil Kerajaan Dibata ku kerina bangsa manusia (Mat. 24:14), i ja sura-sura Tuhan setiap manusia enggo begikenna kerna firman Tuhan (Amanat Agung Mat. 28:19-20, 1 Tim. 2:4). Tapi labo kerina banci terkelin, adi tetap keraskenna ukurna ras la ialokenna perkuah ate Tuhan ras keselamaten si enggo iberekenNa man manusia tetap nge ia bene.

I bas kerehen Tuhan, itandai alu erbage-bage peristiwa: lesap me langit alu sora si erlenggur janah barang-barang si i langit meseng dingen ikernepken, janah doni ras kerina isina lesap me (bdk. Mat. 24:29-31). Tanda-tanda jaman enggo banci siidah ras sialami i bas paksa gundari enda (bdk. Mat. 24: perang, linur, kelihen, enterem kalak murtad, rsd.) Si e kerina la banci isilahken. Tapi sada hal si banci silakoken kita sebage kalak si tek tetap semangat ras tetap nggeluh bagi si ngena ate Dibata. Sitimai kai si enggo ipadanken Dibata, e me kap langit ras doni si mbaru alu tetap nggeluh badia. Kata kunci, “erpala-pala,” berusaha supaya kamu kedapatan tak bercacat dan tak bernoda di hadapanNya, dalam perdamaian dengan Dia. Labo enda petembil ras ajaren Sola Gracia, maka kita selamat, terkelin erkiteken perkuah ateNa. Tapi keselamaten si enggo sialoken arus sipelihara, siisi alu tetap kita njaga buah kinitekenta (bdk. Ketangkasen 19:8, “Pengantin si Diberu e enggo make uis mbentar si erkilat-kilat." Uis mbentar e, e me perbahanen si mehuli si ilakoken anak-anak Dibata).

PENGKENAINA

Tema : “Pesikaplah Dalan Man Dibata.” I bas Minggu Advent si pe-2-en enda, tole kita ipersingeti guna tetap erbahan persiapen subuk i bas ateta mperingeti wari ketubuhen Juruselamatta i bas kita erwani Natal bage pe kerehenNa si peduakaliken. Ertina, ula kita meros, kurang persiapenta tapi tuhu-tuhu sibereken si terbaik i bas kerina si ilakoken kita.

Lagu PEE 82 seri antusenna ras bahan pengogenta si pemena, maka arus sipesikap dalan kerehen Raja Penampatta ndai bas ukurta. “Biak-biak kegelapen tadingken kerina, ukur si nggeduk-nggeduk jadi pinterlah.” Kata-kata pengarapen i bas Jes. 40 merupaken nubuaten kerehen Mesias sekaligus mpetetap umat Tuhan si paksa si e itaban i pembuangen Babil, maka Tuhan Juruselamat enggo ngalemi dosa-dosa umatNa, enggo iagui Tuhan ukumen si ibereken erkiteken kejahaten si sedekah enda ilakoken umat. Dua hal si arus imomoken ras si ilakoken umat ibas berita pembebasen si nilakoken Tuhan:

Si pemena pekena dalan man Tuhan. Kerina baluren itambusi dingen deleng-deleng ipekendit. Ertina, Pusuh perukurenta arus sipelimbarui guna pesikap dalan man Tuhan. Keegoisen, kiniganjangen ukur, biak-biak si la mehuli, kerangapen, elem-elem rsd., arus siagui gelah metunggung kita ngaloken kerehenNa. Ras enda ka nge si ilakoken Johanes Pembaptis tupung ia erkotbah i taneh mesawang Judea ras nterem kalak si merespon khotbahna alu mereken diri iperidiken ras nadingken dosa-dosana (bdk. Mat. 3:1-).

Si peduaken, maka umur manusia terbatas (ay. 6-8). Manusia desken dukut-dukut ngenca, bagi rudang-rudang i mbal-mbal. Tapi aminna pe kentisik, geluh manusia arus berarti, bermakna. Ula sisia-siaken geluh si enggo ibereken Tuhan. Dukut-dukut ras rudang pe melus, tapi Kata Dibata tahan rasa lalap. I bas tetap kita mengisi pusuh ukurta alu Kata Dibata e me si erbahanca ngasup kita jadi saksi Tuhan i tengah-tengah doni enda. Tuhan nampati kita i bas kita mpesikap dalan man baNa.