PJJ GBKP Tgl. 17 - 23 April 2016

PJJ GBKP TGL. 17 - 23 APRIL 2016

Pdt. Larena br. Sinuhadji (Nd. Rey Tarigan)

Tema : BERITAKEN BERITA SI MERIAH (Roma 1:16-17)

Penjelasen Bahan Ogen & Perenungen

Meritaken Berita si Meriah e me tanggung jawab kalak si enggo tek man Yesus Kristus (bdk. Matius 28:19-20, Perb. Rasul 1:8), janah misi e ikataken Yesus ope Ia nangkih ku Surga. E maka asum Paulus enggo tek man Yesus, enggo “itangkap” Yesus seh makana terjadi perobahen si luar biasa i bas dirina (bdk. Pilipi 3:1-11). Sada lebe, si awalna ia nggasgasi kalak Kristen, kedungenna kenca enggo tandaina Yesus, ipake Tuhan ia guna meritaken Berita si Meriah secara khusus man kalak si labo kalak Jahudi. Bahkan rela ia mate guna Berita si Meriah. E maka i bas ps. 1:14 i je Paulus ngatakenca, “Sabap aku rutang guna meritaken Berita si Meriah man kerina manusia, subuk man kalak si enggo maju bage pe man kalak si kolot denga, subuk man kalak si erpemeteh, bage pe man kalak si la erpemeteh”.

I bas bahan renungenta, Paulus ngatakenca maka la ia mela kerna Berita si Meriah. Sabab iidah Paulus maka melala kalak mela meritaken Berita si Meriah, Kristus si iberitaken e me kap Tuhan si mate, janah ipakuken i kayu persilang. Sangat memaluken sabab seri Yesus ras penjahat. Tapi kiniteken Paulus ngatakenca, maka Berita si Meriah e me kap kuasa Tuhan guna nelamatken kalak si tek, lebe kalak Jahudi, je nari kalak si deban si labo kalak Jahudi. Sabab memang awalna keselamaten e man kalak Jahudi, tapi erkiteken kalak Jahudi erpenulak nandangi Berita si Meriah, maka kedungenna terbuka man si labo Jahudi.

Berita si Meriah si nimaksudken Paulus i jenda e me kap karya penebusen Kristus, i bas kematen ras kekekenNa si enggo naluken kuasa dosa ras kematen. Jadi lit dua prinsip penting i je : si pemena, Injil (Euanggelion/Berita si Meriah) e me kap kuasa Dibata (dunamis/gegeh) guna nelamatken. Si peduaken, Berita si Meriah si ibereken Dibata alu perkuah ateNa ibereken guna nelamatken kalak si tek man baNa. Berita si Meriah mbebasken kalak si tek i bas iketen dosa, bagi si ikataken Yesus i bas Yoh. 8:31-32, “Adi tetap atendu tutus ngikutken si enggo Kuajarken, tuhu-tuhu me kam ajar-ajarKu. Itandaindu me Dibata si tuhu-tuhu, janah Ia jine si mbebasken kam”. Bage pe 2 Tim. 1:10-12, “Tapi genduari perkuah ateNa e enggo tangkas man banta arah kerehen Si Ngkelini kita, Kristus Yesus. Yesus enggo naluken kuasa kematen janah enggo ipetangkasNa kegeluhen si la erkeri-kerin arah Berita si Meriah. Aku enggo iangkat Dibata jadi rasul dingen guru guna pembarken Berita si Meriah. Janah erkiteken si e me maka aku ngenanami kiniseran-kiniseran. Tapi tetap aku tek, sabap kutandai nge ise penalemenku. Janah tek aku Ia ngasup ngkawali aku ras si enggo iendeskenNa man bangku seh ku wari pendungi e”.

Berita si Meriah labo hanya ergegeh guna nelamatken tapi pe mabai kalak guna erkiniteken. Kiniteken si ibereken Tuhan man banta (sola gratia). Janah kiniteken e arus terus-menerus ipeteguhi, ipelimbarui wari lepas wari (Epesus 4:13-15). I je me arus lit kesetiaan, ketutusen guna tetap merawat kiniteken alu membangun hubungen secara pribadi ras Tuhan bage pe ras teman-teman sada kiniteken. Janah kinitekenta si dewasa (paguh) teruji arah erbage-bage tantangen, kiniseran si nderpa kita dingen ngasup kita ngalakenca.

Puji Tuhan, Dibata erdahin arah NZG Badan Pekabaran Injil Belanda nari si rutang pusuhna nehken Berita si Meriah man kalak Karo. Janah tepat i bas Tgl. 18 April 2016, enggo 126 tahun sehna Berita si Meriah man kalak Karo. E maka rutang pusuhta guna nehken Berita si Meriah, man keluarganta, teman-temanta sada perpulungen, kalak si deban, si gulut ukurna, kelsehen, berbeban berat rsd. Berita si Meriah si enggo sialoken lebe nelamatken kita, mperiahken ukurta, mpelimbarui kita, mbebasken kita i bas iketen dosa, janah rutang ka pusuhta guna nehkenca man kalak si deban. Tentu mbue tantangen. La alokenna kita, kurang dahin akapna kita, rsd. Tapi tetap sipindo gegeh i bas Dibata nari gelah la erleja-leja, la terkari-karin, la mela, la sidalih-dalilen i bas kita nehken Berita si Meriah. Eta Erberita.