PJJ GBKP Tgl. 10 - 16 April 2016

PJJ GBKP TGL. 10 - 16 APRIL 2016

Pdt. Larena br. Sinuhadji (Nd. Reynard Tarigan)

Tema : ERBUAH ADI ERSADA RAS TUHAN (Johanes 15:4-8)

Penjelasen Ogen & Perenungen

I bas perikopta sekali enda, Yesus mereken pengajaren alu make gambaren batang anggur, maka Ia me batang anggur si tuhu-tuhu ras kita dahan-dahanNa. Berarti, lit ka batang anggur si palsu entah tiruan entah pe si menyerupai. Adi batangna pe palsu enggo pasti buah pe palsu. Adi siperdiateken ay. 4-8, maka jelas arus lit hubungen si senyawa, selket, ersada katawari paksa antara kita ras Yesus. Tetaplah kam i bas janah Aku i bas kam (ay. 4,5,7). Dahan labo ngasup erbuah adi la kin ersada ras batangna. Bage me pe kita, adi la kin kita ersada ras Tuhan labo kita erbuah. Adi tetap kita i bas Tuhan dingen Tuhan i bas kita melala buahta, dingen meramis (ay. 16). Ertina, geluhta tuhu-tuhu berpotensi positif dingen jadi berkat man enterem kalak. Bahkan Yesus sendiri ngatakenca, adi la kin kita ersada ras Tuhan labo kita ngasup erbahan kai pe.

Selain si e, bersedia ka kita ibersihken (ay. 3,7, “Kam enggo ibersihken alu kata si Kukataken man bandu”, “KatangKu tetap nggeluh i bas kam”). Bdk. 2 Tim. 3:16, “Kerina si tersurat i bas Pustaka Si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli”. Desken, sekalak perjuma si setia mbersihken batang sinuan-sinuanna gelah ola icedai benalu, hama bahkan adi lit dahan si kerah iputiki sabab banci menghambat pertumbuhen batang e. Bage pe kegeluhen kalak si tetap ersada ras Kristus, katawari paksa bersedia ikoreksi alu kebenaren Kata Dibata gelah ambah warina  karakterta sentudu bagi si ngena ate Dibata.

Sura-suranta, geluhta erbuah dingen buah si nihasilken kita e me si ntebu ras meramis  ka. Kualitas geluhta labo iukur asa kai dekahna kita nggeluh, tapi arah kesempaten nggeluh si ibereken Tuhan man banta banci kita erguna man kalak si deban ras tetap mpermuliaken Tuhan.