Khotbah GBKP Minggu Tgl. 10 April 2016

KHOTBAH MINGGU GBKP TGL. 10 APRIL 2016

Misericordias Domini (Lias ate Jahwe)

Pdt. Larena br. Sinuhadji (Nd. Reynard Tarigan)

Invocatio : “Sabab Ia kap Dibatanta, kita bangsa si ikelengiNa. Kita desken rarasen biri-biri si ipermakaniNa” (Masmur 95:7).

Ogen : Masmur 30:2-13 (Responsoria)

Khotbah : Ketangkasen 5:11-14 (Tunggal)

Tema : KEHAMATEN, KEMULIAN RAS KUASA MAN BANA RASA LALAP

Penjelasen Bahan Pustaka Si Badia           

Pengogen si pemena ibere judul “Pertoton Pengataken Bujur” (Alkitab TB-LAI: “Nyanyian Syukur Karena Selamat Dari Bahaya”), e me ende-enden mengket Rumah Pertoton. Si isina kerna puji-pujin Pemasmur man Tuhan erkiteken gejapina pengkelengi Tuhan i bas kegeluhenna. Piga-piga alasen banci siidah si itulisken Pemasmur :

• La ipediat Tuhan imbang-imbangna megombang man bana (ay. 2).
• Ipepalem Tuhan i bas sakit pinakit sialamina, ibahan Tuhan ia juah-juahen. Banci jadi sakit mekelek ialami Pemasmur, sabab nina “Ipulahi Tuhan ia i bas kuburen nari nyaris mate Pemasmur, tapi ipegeluh Tuhan mulihi (ay. 3-4).
• Kiniulin Tuhan tetap asa umur geluhta ibandingken pernembeh ateNa si kentisik ngenca.
• Kendelen atena enggo isalihken Tuhan jadi keriahen (ay. 12a).

Erkiteken perbahanen Tuhan si mbelin si enggo ialamina maka ipujiNa Tuhan ras lalap  ikatakenna bujur (ay. 13, “E maka la aku nggit sinik, kuendeken puji-pujin man baNdu. Lalap kukataken bujur man baNdu”). Bahkan arah kesah si tetap ibereken Tuhan man baNa atena tetap muji Tuhan. La ate Pemasmur menyia-nyiaken kesempaten si mehuli si enggo ibereken Tuhan man baNa, sabab abu la banci muji Tuhan, la banci mberitaken kiniulin Tuhan si la erkeri-kerin (ay. 10 ras bdk. Mas. 150:6).

Bahan khotbahta e me kerna puji-pujin man Tuhan Yesus Kristus sebage Anak biri-biri ni Dibata si enggo jadi Penebus man manusia dingen si ngasup mbuka gulungen Kitab si isegel alu pitu materai. Adi siidah i bas ay. 4 maka situhuna la ise pe si ngasup dingen metunggung nalangi Kitab e, si erbahanca Johanes ngandung. Si banci mbuka e me manusia si la enggo erdosa. Jadi ise si metunggung? Syaratna : 1) Kerabat dekat manusia; 2) Si lenga enggo erdosa; 3) Ngasup menebus dosa doni enda. Kenca idarami, la lit ijumpai i Surga, sabab Malekat labo kerabat dekat manusia. Janah i doni pe la banci ijumpai erkiteken manusia enggo erdosa. Ras enggo pasti la lit ise pe banci ijumpai i teruh doni, i ja Iblis ras kuasa-kuasa kegelapen tading i je. E me si erbahanca ceda ate Johanes erkiteken la lit ise pe si metunggung mbukasa Kitab e. Tapi i bas ay. 5 sekalak Pertua ngerana, “Ola kam tangis. Nehenlah! Singa i bas suku Juda nari, kesusuren si ipebelin i bas Daud enggo menang. Ia metunggung mecahken meterai si pitu e ras nalangisa”. Dua sebutan, “Singa dari suku Yehuda” dan “Tunas Daud” adalah sebutan yang sudah lama dipergunakan nabi-nabi Israel untuk Mesias. Kenca si e maka pujian ipenangkih man Anak biri-biri e. Sora Malekat meribu-ribu dingen erjuta-juta teremna! Alu sora si megang rende Malekat e, “Anak Biri-biri si enggo igeleh e metunggung ngaloken kuasa, kinibayaken, kepentaren, gegeh, kehamaten, kemulian ras puji-pujin!”

Je nari ibegi Johanes ka rende kerina mahluk, subuk si i langit, i doni, i teruh doni, ras si i bas lawit; gendekna kerina si nggeluh si nasa lit, “Ia si kundul i kursi kinirajan e ras Anak Biri-biri e, man baNalah puji-pujin, kehamaten, kemulian, ras kuasa rasa lalap seh rasa lalap!” Kerina makhluk i doni enda ngakui maka Yesus me “Sang Penebus”, sekaligus “Sang Penguasa”.

Aplikasi

Yesus ngenca Penguasa i surga ras i doni, Ia ngenca si metunggung nalangi Kitab e, Ia si enggo naluken kuasa Iblis. La lit ise pe si ngasup nalangi Kitab e seyakatan Yesus. Alu bage mabai kita tetap erpengendes man Tuhan i bas erbage-bage persoalen geluhta, Yesus ngenca si ngasup nampati kita. Ula pernah kita ernalem  man kuasa si deban. Bandingken ogen si pemena i ja Daud nggejapken pertolongen Tuhan.

“Anak Biri-biri si enggo igeleh e metunggung ngaloken kuasa, kinibayaken, kepentaren, gegeh, kehamaten, kemulian ras puji-pujin!” Bage pe kerina makhluk, subuk si i langit, i doni, i teruh doni, ras si i bas lawit; gendekna kerina si nggeluh si nasa lit ngendeken, “Ia si kundul i kursi kinirajan e ras Anak Biri-biri e, man baNalah puji-pujin, kehamaten, kemulian, ras kuasa rasa lalap seh rasa lalap!” Pujin ras kehamaten rikut kemulian man Dibata i bas Yesus ngenca. Terkadang lit sura-sura bas manusia guna ndarami pujian, kehamaten situhuna hanya itujuken man Dibata. Janah melala manusia ndarami kinibayaken, kuasa,  gegeh, ersepuh i bas ngerna, ndarami kemulian alu cara-cara si la mehuli. Pindolah man Tuhan sabab Ia ulu kerinana.

Banci jadi tetap mbue perbeben sialami kita walaupe Yesus enggo nebusi kita, enggo mereken kemenangen man banta,  tapi arusna lit sikap si berbeda i bas kita ndalani wari-wari kegeluhenta enda. Kita harus lebih kuat, reh paguhna kinitekenta erkiteken kemenangen Kristus si jadi kemenagenta ka kalak si tek man baNa. Hidup lebih bersyukur dan memuji Tuhan. Sabab Dibatanta i bas Yesus e me Dibata si melias.