PA Kategorial GBKP Tgl. 3 - 9 April 2016

PA MAMRE GBKP TGL. 3 - 9 APRIL 2016

Naras Bp. Rey Tarigan

Mamre terkondisi hidup memegang nilai-nilai yang lama sehingga tidak berkembang/kurang terbuka

Ogen : Kolose 3:5-10

Tema : Kam Manusia Si Mbaru

Tujun : Gelah Mamre ngasup :

1) Erjuang nadingken biak-biak geluh si ndekah

2) Nggeluhken kegeluhen si mbaru selaku anak Dibata

Metode : Studi Kasus

Penjelasen Bahan Ogen

Perpulungen Kolose ipanteki Epafras e me rekan sekerja rasul Paulus, Epafras ras rasul Paulus pernah ipenjara ras-ras i bas sada ingan (Flm. 23:24). Surat rasul Paulus man perpulungen Kolose pe erkiteken lit je peran Epafras (Kol. 1:7-8). Situasi si terjadi i bas perpulungen Kolose e me, lit je terjadi kinilatetapukuren (kebimbangan) i bas piga-piga perpulungen si terombang-ambing ajaren-ajaren sesat. Ajaren-ajaren si la mehuli e mempengaruhi moralitas piga-piga perpulungen si bimbang ndai si pada akhirna menimbulkan keresahan i tengah-tengah perpulungen.

Perbahanen-perbahanen si la mehuli e tangkas ijelasken rasul Paulus i bas ay. 5-10. E maka arah suratna enda, rasul Paulus mpetetap ukur perpulungen Kolose gelah tetap paguh erkiniteken man Yesus Kristus amin pe melala tantangen. Rasul Paulus ngingetkenca bahwasana kegeluhen i bas Kristus e me kegeluhen si mbaru. Adi enggo ipekeke Kristus berarti kegeluhen si male enggo la nai erkuasa, seharusna geluh si male e enggo mate radu ras kematen Kristus i kayu persilang. E maka i bas ay. 8-10 itegasken rasul Paulus man perpulungen Kolose gelah kerina perbahanen-perbahanen si la mehuli e simateken, siambekken, ula nai sipakeken i bas kegeluhen si mbaru. I bas ay. 12-17 ijelasken rasul Paulus kerna contoh-contoh perbahanen-perbahanen si ncidahkenca sebage manusia si mbaru i bas Kristus.

Pengkenaina

Arah bahan ogenta sendah, teridah bahwa ternyata kegeluhen si mbaru i bas Kristus e labo perkara si murah. Butuh ketutusen, keseriusan, ras perjuangan i bas :

1) Memahami kai si merupaken inti i bas iman Kristen. Ternyata untuk soal memahami saja melala denga kita si lenga banci ngaloken pokok-pokok iman Kristen. Lit si ngatakenca bagenda, “Firman Tuhan itu benar, tapi …” adi enggo lit kata “tapi” e ertina lenga teraloken denga Kata Dibata e, amin pe melala argumentasi si ibahan kita guna membenarken pemahamenta si iakap kita benar. Padahal kerina argumentasinta ndai secara tanpa sadar ncidahkenca bahwasana lenga teraloken denga Kata Dibata e tapi la pang kita ngatakenca bahwa Kata Dibata e “Tidak benar menurut saya”. Situhuna Kata Dibata e tangkas, lugas, sederhana, kita nge si rusur memutar-mutarkenca jadi rumit ras pelik demi untuk memenuhi hasrat kedagingenta si terselubung.

2) Kenca enggo sipahami Kata Dibata e, proses selanjutna e me ngelakokenca i bas kegeluhenta. I bas proses si peduaken enda pe melala denga kita si lenga banci terlakoken kita kai si iperentahken Dibata i bas geluhta.

Kai si terjadi i bas perpulungen Kolose e ncidahkenca bahwasana kita i bas gegehta, pemetehta, kinibayakenta, rsd., la ngasup kita guna ngaloken ras ngelakoken kerina si ngena ate Dibata. Usur kita lupa bahwa lit je Kesah si Badia si selalu siap sedia nampati kita i bas kerina kinilangasupenta. E maka pindolah rusur gegeh i bas Dibata nari gelah ipengasupNa kita nggeluh i bas kegeluhen si mbaru.

PA MORIA GBKP TGL. 3 - 9 APRIL 2016

Pdt. L. br. Sinuhadji (Nd. Rey Tarigan)

Si Man Ogen : Kejadin 41:33-38

Tema : NGUKURI RAS NGERENCANAKEN SI MAN BAHANEN

Tujun : Gelah Moria :

1) Ngukuri uga Jusup nehken rencana guna keselamaten bangsa Mesir

2) Ngasup erbahan perencanaan simehuli

Metode PA : Mpepulung Ide/Konsep

Penjelasen Bahan Ogen

Perikopta Kej. 41:33-38 lit i bas bagin Kej. 41:1-57 kerna Jusuf nerangken antusen nipi raja. I bas nipina iidah raja pitu lembu mbur ras pitu lembe kertang (ay. 2-4); janah pitu ruhi page perngis ras pitu ruhi page lambang (ay. 5-7). Antusen nipe raja e ituriken Jusuf ertina i bas ay. 25-32 e me kerna pitu tahun masa riba-iba pangan i belang-belang Mesir ras pitu tahun masa kelihen. Jusuf ngasup nuriken nipe raja e erkiteken gegeh Dibata nge siandalken Jusuf guna nuriken erti nipi e (bdk. Ps. 40:8, “Dibata nge si mereken kengasupen ngantusi nipi e”).

Ay. 33-36 isina e me strategi si arus ilakoken guna mengantisipasi masa kelebihen pangan ras kelihen gelah keberlangsungen kegeluhen i Mesir ras sekitarna banci tetap terjaga (survive). Cara si itawarken Jusuf e me :

• Raja arus milih sekalak si erpemeteh ras pentar guna ngaturken negeri (ay. 33, i bas Alkitab TB-LAI ipake istilah “berakal budi dan bijaksana”). Ertina, maka sekalak pemimpin arus lit ide (konsep) kerjana si jelas, si mampu menuangken ide i bas rencana kerja, tahapen kerja ras jelas tujunna si banci terukur arah pendahinna. Ertina, visi, misi, output-na, rsd., arus jelas.
• Angkat pe pegawai-pegawi si deban guna pepulung seperlima ulih peranin tupung paksa nakan riba-iba si pitu tahun. Tugas pegawe e jelas, e me mpepulung pangan, bereken kuasa guna nimpansa, i bas tep-tep kuta ras njagaisa. Langkah antisipasi ibuat, maka i bas masa kelebihen la boros entah pe isia-siaken pangan si lit.
• Pangan si ipepulung jadi persedian man negeri Mesir mengantisipasi masa kelihen.

I bas ay. 37-38 raja setuju kerna konsep si itawarken Jusuf, janah pengidah raja pe Jusuf ngenca si banci jadi pemimpin guna ngaturken si e kerina, si pentar dingen erpemeteh. Nina raja, “Labo lit dat kita jelma tersikapen asang Jusup enda, sekalak si lit Kesah Dibata i bas dirina jine”. Ertina, raja Mesir sendiri enggo mengakui maka Jusup layak jadi pemimpin labo hanya erkiteken ia jago, erpemeteh, tapi Kesah Dibata lit i bas dirina jine.

Aplikasi

Selaku Moria, si rusur ikataken “si nampati perbulangen ngaturken keluarga”, arus lit konsep (ide) guna kita banci mengatur kegeluhen jabunta : perduiten, persekolahen anak-anak rsd., termasuk tanggung jawabta i tengah-tengah gereja ras masyarakat. Si penting si arus silakoken kita e me nggeluh ersada ras Dibata. Adi siperdiateken sejarah kegeluhen Jusup maka ia tetap mengandalken Tuhan i bas ngalaken kerina tantangen ibas kegeluhenna (seninana ndayaken ia, ifitnah ndehara Potifar seh masuk ku penjara, rsd.). Tuhan alu kuasaNa nampati kita guna banci kita ngukuri ras ngerencanaken si man bahanenta.

PA PERMATA GBKP TGL. 4-10 APRIL 2016

Naras Bp. Rey Tarigan

(Minggu Kiniserah Kristus)

Lukas 18:31-34

Gelah PERMATA GBKP:

1) Ngasup nuriken kerna kiniseran si nialanken Yesus Kristus

2) Ersikap janah megenggeng i bas kiniseran selaku pengikut Kristus

Penjelasen Bahan Ogen

Bahan ogen sendah ncidahkenca bahwa enggo ieteh Yesus diriNa bakal ngalami kiniseran si luar biasa. Banci terbayangken kita, uga nge perasaan Yesus si sanga paksa si e terkenal, bahkan digadang-gadang jadi raja bangsa Yahudi guna naluken pemerentahen Romawi si paksa si e menjajah bangsa Yahudi. Untuk ngukurkenca “from hero to zero” saja mungkin e enggo merupaken beban mental si mberat, apai ka arus ngenanami penderitaan fisik si luar biasa, janah mate ka kedungenna. Tapi e merupaken pilihan sadar Yesus Kristus, walaupe situhuna banci saja isilahkenNa kiniseran e, erkiteken lit kuasa si luar biasa i bas diri Yesus Kristus, si mate pe banci ipegeluhNa mulihi, apai ka soal-soal si deban, kitik kel akap Tuhan Yesus. Kematen Yesus labo soal menebus dosa manusia saja, amin pe e nge si pentingna ras si mbelinna. I bas berita kitab Injil teridah je konspirasi para pemimpin Yahudi guna munuh Yesus erkiteken Yesus rusur menyatakan apa yang benar dan membongkar kebobrokan para pemimpin Yahudi. E situhuna perkara murah nge, robah saja para pemimpin Yahudi si cian ate nandangi Yesus e jadi manuk umpamana, selesai persoalan. Tapi e kerina la ipilihNa, Yesus lebih memilih menderita demi menebus dosa manusia. E si pentingna ibandingken kepentingan-kepentingan si debanna. Tapi pilihen Yesus e lenga banci ipahami ajar-ajarNa, erkiteken mungkin ajar-ajarNa masih denga iliputi eforia Guruna si erkuasa ras terkenal paksa si e.

Pengkenaina

Kiniseran e situhuna hal si alamiah terjadi i bas kegeluhenta. Adi sekalak danak-danak i bas tubuhna nari seh dewasa lenga pernah inanamina sakit pinakit, e situhuna arus jadi tanda tanya si mbelin, sebab sakit pinakit danak-danak secara biologis merupakan proses pembentukan imunitas. Tapi si usur terjadi e me kiniseran terjadi erkiteken dosanta entah pe kesalahanta sendiri.

Kiniseran si nialami Kristus merupaken sada simbolisasi bahwasana kerina kiniseran i bas doni enda enggo italuken i bas teruh kuasa salib Kristus. Kai kin si paling jadi kebiaren kita i bas doni enda? Lit dua, e me, penderitaan ras kematen. Duana enggo italuken Kristus. Ertina kai? Ertina ipengasup Dibata kita guna ngalaken kerina penderitaan erkiteken Kristus bahkan kematen sekalipe.

Tidak ada kebenaran yang tidak pahit, ertina, kebenaran e mengandung konsekuensi menyakitkan. Melala contoh kalak si benar i bas geluhna justru dibenci lingkungan sekitarna. Adi la tahan ia pasti enggo terbawa arus. Geluh i bas Kristus mengandung konsekuensi penderitaan, erkiteken kai si iajarkenNa e soal kebenaran erpalasken Kata Dibata. E maka selaku PERMATA si enggo iselamatken Kristus geluhta e merupaken geluh si mengandung konsekuensi penderitaan erkiteken Kristus. Tapi i bas si e, ula kita mbiar, erkiteken kuasa penderitaan ras kematen enggo italukenNa.