PA Kategorial GBKP Tgl. 24 - 30 April 2016

PA MORIA TGL. 24 - 30 APRIL 2016

Nrs. Bp. Rey Tarigan

Si Man Ogen : Perbahanen Rasul 8:26-37

Tema : Nuriken Pemeteh

Tujun : Gelah Moria :

1) Nuriken kai si icakapken Pilipus ras menteri Etopia

2) Nggit nuriken pemeteh guna kiniulin kalak si deban

Metode PA : Nuriken Pemeteh

Penjelasen Bahan Ogen

Pilipus e me salah sada i bas 7 kalak si ipilih guna nampati dahin-dahin rasul ngelai perpulungen si paksa si e semakin bue (Perb. Rasul 6:5). Pilipus ipilih erkiteken ia termasuk sekalak si memenuhi kriteria si ibereken rasul-rasul guna dahin enda, e me : mehuli, dem alu Kesah Si Badia, ras pentar. I bas Perb. Rasul 8:1-8 ituriken kebeluhen-kebeluhen si deban si lit i bas Pilipus, labo saja ia beluh ngelai perpulungen, tapi ia pe beluh meritaken Berita si Meriah, ngajari kalak, ras erbahan tanda-tanda sengget. I bas Perb. Rasul 21:8, Pilipus igelari per-Berita si Meriah, janah ia pe ngasup mabai keluargana geluh erkiniteken man Dibata (bdk. Perb. Rasul 21:9). Kerina si lit i bas diri Pilipus tentuna labo idatkenna alu proses si instan. Pilipus pastina tuhu-tuhu tutus nggeluh erkiteken man Dibata ras tutus erlajar kerna kerina si iajarken rasul-rasul.

Bahan ogenta sendah nuriken kerna Pilipus si meritaken Berita si Meriah, i bas petunjuk malekat nari, ku sekalak pejabat (menteri) Etiopia si atena mulih kenca ersembah i Jerusalem. Adi sekalak pejabat enda ndai reh i bas ingan si ndauh, Etiopia nari ku Jerusalem guna ersembah man Dibata i Jerusalem, tentuna ia sekalak si tek nandangi Dibata si isembah kalak Israel, tapi lenga itandaina Yesus Kristus. I bas sada tafsiren ikataken, erkiteken tutus atena guna erlajar kerna Kata Dibata, sope mulih ku kutana itukur pejabat enda sada gulungan kitap Yesaya si gedangna lebih 29 meter si meherga erkiteken gulungan kitap enda ibahan alu bahan kulit. I bas geretana iogena kitap Yesaya 53:1-8 tapi la iangakina kai maksudna. Kesempaten enda ipergunaken Pilipus guna meritaken Berita si Meriah. Amin pe la ituriken i bas bahan ogen kai si icakapken Pilipus man pejabat Etiopia enda, tapi enggo banci ipastiken bahwasana Pilipus ngajarkenca kerna Yesus Kristus Juruselamat si lit i bas kitap Yesaya 53:1-8 ndai. Akhirna sekalak pejabat Etiopia enda ndai ertobat ras iperidiken.

Pengkenaina

Hal penting si pemena si banci siusih arah Pilipus e me, ia sekalak si mehuli, dem alu Kesah Si Badia, pentar, beluh ngelai perpulungen, er-Berita si Meriah, beluh ngajar, ras ngasup mabai keluargana erkiniteken man Yesus Kristus. Si e kerina idatken Pilipus arah Dibata nari erkiteken tutus ia nggeluh erkiniteken man Dibata ras nggit ia erlajar arah rasul-rasul nari alu tutus. Si peduaken, Pilipus ngasup makeken kerina kebeluhenna e guna kemulian gelar Dibata i bas kegeluhenna. Ertina orientasi geluhna lanai guna dirina sendiri tapi guna kalak si deban ras guna kiniulin kalak si deban. Si peteluken, kita pe banci ngusih sekalak pejabat Etiopia ndai si semangat erlajarna sangat tinggi. Nggit ia erkorban demi semangat erlajarna enda ndai, janah ia pe nggit nungkun guna nambahi pemetehna.

I bas bahan PA-nta sendah, Moria iajuk gelah nggit nuriken pemetehna guna kiniulin kalak si deban. Guna si enda tentuna arus lit lebe pemeteh i bas Moria makana banci pemeteh e ituriken entah pe sibagiken ku kalak si deban. I bas si enda kita banci ngusih pejabat Etiopia si semangat erlajarna sangat tinggi. Bage pe kita banci ngusih Pilipus si melala kebeluhenna erkiteken tutus ia nggeluh erkiniteken man Dibata bage pe nggit ia erlajar arah rasul-rasul nari alu tutus. Kenca enggo melala pemetehta, hal si penting berikutna e me mengubah mindset. Adi pola pikirta masih berorientasi guna dirinta sendiri saja, melala pe pemetehta pasti la nggit kita berbagi ras kalak si deban, apai ka berbagi guna kiniulin kalak si deban. I bas hal enda kita banci ngusih Pilipus si orientasi geluhna guna kiniulin kalak si deban. Tek kita bahwa Dibata mpengasup kita menembus batas-batas si sedekah enda mungkin menghalangi Moria guna nggit berbagi guna kiniulin kalak si deban.

PA MAMRE TGL. 24 - 30 APRIL 2016

Nrs. Bp. Rey Tarigan

(Kekelengen si serta; Hukum Kasih)

Penguatan Jadi Diri

Ogen : Pilipi 4:5-9

Tema : Untungna Rukur Ras Ncidahken Perbahanen Si Mehuli

Tujun : Mamre ngasup :

1) Ngisi perukuren alu cara rukur si payo erpalasken perukuren Kristus

2) Naksiken ulih perukuren ras perbahanen si mehuli

Metode : Sharing

Penjelasen Bahan Ogen & Perenungen

Isi bahan ogenta sendah merupaken penutup surat rasul Paulus man perpulungen Pilipi si ipantekina. I bas penutup surat enda itekanken rasul Paulus man perpulungen Pilipi piga-piga hal, khususna i bas bahan ogenta sendah, e me : 1) Cidahkenlah perbahanen si mehuli man ise pe. 2) Pindolah kai si iperlukenndu i bas pertoton alu pusuh si dem pengataken bujur. 3) Tetap ersada ras Yesus Kristus gelah turah kemalemen ate si ngarak-ngarak pusuh ras perukuren. 4) Ukurilah kerina si mehuli. 5) Dalanken kerina ukur si mehuli e, khususna kerina si enggo iajarken rasul Paulus.

Bahan ogenta sendah e me hal-hal si sifatna praktis, e me hal-hal si labo saja perlu ieteh tapi arus silakoken i bas kegeluhen si tep-tep wari. Bagi semalna surat-surat rasul Paulus biasana iakhiri alu hal-hal si sifatna praktis, tujunna gelah kegeluhen kalak si enggo tek man Yesus Kristus e me kegeluhen si berdampak mabai kemalemen ate man sekelewetna. Sebab memang e si pentingna kel, kegeluhen kalak Kristen harus merupaken kegeluhen si mabai : kemalemen ate, kekelengen, hal-hal si positif, membangun, rsd., subuk arah pengeranana bage pe perbahanenna. Si e kerina ibenaken alu persadan ras Kristus, pertoton, ras perukuren si mehuli i bas Kristus.

Pengkenaina

Bahan PA Mamre sendah mabai kita guna ngusih kai si iajarken rasul Paulus man perpulungen Pilipi, e me : ersada ras Kristus, la ngadi ertoto, ras mengkondisiken dirinta guna rukur si mehuli bagi perukuren Kristus. Em palasna makana kita ipengasup Dibata guna ncidahken perbahanen si mehuli. Memang pasti melala tantangen si nihadapi kita, apaika cara rukur doni enda berbeda ras cara rukur Kristus. Kekelengen si niajarken Kristus e me kekelengen si labo bergantung i bas kondisi tertentu. Katawari paksa pe, i bas keadaan si uga pe, kai pe respon kalak man banta, tetap kita arus ngkelengi. Sementara, cara rukur doni enda e me sifatna transaksional, balas budi, adi mehuli kalak man banta makana kita pe mehuli, adi jahat kalak man banta terjahaten siban pe banci, saling balas membalas, dendam, rsd. Tapi amin bage gia, tek kita, Dibata si ngarak-ngarak kegeluhenta. Ulih si datken kita pe labo bagi doni enda si sifatna fana si lit batasna, tapi kemalemen ate i bas Dibata nari si la banci tertukur alu sennta ras sifatna kekal abadi. Em jatidirinta sebage Mamre si enggo ngaloken keselamaten i bas Yesus Kristus.

I bas PA-nta sendah banci kita saling sharing pengalamenta masing-masing i bas kita ncidahken perbahanen si mehuli, kai-kai saja tantangenna, ras banci saling mpegegehi.

PA PERMATA TGL. 25 APRIL - 1 MEI 2016

Nrs. Bp. Rey Tarigan

Roh yang memberitakan dan membebaskan

(Minggu Turunnya Roh Kudus)

Lukas 4:18-19

Agar PERMATA GBKP :

1) Menjelaskan peran Roh Kudus bagi kehidupan orang-orang percaya

2) Menyaksikan peran Roh Kudus dalam kehidupannya (memberitakan dan membebaskan)

Penjelasen Bahan Ogen

Bahan ogen e me sada bagin kitap Yesaya (Yes. 61:1-2) si iogeken Tuhan Yesus sanga wari Sabat i rumah pertoton i Nazaret. Sada bagin kitap Yesaya enda merupaken penegasen kerna misi Yesus Kristus i tengah doni enda e me guna meritaken Berita si Meriah man kalak si musil, erberita man kalak si tertaban maka ipulahi me ia, si pentang erpengidah me, si itindas ipulahi me, ras mpebetehken masana Tuhan mulahi bangsaNa enggo ibenaken i bas diri Yesus Kristus. Janah memang payo, adi siidah i bas pasal-pasal berikutna i bas Injil Lukas, e kerina si ilakoken Yesus Kristus i bas pelayanenNa.

Si jadi penekanen i bas bahan PA PERMATA-nta sekali enda e me peran Kesah si Badia i bas diri Yesus Kristus (ay. 18). Adi sinen i bas Pustaka si Badia, Padan si Ndekah nari seh ku Padan si Mbaru, mbelin kel peran Kesah si Badia enda. Piga-piga contoh pendahin Kesah si Badia i bas Padan si Ndekah :

• Enggo lit sope doni enda itepa Dibata ras erdahin i bas penciptaan manusia (Kej. 1:2; 2:7). Memelihara ras mplimbarui doni enda (Mas. 104:30).
• Erdahin i bas mperlengkapi kalak si ipilihNa (Kel. 31:3; Hak. 3:10; 14:6; rsd.).
• Erdahin i bas nabi-nabi (Yer. 31:33; Yes. 63:10-11; rsd.).
• Erdahin i bas pusuh manusia (Kuan 20:27) ras mabai manusia ku bas kegeluhen si benar (Mas. 139:7,23-24; Yeh. 36:26,27; rsd.).
• Ernubuat kerna kerehen Mesias (Yes. 11:2-9; 42:1-4; rsd.).

Piga-piga contoh pendahin Kesah si Badia i bas Padan si Mbaru :

• Erdahin i bas Yesus Kristus (Yoh. 3:34; 14:17; rsd.).
• Manteki Gereja alu peristiwa Pentakosta (Kis. 2:1-4).
• Erdahin i bas kerina dahin-dahin pelayanen Gereja ras meritaken Berita si Meriah (Perb. Rasul 5:1-5; 1 Tes. 1:5-6; Roma 15:30; Ef. 4:3,4; 1 Kor. 2:4, rsd.).
• Mabai ku bas kinijeran entah pe pertobaten (Yoh. 3:5-8; Perb. Rasul 9:7; 10:19,38,43,44; 11:12,15,16, rsd.).
• Mimpin ras nemani kerina kalak si tek i bas perbeben (Roma 8:14-16, 26-27; Ef. 1:13-14; rsd.).

Kesah si Badia memang la banci iidah kita, tapi karya-karyaNa nyata i bas kegeluhen kalak si tek. Kesah si Badia e me daya (kekuatan, energi, spirit) yang menghidupkan, mendorong kepada kebaikan, perbaikan, pembaharuan ras hal-hal si sifatna positif, membangun (bdk. Ulih Kesah si Badia, Gal. 5:22-23). Kesah si Badia erdahin denga seh asa gundari, seh rasa lalap.

Pengkenaina

Arah tema ras tujun PA PERMATA si sedah, iajuk PERMATA gelah menyadari peran Kesah si Badia i bas dirina, janah PERMATA ngasup naksiken peran Kesah si Badia e i bas kegeluhenna. Kesah si Badia enggo lit i bas kerina kalak si tek man Yesus Kristus. Janah rasul Paulus i bas ajaren-ajarenna mereken penekanen si cukup mbue kerna pendahin Kesah si Badia i bas perpulungen (Yun. charisma, charismata) guna pembangunen kula ni Kristus entah pe Gereja (bdk. Roma 12:6; 1 Kor. 12:4; rsd.). Hal enda tentu perlu isedari PERMATA, ertina, melala karunia-karunia khusus si ibereken Dibata i bas Kesah si Badia man banta kerina seh asa gundari. Janah karunia-karunia e ula sipahami secara sempit i bas konteks rasul-rasul nai, i bas kata si deban, karunia-karunia e labo saja si lit i bas surat-surat rasul Paulus (umpamana : 1 Kor. 12; Ef. 4; Roma 12; rsd.).

Melala karunia-karunia si deban si la tersurat i bas Pustaka si Badia, tapi fungsina tetap e me guna membangun GerejaNa. Kesah si Badia erdahin sue ras keadaan entah pe situasi Gereja i bas kerina jaman janah la banci sibatasi alu perukuren manusia. Umpamana, contoh si sederhana, enggo melala Gereja i bas paksa sendah si memanfaatken teknologi si berkembang, bagi penggunaan alat musik modern, penggunaan alat-alat digital i bas kebaktin, rsd., tentuna si e kerina la lit i bas Pustaka si Badia, tapi i bas paksa enda sangat ibutuhken Gereja guna pembangunan kula ni Kristus. La lit karunia Kesah si Badia si lebih unggul, kerina karunia Kesah si Badia penting guna membangun Gereja, amin pe i bas pengakapta kitik, sepele, rsd. (bdk. 1 Kor. 12:1-31). Kai pe karunia si ibereken Dibata man banta, indikatorna e me pelayanen i bas Gereja semakin maju ras berkembang. Adi sibaba ku bas kegeluhenta si tep-tep wari pe, indikatorna seri, geluhta semakin ipelimbarui, semakin maju, berkembang, erkiteken Kesah si Badia mabai kita ku kerina si mehuli. E maka, mari radu ras sisedari karunia-karunia Kesah si Badia si lit i bas kita, janah aplikasiken i bas kegeluhenta bage pe i bas pelayanenta.