Khotbah GBKP Minggu Tgl. 1 Mei 2016

KHOTBAH GBKP MINGGU TGL. 1 MEI 2016

Rogate (Ertotolah)

Pdt. Larena br. Sinuhadji (Nd. Rey Tarigan)

Invocatio : “Janah adi ipindondu la idatndu, sabap erkiteken tujunndu la mehuli; kai si ipindondu guna pesenangken dirindu saja ngenca” (Jakup 4:3)

Ogen : Johanes 14:23-29 (Tunggal)

Khotbah : Masmur 67:1-8 (Responsoria)

Tema : LAKOKENLAH KAI SI ITOTOKENNDU MAN DIBATA

Penjelasen Bahan Pustaka Si Badia

Bahan khotbahta e me ende-enden pengataken bujur Raja Daud, i bas Alkitab Terjemahan Baru (TB - LAI) ibere judul “Nyanyian syukur karena segala berkat Allah”. I bas syair ende-enden enda teridah pengalamen iman Raja Daud nandangi Dibata si isembahNa. Arah kerina si ialami Raja Daud i bas geluhna igejapkenna penemani Dibata. Kerina keputusen-keputusen Dibata nandangi geluh Raja Daud igejapkenna bujur ras mabai ku dalan si mehuli. Pasu-pasu Dibata i bas kegeluhen Raja Daud tuhu-tuhu igejapkenna alu simbolisasi taneh ulih Dibata si merupaken lambang sumber kegeluhen kerina mahluk i doni enda.

Pengalamen iman enda labo ipediat Raja Daud man dirina saja. Raja Daud metedeh gelah pengalamen iman enda pe ialami kerina bangsa-bangsa i doni enda. E maka ipembarken Raja Daud pengalamen imanna enda alu ende-enden pengataken bujur. Arah ende-endenna enda iajukna kerina bangsa gelah ngataken bujur man Dibata si isembahna Raja Daud. Tapi labo saja pengajuk man kerina bangsa guna ngataken bujur man Dibata. Raja Daud pe mindo man Tuhan gelah pasu-pasuNa e pe ipepalerNa man kerina bangsa-bangsa. Kata-kata “kita” ras “kami” merujuk ku kerina bangsa-bangsa termasuk bangsa Israel. 

Bahan ogenta si pemena merupaken bagin kata-kata pergegeh Tuhan Yesus man ajar-ajarNa sope IA nadingken doni enda. Perikop Yoh. 14:15-31 ibere judul “Ipadanken Yesus kerehen Kesah si Badia”, i bas TB - LAI ibere judul “Yesus menjanjikan Penghibur”. Lit dua hal si penting si ipadanken Tuhan Yesus iberekenNa man ajar-ajarNa, e me : 1) Kesah si Badia si ngajari ras mpersingeti ajar-ajarNa kerna kerina si enggo iajarken Tuhan Yesus. 2) Kemalemen ateNa si labo seri ras kemalemen ate si ibereken doni enda. Selain si e, lit dua hal si itekanken Tuhan Yesus e me : 1) Keleng ate man Tuhan Yesus. 2) Keleng ate enda teridah arah ngelakoken kerina si enggo iajarken Tuhan Yesus.

Invocationta mereken penekanen i bas palas pemindon-pemindonta arah pertotonta. Latar belakang surat Jakup enda, khususna perikop Jak. 4:1-10, ngerana kerna persinget man perpulungen Kristen kalak Yahudi, si geluhna masih terpengaruh peraten doni enda, e maka i bas kegeluhen perpulungen pe melala denga terjadi perjengilen ras perubaten. Alu kondisi si bagenda, pertotonna pe la ibegiken Dibata erkiteken pemindon-pemindonna i bas pertoton ipalasi nafsu doni enda. Penekanen rasul Jakup e me geluh erkiniteken arus teridah arah pengkebet geluhna, e maka geluh i bas Kristus la banci ipersada ras nafsu doni enda.

Pengkenaina

Minggu enda bengket kita ku bas Minggu Rogate entah pe minggu berdoa. Ertoto e me nafas kegeluhen kalak si tek. I bas tetap kita membangun komunikasinta ras Tuhan nge makana ngasup tetap kita ndalanken kegeluhenta enda rikutken si ngena ateNa. Arah ertoto pe maka kita megegeh ndalanken kegeluhenta enda.

Arah bahan khotbahta, Daud njemba kita guna tetap ngataken bujur man Tuhan sabab igejapi Daud kerina si lit bas ia erkiteken bekas pemasu-masun Tuhan. Terkadang i bas pertotonnta lupa kita ngataken bujur man Tuhan, padahal la nari terbeligai pasu-pasu Tuhan si enggo sialoken kita. Tetap isi pertotonta adalah permohonan demi permohonan. Mari sejenak sibandingken ras anakta, mindo ia lalap, sekali pe la pernah katakenna bujur i bas kai si enggo ialokenna bas kita nari. Tentu labo ka pas, je nari siajari ka anakta guna lebe ia ngataken bujur arah kai si enggo ialokenna. Bandingken 3 ucapan penting si arus terbiasa  kita melaskenca: maaf, tolong ras terima kasih.

Palasta ertoto tentu kiniteken man Tuhan Yesus Kristus si teridah arah kerina pengkebet geluhta. Tentu labo ka ibegiken ras ijabab Dibata adi pemindonta pe ipalasi nafsu doni (sura-sura kedagingen). Ras pe labo ka ibegiken Dibata adi perbahanenta pe labo ndalanken si ngena ateNa (bdk. Jesaya 1:15  “Adi iangkatndu tanndu ertoto, mintes Kupudiken. Aminna uga gia buena pertotonndu la Aku nggit megikenca, sabap alu tanndu enggo nterem kam ngamburken dareh kalak”.) Tetap kita erpengendes man Tuhan gelah kesah siBadia sienggo iberekenNa man banta ngajari kita guna tetap ndalanken singena ateNa.

Tema : “Lakokenlah kai si itotokenndu man Dibata”. Lit lagu rohani karo nina totoken si idahikenndu ras dahiken si itotokenndu. Ertina, i bas kita erkai pe tetap kita ersukuten, erpengendes man Dibata, janah kai si enggo sitotoken ndai, arus ka sidahiken. La pas, adina sitotoken ibereken Tuhan rejeki man banta, adi erdahin pe kita kisat, entah pe bereken kesehaten si sempurna man bangku ninta tapi pantangen pinakitta sipan, umpamana. Tuhan Yesus Jurusyafaatta, usihenta maka i bas kegeluhen pelayanenNa i doni pe tetap IA membangun komunikasi ras Dibata si enggo ngutus IA. E maka tetaplah kita rembak ras Tuhan arah pertotonta katawari paksa pe.