Khotbah GBKP Minggu Tgl. 17 April 2016

KHOTBAH GBKP MINGGU TGL. 17 APRIL 2016

Jubilate (Ersuraklah)

Pdt. Larena br. Sinuhadji (Nd. Reynard Tarigan)

Invocatio : “Sabab kerina sinasa lit Dibata njadikenca, janah kerina e lit erkiteken Ia dingen man gunaNa. Terpujilah Dibata seh rasa lalap. Amin.” (Roma 11:36)

Ogen : Ketangkasen 7:9-17 (Tunggal)

Khotbah : Kronika 16:31-36 (Responsoria)

Tema : MERIAHLAH O DONI RAS LANGIT KERINA

Penjelasen Bahan Pustaka Si Badia

Perikopta lit i bas sada bagin keseluruhen 1 Sam. 16:8-36 (bdk. Alkitab TB - LAI dimulai dari ay. 7 dengan judul “Nyanyian Puji-pujian Daud”, bhs. Karo, “Ende-enden Pujin”). Puji-pujin pengataken bujur man Tuhan erkiteken peti perpadanen ipiser ku Jerusalem, i ja enggo isikapken Daud kemah guna ingan peti perpadanen e. Je nari itetapken Daud piga-piga kalak Lewi guna minpin kebaktin man Tuhan i lebe-lebe peti perpadanen alu ende-enden ras pujin man baNa. Si itetapken jadi kepalana e me Asap, lit si ngkuit kulcapi, si malu ceracak ras ngembus terompet. Mulai i bas paksa e nari me si pemenana Daud mereken tanggung jawab man Asap ras senina-seninana kalak Lewi lako ngendeken ende-enden pujin man Tuhan (terj. TB - LAI : “Kemudian pada hari itu juga, maka Daud untuk pertama kalinya menyuruh Asaf dan saudara-saudara sepuaknya menyanyikan syukur bagi Tuhan”).

Ay. 31-36 merupaken bagin i bas ende-enden si niangkatken man Tuhan tupung peti perpadanen ipepiser. Peti perpadanen e me lambang kehadiren Tuhan i ja Tuhan ringan i tengah-tengahna janah nampati umatNa. Iajukna, gelah doni, langit, lawit ras kerina mahluk si lit i bas ergerugulah, mbal-mbal, batang-batang kayu kerangen ersurak meriah i adep-adepen Tuhan erkiteken Tuhan merentah doni enda. Doni ras langit ikut ermeriah ukur naksiken man bangsa-bangsa maka Tuhan e nge raja. Ertina, labo hanya manusia saja si banci mpermuliaken Tuhan tapi kerna tinepa Dibata banci ermeriah ukur, ertepuk rikutken carana masing-masing. Selain pujian, pengagungen man Tuhan, la lupa arah ende-enden e pe iangketken umat pengataken bujur man Tuhan erkiteken kiniulin ras keleng ate Tuhan si tetap rasa lalap. Je nari pemindon gelah Dibata mereken keselamaten. Gelah Tuhan tetap si mpersadaken umatNa, ras mulahisa i bas erbage-bage kiniseran si ialami umatNa. Gelah alu bage umat tetap ngataken bujur ras muji gelar Tuhan si badia. Kenca ende-enden enda iangkatken maka kerina umat ngaloi alu kata “Amin”. Ende-enden enda ipebengket ku bas Masmur 100:5, 107:1, 118:1, 136:1.

Ogenta merupaken bagin i bas pengenehenen Johanes asum i pulau Patmos, i ja enterem kel idahna jelma si laterbeligai jumlahna. I ja asalna i bas kerina bangsa, suku, negara ras i bas cakap nari si tedis i lebe-lebe kursi kinirajan dingen Anak biri-biri Dibata. Kerina ia make jubah mbentar dingen njemak lambe. Kerina kalak enda ngerana alu sora megang nina, “Keselamatenta reh i bas Dibata nari, e me si kundul i kursi kinirajan e dingen i bas Anak biri-biri e nari”.  Janah kerina malekat, pertua-pertua, mahluk si empat (bdk. Ps. 4:7 : mahluk si pemena bagi singa, si peduaken bagi lembu jenggina, si peteluken bagi manusia, ras si peempatken bagi rajawali kabang) erjimpuh i lebe-lebe Dibata ayona seh ku taneh janah nembah man Dibata, nina, “Amin! Pujin ras kemulian, kepentaren ras pengataken bujur, kehamaten, gegeh ras kuasa man Dibata seh rasa lalap. Amin”.

Arah dialog Johanes ras sekalak pertua, maka kerina kalak si make baju mbentar enda e me kalak si enggo ngasup mentasi kiniseran si mbelin. Enggo ibersihkenna jubahna dingen ipentarina alu dareh anak biri-biri ni Dibata. Erkiteken si e me maka tedis ia kerina i lebe-lebe kursi kinirajan Dibata, janah suari ras berngi isembahna Dibata. Kerina kalak enda la nari muas entah melihe, la nari iparpari las matawari entah las, sabab Anak biri-biri ni Dibata e jadi permakanna, janah Dibata si ngapusi iluhna mambur.

Pengkenaina

Minggu enda igelari Minggu Jubilate, Minggu Ersuraklah, ipalasi Masmur 66:1 “Ersuraklah man Dibata alu meriah, o doni kerina”. Teluna bahanta mereken alasan si jelas maka kita rikut doni ras langit ersurak muji Tuhan

I bas invocationta, kerina sinasa lit Dibata si njadikenca janah kerina lit erkiteken Ia dingen man gunaNa. Terpujilah Dibata rasa lalap. Kita itepa Dibata guna mpermuliaken Ia (Soli Deo Gloria).

Labo hanya manusia si ersurak tapi ikut ras lawit alu sora ergeruguh, batang-batang kayu, langit rikutken carana masing-masing ersurak muji Tuhan. Tinepa labo man sembahen.

Janah perkuah ate Tuhan mpengasup kita menang nggeluhken geluhta i doni enda alu erbage-bage tantangenna, janah erkiteken si e suari ras berngi isembah ras sipuji Tuhan si enggo nelamatken kita. La lit nari kesusahen, muas, melihe, iparpari las matawari dingen Dibata si ngapusi iluh mambur. Ketedehen ateta, maka kita termasuk bagin i bas kalak si la terbeligai nteremna si muji-muji Tuhan dahinta suari ras berngi. Janah e banci sidatken kita asum kita tetap setia mpertahanken kinitekenna seh ku ujungna. Geluh senang i surga arus mulai ibiasaken asum kita nggeluh i doni enda. Ertina, aminna pe kita nggeluh denga i doni enda, tapi karakter surga, suasana surga tetap banci sicidahken. Kegeluhenta e me kap puji-pujin ras penembahen man Tuhan. Labo hanya arah rende, tapi arah kerina pengkebet geluhta. Bahkan amin sekali erbage-bage tantangen nderpa geluhta tetap kita ngasup ngataken bujur ras muji gelar Tuhan.