Bimbingen PJJ Tgl. 7 - 13 Februari 2016

BIMBINGEN PJJ TGL. 7 - 13 FEBRUARI 2016

Pdt. Larena br. Sinuhadji (Nd. Reynard Tarigan)

Tema : PENANDAIKU NANDANGI KRISTUS MPELIMBARUI GELUHKU

Ogen : Pilipi 3:1-10

Penjelasen Ogen & Perenungen

I bas bahan Pustaka si Badia ituriken kerna perobahen si terjadi i bas diri Paulus kenca enggo itandaina ras tek ia man Yesus Kristus. Asum lenga tandaina Yesus tuhu-tuhu ia ernalem nandangi Undang-undang Taurat sabab iakapna undang-undang e menyelamatken. Bahkan erkiteken tutusna nandangi undang-undang e me maka igasgasina kalak Kristen paksa si e. Tapi perjumpaan ras Yesus maba perobahan si total i bas kegeluhen Paulus. Kai nai si iakapna untung, genduari erkiteken penandaina kerna Kristus enggo iakapna rugi. Man Paulus penandaina kerna Yesus e me si mehergana kel i bas kegeluhenna. Penandai kerna Yesus i jenda enggo pasti labo sekilas, tapi mbages ras lit proses si ialami Paulus. Labo terjeng teori kerna Yesus tapi enggo igejapi Paulus kuasa kematen ras kekeken Kristus i bas kegeluhenna si erbahanca ngasup ia ermeriah ukur katawari paksa pe erkiteken persadan ras Tuhan, amin melala kiniseran si ibentasi Paulus.

Perbahan enggo ialokenna keselamaten i bas Kristus labo arah ngikutken undang-undang tapi arah kiniteken man Yesus maka tegas Paulus mpersingeti kalak Jahudi bahkan kalak Jahudi Kristen si ernalem denga nandangi undang-undang. Metenget nina Paulus nandangi kalak si tetap denga ernalem nandangi undang-undang sunat, sabab iakapna sunat e menyelamatken. Paulus alu la biar-biaren ngatakenca maka kalak si bage jahat perbahanenna ras iperserina ras biang.

Adi nai iusahakenna kel dirina rembak man Dibata arah ndalanken undang-undang, tapi kenca enggo itandaina Yesus Kristus, Dibata jine i bas Yesus Kristus si enggo ngerembaken diriNa kempak Paulus erkiteken kinitekenna. I bas Paulus tek man Yesus, kinitekenna me si ngerembaken ia man Kristus. Jelas, tuhu-tuhu igejapi Paulus bedana ia si nai ras gundari. Adi nai berusaha ia sekuat tenaga uga makana banci selamat arah erbage-bage cara i bas ndalanken undang-undang tapi gendari Tuhan Yesus jine enggo nelamatken ia arah perkuah ateNa. Kinitekenna man Yesus me si nelamatken Paulus. Janah e me si meherga na kel iakap Paulus i bas kegeluhenna, la lit nari si deban. La nari mbue sura-sura Paulus tapi sada ngenca e me kap gelah itandaina Kristus dingen igejapkenna kuasa kekekenNa janah ikut ngenanami kiniseranNa dingen bali ras Ia i bas kematenNa alu pengharapan ia pe ipekeke Dibata i bas si mate nari ku kegeluhen. Ertina, sura-sura Paulus maka i bas kegeluhenna tetap ia mampu menang ngalaken erbage-bage kiniseran si ialamina erkiteken tetap setia i bas kinitekenna ras tek ia maka ibereken Dibata man bana kegeluhen si rasa lalap.

Si jadi perenungen man banta e me, seh i ja penandaita nandangi Kristus mpelimbarui geluhta? Arah kesaksin geluh rasul Paulus erlajar kita kerna pertobatan si mabai ia ku bas perobahen geluh si nyata. Perobahen si berdampak, si banci inanami kalak Kristen seh asa gundari. Si jadi persoalen kemungkinen besar e me penandaita nandangi Kristus lenga mpelimbarui geluhta, seh makana geluhta seri denga ras kalak si deban si lenga itandaina Yesus Kristus. Berdampak tapi berdampak negatif man dirinta sendiri bage pe man kalak si deban. I ja enda hambaten-hambatenna? Enda nge si banci isik-siki i bas PJJ-nta sendah. Kenca siteh kai-kai saja hambatenna, e kerina banci jadi bahan evaluasinta ras tekadta guna mpekena-kenasa secara pribadi bage pe secara bersama-sama i bas persadanta sebage persadan kalak si tek, gelah sasaren GBKP i bas 5 tahun ku lebe enda tuhu-tuhu terjadi transformasi (perobahen) i bas sebagian besar anggota-anggotana alu proses step by step, selangkah demi selangkah. Enda perlu menjadi gerakan bersama erkiteken kondisi entah pe situasi perpulungenta sangat mempengaruhi pertumbuhan iman secara pribadi bage pe kolektif.