Bimbingen Khotbah Minggu 14 Februari 2016

BIMBINGEN KHOTBAH MINGGU 14 FEBRUARI 2016

PASSION II INVOCAVIT : ERLEBUH IA KU AKU

Pdt. Larena br. Sinuhadji (Nd. Reynard Tarigan)

Invocatio : “Labo perban lit si kurang i bas Ia maka ialokenNa persembahen manusia, sabap Ia jine kap mereken kegeluhen, kesah, ras kerina keperlun manusia” (Perbahanen Rasul 17:25)

Ogen : Roma 10:8b-13 (Tunggal)

Khotbah : Ulangen 26:1-11 (Tunggal)

Tema : KUBABA MAN TUHAN ULIH SI MEHULINA

Penjelasen Bahan Pustaka Si Badia

Palasta mere man Tuhan jelas erkiteken enggo leben Ia merekenca banta. Labo perban Tuhan kekurangen, entah Ia butuh. Jelas i bas invocatio perkataan Paulus man kalak kuta Aten, “Labo perban lit si kurang i bas Ia maka ialokenNa persembahen manusia, sabab Ia jine kap mereken kegeluhen, kesah, ras kerina keperlun manusia” (Perb. Rasul 17:25). Ia ulu kerina sinasa lit, termasuk si lit i bas kita manusia. Manusia hanya ngulihkenca kai si enggo ibereken Tuhan sebage pengataken bujur. I bas pengogen si pemena pe enggo ijelasken Paulus kerna kiniteken si mabai kita ku bas keselamaten, em pereme Dibata si belinna man banta kerina sebage kalak perdosa. Keselamaten si enggo ialoken kita e palasta ngataken bujur man Dibata alu persembahennta, e makana i bas Roma 12:1 iajuk Paulus perpulungen Roma guna ngendesken kulana man Dibata selaku persembahen si nggeluh rikutken si ngena ateNa.

Bangsa Israel i bas bahan khotbahta iperentahken Musa lako nehken persembahen ulih juma si pemena. Alasenna jelas, sabab Tuhan alu gegehNa si mbelin enggo mulahi bangsa Israel i bas Mesir nari, ilakoken Tuhan tanda kuasa ras kejadin-kejadin si mejin. Ibereken Tuhan negeri si mehuli ras mehumur. Bahkan tuhu-tuhu igejapi bangsa Israel labo lit kai pe bas bangsa Israel ope idilo Tuhan nini-nini bangsa Israel. Kalak perlajang i Mesir. Awalna sitik ngenca beligan kalak enda, tapi dungna jadi bangsa si mbelin ras megegeh. Erkiteken si e me maka itindas bangsa Mesir e kalak Israel. Tapi Tuhan e me kap Dibata si perkeleng, ibegiken ras ijabab Tuhan kesusahen bangsa e, ras ibereken Tuhan serpang pulah. Alu bage jelas, persembahen si ibereken tep-tep bangsa Israel mperani jumana sebage tanda pengataken bujur man Tuhan si enggo leben mereken si terbaik ku tengah-tengah kegeluhen bangsa Israel, sekaligus gelah tetap ngajari bangsa Israel mpehaga Tuhan ras nginget Tuhan i bas kerina dampar geluhna. Ula sempat ilupaken bangsa Israel kerna penemani ras pengaturen Tuhan nandangi kegeluhen bangsa Israel.

Pengkenaina

I bas Minggu Passion si peduaken, mulihi sievaluasi kualitas persembahenta man Tuhan. Enggo me si mehulina sibereken man Tuhan entah metahat denga i bas kita nehken pengataken bujur man Tuhan? Labo soal melala entah sitik tapi palas kita nehken persembahen e, e me kinitekenta. Sigejapken uga penemani ras pengkawali Tuhan i bas kegeluhenta. Sigejap luar biasana perbahanen Dibata man banta. Adi si e kerina enggo sigejapken, la nari kita pang la kita mereken si mehulina man Tuhan. Rikutken pasu-pasu si enggo ibereken Tuhan, sibereken si terbaik man Tuhan. Ula nari jungut-jungut, ula nari terpaksa, ula nari ndarami pujian manusia. Perban cabini lebe nge maka kita melala mere, erkiteken isebutken gelarta bas momo maka galang sibereken persembahenta, rsd. Tapi adi ise pe la lit si metehsa, minter berbeda perbahanenta, banci jadi la nari kita mere pe. Lit motivasi si deban, labo tulus dalam rangka mpehagaken ras ngataken bujur man Tuhan. Lit deba kalak la akapna rugi, erjuta-juta keri senna guna belanja barang-barang ber-merk, nukur pulsa guna online setiap saat pe sitahanken, tapi 20 ribu persembahenna pe rugi kel akapna ipersembahkenna man Tuhan. Adi kita ersembah, si terbaiklah sibereken man Tuhan sabab Tuhan mehuli tetap man banta.

Temata i bas wari Minggu sendah “Kubaba Man Tuhan Ulih Si Mehulina” e merupaken tekadta guna terus-menerus meningkatkan kualitas ras kuantitas persembahenta man Dibata alu kai pe si mehulina si lit i bas kita.