Bimbingen PJJ Tgl. 31 Januari - 6 Februari 2016

BIMBINGEN PJJ TGL. 31 JANUARI - 6 FEBRUARI 2016

Pdt. Larena br. Sinuhadji (Nd. Reynard Tarigan)

Tema : I JENDA AKU SURUHLAH AKU

Ogen : Jesaya 6:1-8

Penjelasen Bahan Pustaka Si Badia

Jesaya idilo Tuhan jadi nabi, ikaitken ras kematen raja Uzia. Adi sioge 2 Raj. 15, i bas masa pemerentah raja Uzia i ja 16 tahun denga usiana ia enggo jadi raja, janah kidekah 52 tahun ia memerentah jadi raja. Memang tantangna ia jadi raja, luar biasa pembaharuan si ibahanna, tapi la total pembaharuan si nilakokenna. Ingan ersembah man dibata-dibata si deban la radaskenna, arah si e mabai bangsa Israel ersembah man dua tuhan. Termasuk pemimpin-pemimpin si deban pe la jadi contoh. Si lit sen ngenca kasusna ibelana, bahkan la lit kebujuren. Si megegeh nindes si la megegeh. Secara ekonomi, politik, keamanan, sosial, morat-marit. I bas situasi si bagenda me Dibata ndilo Jesaya jadi suruh-suruhenNa.

Icidahken man banta i bas sada pengenehenen, idahna Tuhan i bas Rumah Pertoton. Ia sangana kundul i bas kursi kemulianNa, jubahNa ndemi kerina Rumah Pertoton. Isekelewetna lit tedis malekat Serafim, si ernala-ernala bagi api, lit 6 kabengna (2 nutupi ayona, nahena dua nari guna ia kabang). Sialon-alon  kerina malekat Serafim e rende muji Tuhan, “Badia, badia, badia Tuhan si mada kuasa badia kap, doni enda dem alu kemulianNa”. Bagem bagi sora koor, merdu, erbolo-bolo, seh makana palas Rumah Pertoton e mugur-ugur ibahan sorana janah Rumah Pertoton dem alu asap. I bas perjumpaanna ras Tuhan, sedar Jesaya kerna dirina, sedar ia kerna Dibata mada kuasa si enggo idahna, minter iungkapkenna, “Cilaka me aku”. Itandai Jesaya dirina kalak si perdosa, meluat, tiap ranan si mentas i bas biberna nari dosa kerina, bahkan tading bas lingkungen si perdosa ka. Penggejapen kerna dosana secara pribadi, kinilatunggungenna, janah dosa bangsana. Kenca idahna Tuhan, la nai iakapna ia metunggung, la layak. Kenca bage sada i bas malekat Serafim ndai nari kabang ndahi Jesaya. Ibabana rara si ibuatna i bas batar-batar persembahen nari alu jepit-jepit. Ikuitna biber Jesaya alu rara ndai, jenari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi”. Api e me sada lambang penyucian, pembersihen. Jesaya isuciken alu api sebagai lambang ia enggo ibersihken, ikudusken seh makana la nari seri ia ras situasi sekelewetna. Jesaya nggejapken, ia si awalna la metunggung, enggo ipetunggungken Tuhan, lit proses perdamaian arah pengalemi dosa i bas Dibata nari, si erbahanca gundari lit perbedaanna, lit gegeh si mbaru, semangat si mbaru. Jesaya ijadiken Tuhan Jesaya si mbaru, tampil beda ras kalak si deban.

E maka nina Tuhan, “Ise enda ku suruh, ise si nggit maba berita i bas Aku nari?” E maka minter ialoi Jesaya, “Enda aku Tuhan, suruhlah aku”. Igejapi Jesaya, Tuhan si petunggungken ia, si melayakken ia, si mereken gegeh, makana pang ia ngatakenca “I jenda aku Tuhan suruhlah aku”. Tanpa tertaren-taren, ibahanna erbage-bage alasen, Jesaya ngueken dingen ndalanken perentah Tuhan.

Aplikasi

Lit istilah pelesetan i bas “Gafatar” nari, e me “Gapatar” nina, singkaten “gerakkan apa-apa entar”. Umumna enda terjadi nandangi anak-anakta asum sibereken penugasen man bana mis katakenna “entar” (entah pe “nanti” bas bhs. Ind. si benar) la langsung sidahiken. Umpamana, sisuruh erlajar, “Entar Mak”. Sisuruh ridi, “Entar Pak”. Sisuruh nampati kita, aloina ka “Iya Mak entar ya”. Banci jadi kebiasaan enda pe alu tanpa isedari ngkenai kita asum Tuhan mindo kita guna naksiken kuasa ras keleng ateNa subuk i tengah-tengah keluarga, gereja, masyarakat i ja kita tading. Sifat tertaren-taren, umpamana, “timai lebe sibuk denga”, “anakku kitik denga lenga bo banci aku melayani”, “aku pe melala denga si man tangkelenku”, “labo kap tugasku e me tugas Serayan Tuhan (Pdt./Pt./Dk.), “karilah adi aku enggo pensiun je maka aku banci ku gereja”, “ula aku jadi pengurus, ula jadi panitia, si deban saja, la lit pemetehku, ngudasa denga aku”, rsd. Seribu satu alasan siban guna la kita makeken dirinta jadi alat mperbarken kuasa ras keleng ate Tuhan. Bahkan lit ka deba, enggo pe rusur ku gereja, lit denga bas kita si murah denga tersinggung dikenca la bagi ukurna si terjadi, piah dungna, man tami-tamin guna banci geluhna jadi berkat man sesama.

Si jadi perenungen man banta, e me la lit waktu si tepat guna kita ipake Dibata jadi alatNa selain gundari entah pe sendah, saat ini. Saat yang paling tepat adalah saat ini. Waktuna guna ngukuri dirinta enggo cukup, gundari uga makana geluhta si kentisik enda banci memuliaken Tuhan ras erguna man kalak si deban. Sasaran GBKP tahun 2016: “Meningkatkan komitmen warga GBKP yang misioner untuk berpartisapasi dalam pelayanan”. Arah sasaran enda, iarapken reh setiana, reh tutusna perpulungen GBKP guna aktif muat bagin i bas kerina dahin-dahin gereja, umpamana: sebage pendoa syafaat, singers, pemusik, panitia, pengurus, pelayan KAKR (guru), si ngalo-ngalo perpulungen, ngiah-ngiahken ras melayani perpulungen si sakit, kepaten, rsd.

Sifat tertaren-taren banci ikataken seri bagi raja Uzia si la tuntas ngelakoken pembaharuan. Sifat tertaren-taren banci ka ipake Iblis gelah kita la ngelakoken si mehuli si ngena ate Dibata. Banci ka Iblis si mpeturah perukuren i bas kita “Kari ma banci denga”, “Lit denga waktu kari”, rsd., piah dungna la lit waktu guna ngelakoken si mehuli ras turah penyesalen i bas dirinta. Sebab memang e strategi si ipake Iblis guna menjermusken kita gelah la sipake waktunta si enggo ibereken Tuhan man banta guna ngelakoken si mehuli. Sangana sakit, la banci erkai pe, entah pe nandangi mate je makana kita mindo man Tuhan gelah banci melayani, umpamana. Je menyesal kita erkiteken la nai lit waktunta guna kita ipake Tuhan jadi alatNa. E maka mari siusih nabi Jesaya, singkirkan segala keraguan ras kekuatiran i bas dirinta, nggit kita ipake Tuhan ras tulus melayani. Teklah kita, Tuhan si petunggungken kita, si melayakken kita, ras si mereken gegeh man banta guna ngelakoken si ngena ateNa.