Bimbingen Khotbah MInggu 7 Februari 2016

BIMBINGEN KHOTBAH MINGGU 7 FEBRUARI 2016

Minggu Passion I : Estomihi (Jadi Man Bangku Lingling Kecion)

Pdt. Larena br. Sinuhadji (Nd. Reynard Tarigan)

Invocatio : “Tuhan nggeluh kap! Pujilah Penampatku! Beritaken kemulian Dibata sinelamatken aku” (Masmur 18:47)

Ogen : Keluaren 34:29-35 (Tunggal)

Khotbah : 2 Korinti 3:12-18 (Tunggal)

Tema : PEMBINCARKEN KEMULIAN DIBATA

Penjelasen Bahan Pustaka Si Badia

Bahan ogenta isina kerna Musa si enggo nusur i deleng Sinai nari kenca 40 wari 40 berngi dekahna ia i deleng e. Enda me perentah Tuhan si peduakaliken man Musa gelah ibahan Musa dua papan batu si seri ras si pemena ndube si enggo ipecahkenna erkiteken paksa si e, ibahan bangsa Israel ras Harun patung lembu emas (Kel. 32:19). Tupung Musa nusur i das deleng Sinai nari maba sepuluh pedah Dibata, ayona ersinalsal sabab enggo ia ngerana ras Tuhan, tapi ia sendiri la menyadari, la ietehna. Tapi sebalikna Harun ras kerina bangsa Israel si deban ngidah ayo Musa siersinalsal, e maka mbiar ia kerina ndeherisa (ay. 30, bhs. Ind. : “Ketika Harun dan segala orang Israel melihat Musa, tampak kulit mukanya bercahaya, maka takutlah mereka mendekati dia”). Idilo Musa bangsa Israel je nari Harun ras kerina pemimpin-pemimpin perpulungen bangsa Israel ras iendesken Musa undang-undang si ibereken Tuhan man bana i das deleng Sinai. Kenca enggo dung Musa ngerana itamburina ayona alu uis. Adi lawes kenca Musa ku bas kemah perjumpaan guna ngerana ras Tuhan, itangtangina tutup ayona e. Kenca enggo ia jumpa ras Tuhan, iturikenna man bangsa Israel asa kai si enggo iperentahken Tuhan ia ngatakenca. Adi ngerana ia man bangsa Israel itutupina ayona, sabab idah bangsa ndai ayona ersinalsa. Tapi adi ngerana ia ras Tuhan itangtangina tutup ayona ndai.

Ayo Musa si ersinalsal nuduhkenca maka perjumpaan Musa ras Dibata si sangat intim (ayona ersinalsal sebab enggo ia ngerana ras Tuhan). Banci kataken i antara nabi-nabi, imam-imam entah pe tokoh-tokoh bas Pustaka si Badia, Musa denga si memiliki relasi si sangat personal. Piga-piga kali Musa banci jumpa ras ngerana petala-tala ras Tuhan (Kel. Ps. 3, 19, 24:12-18, 34). Efek perjumpaan Musa ras Tuhan si intens erbahanca kemulian Tuhan ersinalsal bas ayo Musa. Sinalsal ayo Dibata teridah i bas ayo Musa. Tapi sebalikna Harun ras bangsa Israel mbiar ngidah ayo Musa si ersinalsal sabab minter isedarina maka mbue kel dosa ras kesalahenna man Tuhan.

I bas bahan khotbah (2 Kor. 3:12-18), ipake Rasul Paulus kejadin tupung Musa nusur i das deleng Sinai sebagai sada perbandingen, maka ia ras timna la bali ras Musa, si make penutup ayo gelah ola idah kalak Israel sinalsal e, e lesap seh bene. Paulus la erleja-leja ngelumbaken firman Tuhan gelah “penutup ayo” bas diri bangsa Israel terbuka, si erbahanca seh ngayak gundari bangsa Israel erbatu-batun ukurna ras nutupi ukurna guna ngaloken berita si meriah. Tapi pusuh si erbatu-batun ndai, kekerasan hati banci berubah lembut, nggit patuh asum bangsa e “erkusur kempak Tuhan” bali ras si ilakoken Musa. Ertina, tek man Tuhan Yesus ras ngaloken kuasa Kesah si Badia erdahin i bas  geluhna. “Penutup” dengan sendirina nantang asum kita reh ngerembaken diri man Tuhan, ras ibereken Tuhan pusuh si melemuk. Jelas nina Paulus, Kesah Tuhan si Badia si lit bas kita erkuasa guna mbebasken kita i bas dosa. Kemualian Tuhan si lit bas kita arus tetap ibincarken. Kemulian Tuhan si lit bas kita, erkiteken kerembakenta tetap ras Ia ras kuasa Kesah si Badia si erdahin bas geluhta si ngobahken kita wari lepas wari, seh makana reh dekahna reh muliana, seh maka kita dungna segambar ras Tuhan.

Aplikasi

Tema : “Pembicarken Kemulian Dibata”. Kemulian Dibata lit bas kita erkiteken gambar ras tempas Dibata lit  bas kita asum kita itepaNa. Tapi erkiteken dosa manusia, kemulian Dibata i bas manusia ceda. Puji Tuhan erkiteken pengorbanen Tuhan Yesus, kematen ras kekekenNa maka kemulian Dibata lit bas kita. I bas kerembakenta ras Ia, dingen nggeluh i bas kataNa. Kemulian Dibata si lit bas dirinta e me si arus sibincarken. Tentu labo perlu ayonta sicidah-cidahken man kalak si deban, tapi arah kerina pengkebet geluhta, arah pengerana, perukuren ras perbahanenta si mehuli banci kita mbincarken kemulian Dibata man kalak si deban. “Sitransfer” hal-hal si mehuli si ngena ate Dibata i bas geluhta man kalak si deban. Pengerana ras perbahanenta si erbahanca kalak iberkati, megegeh, terapul bahkan berubah ku si mehuli. Bdk. Mat. 5:16, “Dage, ersinalsallah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i surga”.

Bagi Musa si tetap membangun hubungen si intim ras Tuhan, maka selaku kalak si enggo ngaloken perkuah ate Tuhan, katawari paksa pe metedeh ateta jumpa ras Tuhan, subuk secara komunal ras perpulungen bage pe secara pribadi. Asum kita reh ku Tuhan, maka kuasa KesahNa si Badia erdahin guna mpegegehi kita nggeluh sentudu bagi si ngena ate Tuhan, mengoreksi i bas kesalahen ras dosa silakoken ras kedungenna ngobahken kita wari lepas wari seh makana reh dekahna reh muliana, seh maka kita dungna segambar ras Tuhan.